1 Samuel 15

Chinese TTVR (現代台語譯本羅馬字版)

← Chapter 14 Jump to: Chapter 16 →

1Sat-bó-ní kā Sò-lô kóng, “Siōng Chú chhe góa lâi kā lí boah-iû, siat-li̍p lí choh-ông, tī-lí I ê chú-bîn Í-sek-lia̍t. Só͘-í, lí tio̍h thiaⁿ-thàn Siōng Chú só͘ kóng ê ōe.

2Siōng Chú — Bān-kun ê Thóng-sòe án-ni kóng, ‘Góa beh hêng-hoa̍t A-má-le̍k -lâng, in-ūi Í-sek-lia̍t -lâng chhut Ai-ki̍p ê sî, A-má-le̍k -lâng bat chó͘-gāi te̍k-tùi in.

3Taⁿ lí tio̍h khì phah A-má-le̍k -lâng, kā in châu-bia̍t. Sím-mi̍h to m̄-thang lâu--teh; tio̍h chiong lâm, lú, gín-á, eⁿ-á, kap gû, iûⁿ, lo̍k-tô, lû, lóng thâi-sí.’”

4Sò-lô chiū tiàu-chi̍p kun-peng tī Thê-liān, tiám-sǹg jîn-sò͘, pō͘-peng jī-cha̍p-bān, Iû-tāi -lâng chi̍t-bān.

5Sò-lô lâi kàu A-má-le̍k ê siâⁿ, bâi-ho̍k tī soaⁿ-kok tiong.

6Sò-lô kā Ki-nî -lâng kóng, “Lín lī-khui A-má-le̍k -lâng khì pa̍t-ūi, chiah bián góa kā lín kap in chòe-chi̍t-ē châu-bia̍t; in-ūi Í-sek-lia̍t -lâng chhut Ai-ki̍p ê sî, lín bat hó khoán-thāi in.” Ki-nî -lâng chiū lī-khui A-má-le̍k -lâng.

7Sò-lô kong-kek A-má-le̍k -lâng, tùi Hap-hui-la kàu Ai-ki̍p tang-pêng ê Su-ní.

8I oa̍h-lia̍h A-má-le̍k -ông A-kah, thâi-sí i lóng-chóng ê jîn-bîn.

9M̄-kú Sò-lô kap kun-peng lâu A-kah, kap siōng-hó ê gû, iûⁿ, gû-á, iûⁿ-á, í-ki̍p it-chhè ê hó-mi̍h, m̄-khéng kā in châu-bia̍t, chí-ū húi-bia̍t hiah-ê bô lō͘-ēng, bô kè-ta̍t ê mi̍h-kiāⁿ.

10Siōng Chú tùi Sat-bó-ní kóng,

11“Góa hō͘-hóe soán-li̍p Sò-lô choh-ông, in-ūi i pōe-poān góa, bô chun-siú góa ê bēng-lēng.” Sat-bó-ní chin chhoeh-sim, kui-mî kiû-kiò Siōng Chú.

12Keh-ji̍t thàu-chá, Sat-bó-ní beh khì kìⁿ Sò-lô; ū lâng kā Sat-bó-ní kóng, “ Sò-lô í-keng khì Ka-bi̍t, tī hia ūi-tio̍h ka-kī khiā chio̍h-pi, āu-lâi oat-khì Kiat-kah.”

13Sat-bó-ní kàu Sò-lô hia, Sò-lô kā i kóng, “Goān Siōng Chú sù-hok lí. Góa í-keng chiàu Siōng Chú ê bēng-lēng chòe lah.”

14Sat-bó-ní kóng, “Án-ni o͘h? Góa ná ū thiaⁿ-tio̍h gû kap iûⁿ teh háu ê siaⁿ?”

15Sò-lô kóng, “Hiah-ê sī góa ê kun-peng tùi A-má-le̍k -lâng hia lia̍h--lâi-ê; in-ūi in lâu siōng-hó ê gû, iûⁿ, beh hiàn hō͘ Siōng Chú — lí ê Siōng-tè; kî-tha--ê goán lóng ū kā châu-bia̍t.”

16Sat-bó-ní kā Sò-lô kóng, “Lí tiām--khì! Góa beh kā lí kóng chā-mî Siōng Chú kā góa kóng ê ōe.” Sò-lô kā i kóng, “Chhiáⁿ kóng.”

17Sat-bó-ní kóng, “Sui-jiân lí khòaⁿ ka-kī chòe bî-sòe, Siōng Chú kiám m̄-sī hō͘ lí chòe Í-sek-lia̍t chèng chi-cho̍k ê léng-siù? Siōng Chú ēng iû boah lí choh-ông, lâi tī-lí Í-sek-lia̍t.

18Siōng Chú koh phài lí khì, bēng-lēng lí kóng, ‘Lí khì kap siâ-ok ê A-má-le̍k -lâng kau-chiàn, tio̍h kā in lóng châu-bia̍t.’

