1 Samuel 25 — Chinese TTVR (現代台語譯本羅馬字版)

1Sat-bó-ní sí, Í-sek-lia̍t chèng-lâng chū-chi̍p, ūi-tio̍h i thî-khàu, kā i bâi-chòng tī i ê kò͘-hiong La-má. Tāi-pi̍t lo̍h-khì Pa-lân ê khòng-iá.

2Tī Má-hûn ū chi̍t ê tōa hó-gia̍h-lâng, i ê sán-gia̍p tī Ka-bi̍t; i ū mî-iûⁿ saⁿ-chheng chiah, soaⁿ-iûⁿ chi̍t-chheng chiah. Hit-chūn, i tī Ka-bi̍t teh chián iûⁿ-mn̂g.

3Hit-ê lâng sio̍k Ka-le̍k chong-cho̍k, kiò-chòe Ná-pà, i ê bó͘ Ài-pí-kai sī hiân-hūi koh súi ê hū-jîn-lâng. M̄-kú Ná-pà choh-lâng chho͘-ló͘ koh hiong-ok.

4Tāi-pi̍t tī khòng-iá thiaⁿ-tio̍h Ná-pà teh chián iûⁿ-mn̂g,

5chiū phài cha̍p ê siàu-liân-lâng, kiò in khì Ka-bi̍t kìⁿ Ná-pà, hoan-hù in ēng i ê miâ kā Ná-pà chhéng-an,

6kóng, “Chiok lí tn̂g-hè-siū! Goān lín choân-ke pêng-an! Goān lí sū-sū sūn-lī!

7Tāi-pi̍t ū thiaⁿ-kóng lí tī chia teh chián iûⁿ-mn̂g; lí ê kò͘-iûⁿ--ê kap goán chòe-hé tī Ka-bi̍t ê sî, goán m̄-bat khi-hū in, in mā m̄-bat sit-lo̍h sím-mi̍h.

8Lí thang mn̄g lí ê kang-lâng, in ōe kā lí kóng. Tāi-pi̍t chhiáⁿ lí hó khoán-thāi goán chiah-ê siàu-liân-lâng, kin-á-ji̍t tú-tú sī choeh-ji̍t. Chhiáⁿ sûi-piān the̍h tām-po̍h hō͘ goán kap lí ê hō͘-pòe Tāi-pi̍t.”

9Tāi-pi̍t ê siàu-liân-lâng kàu-ūi, chiū tāi-piáu Tāi-pi̍t chiong chiah-ê ōe kā Ná-pà kóng. In kóng-liáu, chēng-chēng thèng-hāu.

10Ná-pà ìn Tāi-pi̍t ê pō͘-hā kóng, “ Tāi-pi̍t sī siáⁿ-lâng? Iâ-se ê kiáⁿ sī siáⁿ-lâng? Chòe-kūn put-sî ū po̍k-jîn pōe-poān chú-lâng.

11Góa ê piáⁿ, góa ê chúi, kap beh hō͘ chián iûⁿ-mn̂g ê lâng chia̍h ê bah, kiám thang the̍h hō͘ m̄-chai tùi tó-ūi lâi ê lâng?”

12Tāi-pi̍t ê siàu-liân-lâng oa̍t-tńg-sin tùi goân-lō͘ tò--khì, chiong chiah-ê ōe kā Tāi-pi̍t pò-kò.

13Tāi-pi̍t tùi kun-tè i ê lâng kóng, “Lín ta̍k-ê lâng lóng tio̍h tòa to.” In chiū lóng tòa to, Tāi-pi̍t mā tòa. Tè Tāi-pi̍t khì--ê iok ū sì-pah lâng, nn̄g-pah ê lâu-teh kò͘-siú pó͘-kip-phín.

14Ná-pà ê kang-lâng ū chi̍t ê lâi kā Ná-pà ê bó͘ Ài-pí-kai kóng, “ Tāi-pi̍t tùi khòng-iá chhe sù-chiá lâi kā goán chú-lâng chhéng-an, chú-lâng tian-tò tōa-siaⁿ kā in bú-jio̍k.

15M̄-kú hiah-ê lâng tùi goán chin hó, goán tī iá-gōa kap in óng-lâi ê sî lóng bô siū siong-hāi, mā m̄-bat sit-lo̍h sím-mi̍h.

16Goán tī in hia chhī iûⁿ ê sî, in mî-ji̍t lóng ū kā goán pó-hō͘.

