1 Samuel 10

Chinese TTVR (現代台語譯本羅馬字版)

← Chapter 9 Jump to: Chapter 11 →

1Sat-bó-ní the̍h chi̍t koàn iû, tò tī Sò-lô ê thâu-khak, kā i chim, kóng, “Siōng Chú ēng iû kā lí boah, siat-li̍p lí chòe I chú-bîn ê thóng-tī-chiá.

2Kin-á-ji̍t lí lī-khui góa liáu-āu, khì Piān-ngá-bín tōe-khu ê Siā-sat, óa-kūn Lúi-kiat ê bōng ê sî, ōe tú-tio̍h nn̄g ê lâng; in ōe kā lí kóng, ‘Lí teh chhē ê lû-á í-keng chhē--tio̍h. Chit-chūn lí ê lāu-pē bô teh hoân-ló lû-á, sī teh khòa-lū lí; i teh mn̄g: Góa ê kiáⁿ lóng bô siau-sit, beh án-chóaⁿ?’

3Lí kè-sio̍k tùi hia khì, kàu Tha-po̍k ê siōng-chhiū hia, ōe tú-tio̍h saⁿ ê lâng, in beh khì Pek-te̍k-lī hiàn-chè hō͘ Siōng-tè, chi̍t ê tòa saⁿ chiah soaⁿ-iûⁿ-á, chi̍t ê tòa saⁿ ê piáⁿ, chi̍t ê tòa chi̍t phê-tē ê chiú.

4In ōe kā lí chhéng-an, hō͘ lí nn̄g ê piáⁿ; lí tio̍h chiap-siū.

5Āu-lâi lí tio̍h khì Siōng-tè ê soaⁿ Ki-pí-a, tī hia ū Hui-lī-sū -lâng teh hông-siú; lí ji̍p-siâⁿ ê sî, ōe tú-tio̍h chi̍t tīn sian-ti tùi soaⁿ-thâu-tôaⁿ lo̍h--lâi; ū lâng tôaⁿ-khîm tôaⁿ-sek, ū lâng phah-kó͘, ū lâng pûn phín-á; in lóng ji̍p-sîn kóng-ōe.

6Siōng Chú ê sîn ōe tōa-tōa chhiong-móa lí, lí ōe pìⁿ-chòe sin ê lâng, kap in siâng-khoán ji̍p-sîn kóng-ōe.

7Chiah-ê tāi-chì hoat-seng ê sî, lí chiū chiàu só͘ siū ê kám-tōng khì chòe, in-ūi Siōng-tè kap lí tông-chāi.

8Lí lo̍h-khì Kiat-kah, góa mā ōe khì hia hiàn sio-hòa-chè kap pêng-an-chè. Lí thèng-hāu chhit ji̍t, tán góa kàu lí hia chí-sī lí tio̍h chòe ê tāi-chì.”

9Sò-lô oa̍t-tńg-sin lī-khui Sat-bó-ní ê sî, Siōng-tè hō͘ i sin ê sim. Tī hit-ji̍t, Sat-bó-ní kā i kóng ê tāi-chì lóng si̍t-hiān.

10Sò-lô kap i ê po̍k-jîn lâi kàu Ki-pí-a, tú-tio̍h chi̍t tīn sian-ti tùi hia chhut--lâi. Hit-sî, Siōng-tè ê sîn tōa-tōa chhiong-móa i, i chiū kap in siâng-khoán ji̍p-sîn kóng-ōe.

11Chêng-kàu-taⁿ bat i ê lâng khòaⁿ-tio̍h i tī sian-ti tiong ji̍p-sîn kóng-ōe, chiū mn̄g-lâi-mn̄g-khì, “ Ki-sū ê kiáⁿ sī án-chóaⁿ? Sò-lô mā chòe sian-ti o͘h?”

12Ū chi̍t ê hit só͘-chāi ê lâng kóng, “Hiah-ê lâng ê su-hū sī siáⁿ-lâng?” Tùi án-ni ū chi̍t kù sio̍k-gú kóng, “ Sò-lô mā chòe sian-ti o͘h?”

