1 Samuel 4

Chinese TTVR (現代台語譯本羅馬字版)

← Chapter 3 Jump to: Chapter 5 →

1Sat-bó-ní ê ōe thoân-piàn Í-sek-lia̍t. Í-sek-lia̍t -lâng chhut-khì beh kap Hui-lī-sū -lâng kau-chiàn; in tī Í-piān Í-siā hù-kūn chat-iâⁿ, Hui-lī-sū -lâng tī A-hut chat-iâⁿ.

2Hui-lī-sū -lâng pâi-tīn kong-kek Í-sek-lia̍t -lâng, in thâi-iâⁿ, thâi-sí Í-sek-lia̍t -lâng tāi-iok sì-chheng lâng.

3Í-sek-lia̍t kun-tūi tò-lâi iâⁿ-lāi, in ê tiúⁿ-ló kóng, “Sī-án-chóaⁿ Siōng Chú kin-á-ji̍t hō͘ lán thâi-su Hui-lī-sū -lâng? Lán lâi-khì Sī-lô kng Siōng Chú ê iok-kūi lâi lán chia, án-ni I tī lán tiong-kan, ōe kiù lán thoat-lī tùi-te̍k ê chhiú.”

4In chiū phài lâng khì Sī-lô, chiong Siōng Chú — Bān-kun ê Thóng-sòe ê iok-kūi kng--lâi, in-ūi Siōng Chú chē tī iok-kūi téng-bīn nn̄g ê thiⁿ-sài ki-lō͘-pek ê tiong-kan. Í-lī nn̄g ê kiáⁿ Hô-hut-nî, Hui-nî-hap, kap Siōng-tè ê iok-kūi chòe-hé lâi.

5Siōng Chú ê iok-kūi lâi kàu iâⁿ-tiong ê sî, Í-sek-lia̍t -lâng tōa-siaⁿ hoah, tōe soah tín-tāng.

6Hui-lī-sū -lâng thiaⁿ-tio̍h hán-hoah ê siaⁿ, chiū kóng, “ Hi-pek-lâi iâⁿ-tiong hiah-ni̍h tōa-siaⁿ, sī teh hoah sím-mi̍h?” Āu-lâi chiah chai sī Siōng Chú ê iok-kūi kàu iâⁿ-tiong.

7Hui-lī-sū -lâng kiaⁿ-hiâⁿ, kóng, “Ū sîn-bêng lâi kàu in ê iâⁿ-tiong.” In kóng, “Chhám ah, lán chêng-kàu-taⁿ m̄-bat tú-tio̍h chit-khoán tāi-chì.

8Lán chhám ah, siáⁿ-lâng ōe-tàng kiù lán thoat-lī chit-khoán tōa koân-lêng ê sîn-bêng? Í-chêng tī khòng-iá ēng ta̍k-khoán chai-hō phah-sí Ai-ki̍p -lâng--ê, chiū-sī chiah-ê sîn-bêng.

9Hui-lī-sū -lâng ah, tio̍h ióng-kám, tio̍h chòe tāi-tiōng-hu, lín chiah bián chòe Hi-pek-lâi -lâng ê lô͘-lē, chhin-chhiūⁿ in í-chêng chòe lán ê lô͘-lē. Tio̍h chòe tāi-tiōng-hu kap in kau-chiàn.”

10Hui-lī-sū -lâng chiū chhut-chiàn, Í-sek-lia̍t -lâng chiàn-pāi; pō͘-peng sí saⁿ-bān lâng, kî-tha--ê lóng tô-cháu tńg-khì in tau.

11Siōng-tè ê iok-kūi hō͘ Hui-lī-sū -lâng chhiúⁿ--khì; Í-lī nn̄g ê kiáⁿ Hô-hut-nî kap Hui-nî-hap mā lóng sí.

12Kâng hit-ji̍t, ū chi̍t ê Piān-ngá-bín chi-cho̍k ê lâng tùi chiàn-tiûⁿ cháu-lâi Sī-lô, saⁿ thiah-li̍h, thâu-khak sám thô͘-hún piáu-sī ai-siong.

13I kàu ê sî, tú-hó Í-lī tī lō͘-piⁿ chē tī i ê í-á teh khòaⁿ, in-ūi i teh khòa-lū Siōng-tè ê iok-kūi. Hit-ê lâng ji̍p-siâⁿ pò siau-sit, choân-siâⁿ ê lâng lóng âu-kiò.

14Í-lī thiaⁿ-tio̍h âu-kiò ê siaⁿ, chiū mn̄g, “In teh hoah sím-mi̍h?” Hit-ê lâng kóaⁿ-kín lâi kā Í-lī pò-kò.

15Hit-sî Í-lī í-keng káu-cha̍p-poeh hè, ba̍k-chiu chhâ-chhâ, bô khòaⁿ--kìⁿ.

16Hit-ê lâng kā Í-lī kóng, “Góa tú-á tùi chiàn-tiûⁿ lâi, tùi chiàn-tiûⁿ tô-cháu--lâi.” Í-lī kóng, “Góa ê kiáⁿ, tāi-chì án-chóaⁿ?”

17Pò siau-sit--ê ìn kóng, “ Í-sek-lia̍t -lâng chiàn-pāi tô-cháu, hō͘ lâng thâi-sí--ê chin chōe. Lí nn̄g ê kiáⁿ, Hô-hut-nî kap Hui-nî-hap mā sí. Siōng-tè ê iok-kūi hō͘ lâng chhiúⁿ--khì.”

18Hit-ê lâng chi̍t-ē kóng-tio̍h Siōng-tè ê iok-kūi, Í-lī chiū tùi í-á tò-siàng-hiàⁿ, tó lo̍h-khì mn̂g-piⁿ, ām-kún chi̍h, chiū sí; in-ūi i nî-lāu koh tōa-kho͘. Í-lī chòe Í-sek-lia̍t ê sū-su sì-cha̍p nî.

19Í-lī ê sin-pū, Hui-nî-hap ê bó͘, hoâi-īn teh-beh siⁿ. I thiaⁿ-tio̍h Siōng-tè ê iok-kūi hō͘ lâng chhiúⁿ--khì, ta-koaⁿ kap tiōng-hu lóng sí ê siau-sit, hut-jiân chhui-chūn thàng-thiàⁿ, khut lo̍h-khì siⁿ-kiáⁿ.

20I teh-beh sí ê sî, tī piⁿ--á teh chiàu-kò͘ ê hū-jîn-lâng kā i kóng, “Bián kiaⁿ, lí siⁿ ta-po͘--ê!” M̄-kú i tiām-tiām, bô hôe-èng.

21I kā gín-á hō-miâ kiò “ Í-ka-phok ”, ì-sù sī Siōng-tè ê êng-iāu í-keng lī-khui Í-sek-lia̍t; in-ūi Siōng-tè ê iok-kūi hō͘ lâng chhiúⁿ--khì, ta-koaⁿ kap tiōng-hu mā lóng sí.

22I koh kóng, “Êng-iāu í-keng lī-khui Í-sek-lia̍t, in-ūi Siōng-tè ê iok-kūi hō͘ lâng chhiúⁿ--khì.”

← Chapter 3 Jump to: Chapter 5 →