17Chhiáⁿ lí siông-sè siūⁿ, khòaⁿ tio̍h án-chóaⁿ chòe, in-ūi chai-hō it-tēng ōe lîm-kàu goán ê chú-lâng kap i ê choân-ke. Goán chú-lâng sèng-chêng hiong-ok, bô lâng káⁿ kap i kóng-ōe.”

18Ài-pí-kai chiū kóaⁿ-kín chiong nn̄g-pah ê piáⁿ, nn̄g phê-tē chiú, gō͘ chiah hang-hó ê iûⁿ, cha̍p-chhit kong-kun pē-se̍k ê be̍h-á, chi̍t-pah lia̍p phû-tô-koaⁿ-oân, nn̄g-pah lia̍p bû-hoa-kó-koaⁿ-oân, hō͘ lû-á chài.

19Jiân-āu i kā hiah-ê kang-lâng kóng, “Lín seng kiâⁿ, góa tè lín ê āu-bīn khì.” M̄-kú i bô kā i ê tiōng-hu Ná-pà kóng.

20Ài-pí-kai chiū khiâ-lû lo̍h-soaⁿ, tùi soaⁿ hit-pêng oat--kè-lâi ê sî, tú-tio̍h Tāi-pi̍t kap kun-tè i ê lâng tú-hó tùi tùi-bīn teh lâi.

21Tāi-pi̍t tú-á teh kóng, “Chit-ê lâng tī khòng-iá só͘-ū ê it-chhè, góa kā i kò͘ kah bô sit-lo̍h pòaⁿ-hāng, si̍t-chāi bô-chhái-kang; i kèng-jiân ēng pháiⁿ pò hó!

22Bîn-á-chài thiⁿ-kng í-chêng, góa nā bô chiong in tau só͘-ū ê ta-po͘-lâng lóng thâi-sí, goān Siōng-tè ka-pē chek-hoa̍t góa.”

23Ài-pí-kai khòaⁿ-tio̍h Tāi-pi̍t, kóaⁿ-kín tùi lû-á lo̍h--lâi, tī Tāi-pi̍t ê bīn-chêng phak tī thô͘-kha pài i.

24Ài-pí-kai phak tī i ê kha-chêng, kóng, “Góa ê chú ah, lóng sī góa m̄-tio̍h. Kiû lí chún lí ê lú-pī kóng hō͘ lí thiaⁿ. Chhiáⁿ thiaⁿ lú-pī ê ōe.

25Góa ê chú, mài chhap hit-ê sèng-chêng hiong-ok ê lâng; i kiò-chòe Ná-pà, bêng-hû-kî-si̍t sī gōng-lâng. M̄-kú góa, lí ê lú-pī, bô tú-tio̍h góa ê chú phài--lâi ê siàu-liân-lâng.

26Góa ê chú ah, kì-jiân Siōng Chú chó͘-chí lí bô hoān thâi-sí lâng ê chōe, bô hō͘ lí chhin-chhiú thòe ka-kī pò-siû, góa kí éng-oa̍h ê Siōng Chú kap lí ê sìⁿ-miā chiù-chōa, ‘Goān góa ê chú ê tùi-te̍k kap kè-bô͘ beh hāi lí ê lâng lóng kap Ná-pà kâng-khoán.’

27Taⁿ lí ê lú-pī tòa-lâi hō͘ góa ê chú ê lé-mi̍h, chhiáⁿ pun hō͘ kun-tè góa ê chú ê siàu-liân-lâng.

28Kiû lí khoan-sià lí lú-pī ê chōe-kò. Siōng Chú it-tēng ōe kā góa ê chú kiàn-li̍p ún-kò͘ ê ông-tiâu, in-ūi góa ê chú ūi-tio̍h Siōng Chú kau-chiàn, koh lí it-seng chhē bōe chhut ū sím-mi̍h kè-sit.

29Sui-jiân ū lâng khí-lâi tui-jip lí, siàu-siūⁿ lí ê sìⁿ-miā, m̄-kú góa ê chú ê sìⁿ-miā ōe tit-tio̍h Siōng Chú — lí ê Siōng-tè pó-hō͘, chhin-chhiūⁿ teh pó-hō͘ ke̍k kùi-tiōng ê pó-mi̍h. Lí tùi-te̍k ê sìⁿ-miā ōe hō͘ Siōng Chú hiat-ka̍k, chhin-chhiūⁿ ēng hìⁿ-soh hìⁿ--chhut-khì.