13Sò-lô ji̍p-sîn kóng-ōe liáu chiū chiūⁿ-khì soaⁿ-thâu-tôaⁿ kèng-pài.

14Sò-lô ê a-chek mn̄g Sò-lô kap i ê po̍k-jîn kóng, “Lín khì tó-ūi?” I ìn kóng, “Khì chhē lû-á; chhē bô, chiū khì Sat-bó-ní hia.”

15Sò-lô ê a-chek kóng, “Chhiáⁿ lí kā góa kóng Sat-bó-ní tùi lín kóng sím-mi̍h.”

16Sò-lô tùi i ê a-chek kóng, “I chheng-chhó kā goán kóng ‘Lû-á í-keng chhē--tio̍h lah.’” M̄-kú Sò-lô bô kā i ê a-chek thê-khí Sat-bó-ní kóng i beh choh-ông ê sū.

17Sat-bó-ní tiàu-chi̍p jîn-bîn kàu Bí-su-pa lâi kìⁿ Siōng Chú.

18I tùi Í-sek-lia̍t -lâng kóng, “Siōng Chú — Í-sek-lia̍t ê Siōng-tè án-ni kóng, ‘Góa chhōa Í-sek-lia̍t chhut Ai-ki̍p, kái-kiù lín thoat-lī Ai-ki̍p -lâng ê chhiú kap hiah-ê ap-chè lín ê lia̍t-kok.’

19M̄-kú kin-á-ji̍t lín khì-sak chit-ūi kiù lín thoat-lī só͘-ū hoān-lān chai-hō ê Siōng-tè, iau-kiû góa kā lín siat-li̍p chi̍t ê ông thóng-tī lín. Taⁿ tio̍h chiàu lín ê chi-cho̍k, chong-cho̍k lâi khiā tī Siōng Chú bīn-chêng.”

20Sat-bó-ní kiò Í-sek-lia̍t ta̍k chi-cho̍k chìn-chêng lâi, thiu-tio̍h Piān-ngá-bín chi-cho̍k;

21koh kiò Piān-ngá-bín chi-cho̍k chiàu in ê chong-cho̍k chìn-chêng lâi, thiu-tio̍h Má-te̍k-lī -cho̍k; tùi hit tiong-kan koh thiu-tio̍h Ki-sū ê kiáⁿ Sò-lô. Chèng-lâng chhē i, m̄-kú chhē lóng bô.

22In chiū koh mn̄g Siōng Chú, “Hit-ê lâng ū lâi chia--bô?” Siōng Chú kóng, “I bih tī hit-tui hêng-lí lāi-bīn.”

23In chiū cháu--khì, tùi hia kā Sò-lô chhōa--chhut-lâi; i lâi khiā tī chèng-lâng ê tiong-kan, pí pa̍t-lâng khah koân chi̍t lia̍p thâu.

24Sat-bó-ní tùi bîn-chiòng kóng, “Lín ū khòaⁿ--tio̍h-bô? Siōng Chú só͘ kéng ê lâng, bô chi̍t ê ōe-tàng kap i pí.” Chèng-lâng chiū hoan-ho͘, “Ông bān-sòe!”

25Sat-bó-ní chiong ông ê chek-jīm kap koân-lī tùi jîn-bîn soat-bêng, koh kì-chài tī chheh--ni̍h, hē tī Siōng Chú ê bīn-chêng; jiân-āu Sat-bó-ní kái-sàn bîn-chiòng hō͘ in lóng tńg-khì in tau.

26Sò-lô mā tò-khì Ki-pí-a i ka-kī ê chhù; ū chi̍t tīn sim siū Siōng-tè kám-tōng ê ióng-sū mā tè i khì.

27M̄-kú ū chi̍t-kóa húi-lūi kóng, “Chit-ê lâng ná ōe kiù lán?” In biáu-sī Sò-lô, mā bô sàng i lé-mi̍h; Sò-lô lóng bô kóng sím-mi̍h.

← Chapter 9 Jump to: Chapter 11 →