1 Samuel 22

Chinese TTVR (現代台語譯本羅馬字版)

← Chapter 21 Jump to: Chapter 23 →

1Tāi-pi̍t lī-khui Ka-te̍k, cháu kàu A-tō͘-lân-tōng; i ê hiaⁿ-tī kap i ê lāu-pē choân-ke thiaⁿ--tio̍h, chiū lóng lo̍h-khì i hia.

2Só͘-ū siū ap-pek--ê, khiàm-chè--ê, sim put-boán--ê, lóng chū-chi̍p lâi i hia, Tāi-pi̍t chiū chòe in ê thâu; khì óa i--ê, iok ū sì-pah lâng.

3Tāi-pi̍t tùi hia khì Mô͘-ap ê Bí-su-pa, tùi Mô͘-ap -ông kóng, “Kiû lí ún-chún góa ê pē-bú lâi tiàm lín chia, thèng-hāu góa chai Siōng-tè án-chóaⁿ kā góa an-pâi.”

4Tāi-pi̍t chhōa in kàu Mô͘-ap -ông hia. Tāi-pi̍t tòa tī iàu-sài hit-tōaⁿ sî-kan, i ê pē-bú lóng tòa tī Mô͘-ap -ông hia.

5Āu-lâi, sian-ti Ka-tek kā Tāi-pi̍t kóng, “M̄-thang koh tòa tī iàu-sài, tio̍h khì Iû-tāi tōe-khu.” Tāi-pi̍t chiū lī-khui, khì Ha-lia̍t ê chhiū-nâ.

6Ū chi̍t ji̍t, Sò-lô tī Ki-pí-a ê La-má, chē tī liú-chhiū kha, chhiú--ni̍h gia̍h chhiuⁿ, chèng sī-ōe khiā tī i chiu-ûi. Hit-sî, Sò-lô thiaⁿ-tio̍h ū lâng chai-iáⁿ Tāi-pi̍t kap tè i ê lâng tī tó-ūi,

7chiū kā i ê sī-ōe kóng, “ Piān-ngá-bín -lâng ah, thiaⁿ leh. Lín siūⁿ-kóng Iâ-se ê kiáⁿ ōe hō͘ lín ta̍k-ê lâng chhân kap phû-tô-hn̂g o͘h? Ōe phài lín chòe koaⁿ-tiúⁿ chí-hui chi̍t-chheng ê, á-sī chi̍t-pah ê peng o͘h?

8Lín kèng-jiân kiōng-bô͘ beh pōe-poān góa. Góa ka-kī ê kiáⁿ kap Iâ-se ê kiáⁿ kiat-bêng, lín bô lâng kā góa pò-kò; lín tiong-kan bô lâng koan-sim góa. Kin-á-ji̍t góa ê kiáⁿ sái-lōng góa ê pō͘-hā tng-tán beh hāi góa, lín lóng bô pò góa chai.”

9Hit-sî Í-tong -lâng To-ek khiā tī Sò-lô sī-ōe ê tiong-kan, kā i kóng, “Góa ū khòaⁿ-tio̍h Iâ-se ê kiáⁿ khì Ná-pek, kàu A-hi-tu̍t ê kiáⁿ A-hi-bí-le̍k hia.

10A-hi-bí-le̍k thòe Tāi-pi̍t mn̄g Siōng Chú, koh hō͘ i chia̍h-mi̍h, mā gia̍h Hui-lī-sū -lâng Ko-lī-a ê to hō͘ i.”

11Ông chiū phài lâng tiàu A-hi-tu̍t ê kiáⁿ chè-si A-hi-bí-le̍k, koh tiàu in lāu-pē choân-ke, chiū-sī tiàm tī Ná-pek hiah-ê chè-si lâi; in chiū lóng lâi ông hia.

12Sò-lô kóng, “ A-hi-tu̍t ê kiáⁿ, thiaⁿ leh!” I ìn kóng, “Góa ê chú ah, góa tī chia.”

13Sò-lô kā i kóng, “Lí sī-án-chóaⁿ kap Iâ-se ê kiáⁿ kiōng-bô͘ pōe-poān góa, hō͘ i piáⁿ kap to, koh thòe i kiû-mn̄g Siōng-tè, tì-kàu i kin-á-ji̍t tng-tán beh hāi góa?”

14A-hi-bí-le̍k ìn ông kóng, “Lí ê sī-ōe siáⁿ-lâng ōe pí Tāi-pi̍t khah chīn-tiong? I sī ông ê kiáⁿ-sài, koh sī lí ê sī-ōe-tiúⁿ, tī kiong-têng siū kèng-tiōng.

15Góa kiám kin-á-ji̍t chiah thòe i kiû-mn̄g Siōng-tè? Choa̍t-tùi m̄-sī. Chhiáⁿ ông m̄-thang kā chōe kui hō͘ lí ê po̍k-jîn kap góa ê lāu-pē choân-ke; in-ūi pōe-poān ông chiah-ê tāi-chì, bô-lūn tōa-sòe hāng, lí ê po̍k-jîn lóng m̄ chai.”

16Ông kóng, “ A-hi-bí-le̍k, lí kap lí ê lāu-pē choân-ke lóng tio̍h sí.”

17Ông chiū bēng-lēng chó-iū ê sī-ōe kóng, “Lín khì, kā Siōng Chú ê chè-si lóng thâi-sí; in-ūi in óa Tāi-pi̍t, in chai Tāi-pi̍t tô-cháu koh bô pò góa chai.” M̄-kú ông ê sī-ōe m̄-khéng hē-chhiú thâi Siōng Chú ê chè-si.

18Ông kā To-ek kóng, “Lí khì, khì thâi hiah-ê chè-si.” Í-tong -lâng To-ek chiū khì thâi chè-si; hit-ji̍t thâi-sí poeh-cha̍p-gō͘ ê chhēng iù-môa-pò͘ í-hut-tek ê lâng.

19I koh ēng to thâi chè-si ê siâⁿ Ná-pek siâⁿ-lāi ê lâng, bô-lūn lâm-lú, gín-á, chia̍h-lin ê eⁿ-á, kap gû, lû, iûⁿ, lóng thâi-sí.

20A-hi-tu̍t ê kiáⁿ A-hi-bí-le̍k ū chi̍t ê kiáⁿ kiò-chòe A-pí-a-tha, tô-cháu khì Tāi-pi̍t hia.

21A-pí-a-tha chiong Sò-lô thâi-sí Siōng Chú ê chè-si ê tāi-chì kā Tāi-pi̍t kóng.

22Tāi-pi̍t kā A-pí-a-tha kóng, “Hit-ji̍t góa khòaⁿ-tio̍h Í-tong -lâng To-ek tī hia, chiū chai i it-tēng ōe kā Sò-lô pò-kò. Lí ê lāu-pē choân-ke sit-lo̍h sìⁿ-miā, lóng sī in-ūi góa ê iân-kò͘.

23Lí lâi kap góa tòa, m̄-bián kiaⁿ, in-ūi siūⁿ-beh hāi lí sìⁿ-miā--ê mā beh hāi góa; lâi kap góa tòa, lí chiū an-choân.”

← Chapter 21 Jump to: Chapter 23 →