30Chiong-lâi Siōng Chú chiàu I tùi góa ê chú ê èng-ún sêng-chiū it-chhè hó-sū, soán-li̍p lí chòe Í-sek-lia̍t ê léng-siù ê sî,

31góa ê chú chiū m̄-bián ūi-tio̍h bô-iân-bô-kò͘ thâi-lâng, á-sī thòe ka-kī pò-siû, tì-kàu hō͘-hóe, chū-chek. Tng Siōng Chú sù-hok hō͘ góa ê chú ê sî, kiû lí ōe-kì-tit lí ê lú-pī.”

32Tāi-pi̍t kā Ài-pí-kai kóng, “Siōng Chú — Í-sek-lia̍t ê Siōng-tè eng-kai siū chheng-chàn, in-ūi I kin-á-ji̍t chhe lí lâi kìⁿ góa.

33Lí kap lí ê kiàn-sek lóng chin thang o-ló, in-ūi lí kin-á-ji̍t chó͘-chí góa bô chhin-chhiú pò-siû, hō͘ góa bô hoān-tio̍h thâi-sí lâng ê chōe.

34Siōng Chú ū chó͘-chí góa bô siong-hāi lí. Tī Siōng Chú — Í-sek-lia̍t éng-oa̍h ê Siōng-tè bīn-chêng, góa káⁿ kóng, ka-chài lí ū sûi-sî kóaⁿ-lâi kìⁿ góa, nā bô, kàu bîn-á-chá-khí, só͘-ū sio̍k Ná-pà ê ta-po͘-lâng, it-tēng liân chi̍t ê to bōe oa̍h--teh.”

35Jiân-āu, Tāi-pi̍t chiap-siū Ài-pí-kai tòa--lâi ê lé-mi̍h, chiū kā i kóng, “Lí thang pêng-an tò-khì lín tau; góa chai lí ê ì-sù. Góa tah-èng lí.”

36Ài-pí-kai tńg-khì Ná-pà hia, Ná-pà tú tī chhù-lāi teh pān-toh, chhin-chhiūⁿ ông pâi-siat iàn-se̍k. Ná-pà sim-chêng hui-siông sóng-khoài, lim kah chùi-bâng-bâng. Só͘-í, hit-mî Ài-pí-kai bô chiong só͘-ū hoat-seng ê tāi-chì kā i kóng.

37Keh-chá-khí, Ná-pà chiú thè, i ê bó͘ chiah chiong chiah-ê tāi-chì kā i kóng; i thiaⁿ-liáu sûi-sî sit-khì ì-sek, kui seng-khu bōe tín-tāng.

38Tāi-iok cha̍p ji̍t āu, Siōng Chú phah Ná-pà, i chiū sí--khì.

39Tāi-pi̍t thiaⁿ-tio̍h Ná-pà í-keng sí, chiū kóng, “Siōng Chú eng-kai siū chheng-chàn, in-ūi góa tùi Ná-pà siū ê bú-jio̍k, I ū thòe góa sin-oan, koh chó͘-chí góa bô khì chòe pháiⁿ; Siōng Chú chiàu Ná-pà só͘ chòe ê pháiⁿ kā i hêng-hoa̍t.” Tāi-pi̍t chiū chhe lâng khì kā Ài-pí-kai kóng beh chhōa i chòe bó͘.

40Tāi-pi̍t ê po̍k-jîn khì Ka-bi̍t kìⁿ Ài-pí-kai, kā i kóng, “ Tāi-pi̍t chhe goán lâi kìⁿ lí, kóng beh chhōa lí chòe bó͘.”

41Ài-pí-kai chiū khí--lâi, phak tī thô͘-kha, kóng, “Góa goān-ì chòe chhe-ēng, kā góa ê chú ê po̍k-jîn sóe-kha.”

42Ài-pí-kai sûi-sî khí--lâi, khiâ-lû, chhōa gō͘ ê lú-pī tè Tāi-pi̍t ê sù-chiá chòe-hé khì; i chiū chòe Tāi-pi̍t ê bó͘.

43Tāi-pi̍t í-keng ū chhōa Iâ-su-lia̍t -lâng A-hi-loán; in nn̄g ê lâng lóng chòe i ê bó͘.

44Sò-lô í-keng chiong i ê cha-bó͘-kiáⁿ Bí-kah, chiū-sī Tāi-pi̍t ê bó͘, hō͘ Ka-lîm -lâng La-ek ê kiáⁿ Phà-thiat chòe bó͘.