19Lí sī-án-chóaⁿ bô thiaⁿ-thàn Siōng Chú ê ōe, chông-khì chhiúⁿ chiàn-lī-phín, chòe Siōng Chú khòaⁿ-chòe pháiⁿ ê tāi-chì?”

20Sò-lô kā Sat-bó-ní kóng, “Góa ū thiaⁿ-thàn Siōng Chú ê bēng-lēng, chiàu I ê chí-sī khì kau-chiàn, lia̍h A-má-le̍k -ông A-kah lâi, koh thâi-sí só͘-ū ê A-má-le̍k -lâng.

21M̄-kú góa ê kun-peng tùi eng-kai tio̍h húi-bia̍t ê chiàn-lī-phín tiong-kan, lâu siōng-hó ê gû kap iûⁿ, tòa-lâi Kiat-kah beh hiàn hō͘ Siōng Chú — lí ê Siōng-tè.”

22Sat-bó-ní kóng, “Siōng Chú kiám ì-ài sio-hòa-chè kap chè-mi̍h, khah iâⁿ ì-ài lâng chun-thàn I ê ōe? Lí tio̍h chai, thiaⁿ-thàn pí hiàn-chè khah hó, sūn-thàn iâⁿ-kè iûⁿ-káng ê iû.

23Pōe-poān chhin-chhiūⁿ kiâⁿ siâ-su̍t sī hoān-chōe; chū-ko chhin-chhiūⁿ pài ngó͘-siōng sī siâ-ok. In-ūi lí khì-sak Siōng Chú ê ōe, I mā khì-sak lí, m̄ hō͘ lí choh-ông.”

24Sò-lô tùi Sat-bó-ní kóng, “Góa ū hoān-chōe, ûi-pōe Siōng Chú ê bēng-lēng kap lí ê ōe, in-ūi góa kiaⁿ kun-peng, thiaⁿ in ê ōe.

25Taⁿ, kiû lí sià-bián góa ê chōe, kap góa chòe-hé tò--khì, hō͘ góa thang kèng-pài Siōng Chú.”

26Sat-bó-ní kā Sò-lô kóng, “Góa m̄ kap lí tò--khì; in-ūi lí khì-sak Siōng Chú ê ōe; Siōng Chú mā khì-sak lí, m̄ hō͘ lí chòe Í-sek-lia̍t ê ông.”

27Sat-bó-ní oa̍t-tńg-sin beh lī-khui, Sò-lô khiú i ê saⁿ-á-ku, saⁿ soah li̍h--khì.

28Sat-bó-ní kā i kóng, “Kin-á-ji̍t Siōng Chú hō͘ Í-sek-lia̍t -kok kap lí toān-choa̍t koan-hē, chiong Í-sek-lia̍t -kok kau hō͘ chi̍t ê tī lí sin-piⁿ, pí lí khah hó ê lâng.

29Í-sek-lia̍t ê Tāi-lêng-chiá, bōe pe̍h-chha̍t, mā bōe kái-piàn sim-ì; in-ūi I m̄-sī sè-kan-lâng, I bōe kái-piàn sim-ì.”

30Sò-lô kóng, “Góa ū hoān-chōe; chhiáⁿ lí tī hū-ló kap Í-sek-lia̍t -lâng bīn-chêng chun-tiōng góa, kap góa chòe-hé tò--khì, hō͘ góa thang kèng-pài Siōng Chú — lí ê Siōng-tè.”

31Sat-bó-ní chiū oa̍t-tńg-sin tè Sò-lô tò--khì; Sò-lô chiū kèng-pài Siōng Chú.

32Sat-bó-ní kóng, “Lín chhōa A-má-le̍k -ông A-kah lâi góa chia.” A-kah chiū kiaⁿ-kiaⁿ-hiâⁿ-hiâⁿ lâi kàu Sat-bó-ní bīn-chêng; A-kah kóng, “Góa sí-kî kàu lah.”

33Sat-bó-ní kóng, “Lí bat ēng to thâi-sí hū-jîn-lâng ê kiáⁿ, lín lāu-bú ê kiáⁿ mā ōe hō͘ lâng thâi-sí.” Sat-bó-ní tī Kiat-kah, tī Siōng Chú bīn-chêng, chiong A-kah chām-chòe chi̍t-tè chi̍t-tè.

34Sat-bó-ní tò-khì La-má; Sò-lô tńg-khì Ki-pí-a i ê chhù.

35Sat-bó-ní sí í-chêng, bô koh kap Sò-lô kìⁿ-bīn; i ūi-tio̍h Sò-lô iu-siong. Siōng Chú mā in-ūi ū siat-li̍p Sò-lô chòe Í-sek-lia̍t -ông kan-khó͘-sim.

← Chapter 14 Jump to: Chapter 16 →