1 Samuel 6

Chinese TTVR (現代台語譯本羅馬字版)

← Chapter 5 Jump to: Chapter 7 →

1Siōng Chú ê iok-kūi thêng-liû tī Hui-lī-sū -lâng ê tōe chhit ge̍h-ji̍t kú.

2Hui-lī-sū -lâng kiò hiah-ê chè-si kap pok-kòa--ê lâi mn̄g, “Siōng Chú ê iok-kūi goán tio̍h án-chóaⁿ chhú-lí? Chhiáⁿ chí-tiám goán beh án-chóaⁿ sàng i tò-khì goân-lâi ê só͘-chāi?”

3In kóng, “Lín nā beh sàng Í-sek-lia̍t Siōng-tè ê iok-kūi tò--khì, m̄-thang hō͘ i khang-chhiú khì, it-tēng tio̍h tòa pê-chōe ê lé-mi̍h; lín ê pīⁿ chiah ōe tit-tio̍h i-hó, lín chiah ōe chai sī-án-chóaⁿ Siōng-tè kè-sio̍k teh hêng-hoa̍t lín.”

4Hui-lī-sū -lâng mn̄g, “Goán tio̍h ēng sím-mi̍h chòe pê-chōe ê lé-mi̍h?” Chè-si kap pok-kòa--ê ìn kóng, “Chiàu Hui-lī-sū siú-léng ê sò͘-bo̍k, lín tio̍h chō gō͘ lia̍p kim to̍k-chhng, gō͘ chiah kim niáu-chhú, in-ūi lín ê siú-léng lóng siū-tio̍h siâng-khoán ê chai-hō.

5Lín tio̍h chō to̍k-chhng ê bô͘-hêng, kap húi-hoāi lín ê thó͘-tōe ê niáu-chhú ê bô͘-hêng; koh tio̍h chiong êng-kng kui hō͘ Í-sek-lia̍t ê Siōng-tè; bô-tiāⁿ-tio̍h I tùi lín, lín ê sîn-bêng, lín ê thó͘-tōe ōe chhiú-hā-liû-chêng.

6Lín sī-án-chóaⁿ beh chhin-chhiūⁿ Ai-ki̍p -lâng kap Ai-ki̍p -ông hiah-ni̍h ngī-sim? Siōng-tè kiám m̄-sī giâm-giâm tùi-hù in, in chiah pàng Í-sek-lia̍t -lâng lī-khui?

7Hiān-chāi, lín tio̍h chún-pī chi̍t tâi sin ê chhia, nn̄g chiah iáu-teh chhī-lin, m̄-bat kòa taⁿ ê gû-bú, chiong gû-bú thò tī chhia, kā gû-á-kiáⁿ khan tò-khì gû-tiâu;

8koh chiong Siōng Chú ê iok-kūi hē tī chhia-téng, kā lí só͘ chō pê-chōe ê kim-khì khǹg tī iok-kūi piⁿ ê siuⁿ-á lāi sàng--khì.

9Lín tio̍h chù-ì khòaⁿ, hit-tâi chhia nā tùi kau-kài ê lō͘ chiūⁿ kàu Pek Sī-be̍k, chiū chai kàng chit-ê tōa chai-hō hō͘ lán--ê si̍t-chāi sī Siōng Chú. Chhia nā m̄-sī ǹg hit-ê hong-hiòng khì, chiū chai phah lán--ê m̄-sī I, sī lán ngó͘-jiân tú--tio̍h-ê.”

10Hui-lī-sū -lâng chiū chiàu án-ni chòe. In chiong nn̄g chiah iáu-teh chhī-lin ê gû-bú thò tī hit-tâi chhia, kā gû-á-kiáⁿ koaiⁿ tī gû-tiâu;

11koh kā Siōng Chú ê iok-kūi, í-ki̍p khǹg kim niáu-chhú, kim to̍k-chhng ê bô͘-hêng ê siuⁿ-á, lóng hē tī chhia-téng.

12Gû-bú ǹg Pek Sī-be̍k ê tōa-lō͘ ti̍t-ti̍t kiâⁿ--lo̍h-khì, ná kiâⁿ ná háu, bô phian chó-iū. Hui-lī-sū -lâng ê siú-léng tè tī āu-bīn, it-ti̍t kàu Pek Sī-be̍k ê pian-kài.

13Hit-sî Pek Sī-be̍k -lâng tī soaⁿ-kok teh siu-koah be̍h-á; in gia̍h-thâu chi̍t-ē khòaⁿ, khòaⁿ-tio̍h iok-kūi chiū hui-siông hoaⁿ-hí.

14Chhia kàu Pek Sī-be̍k -lâng Iok-su-a ê hn̂g, chiū thêng--teh; tī hia ū chi̍t tè tōa chio̍h, in phòa hit-tâi chhia ê chhâ, kā hit nn̄g chiah gû-bú chòe sio-hòa-chè hiàn hō͘ Siōng Chú.

15Lī-bī -lâng chiong Siōng Chú ê iok-kūi, kap piⁿ--á tóe kim-khì ê siuⁿ-á the̍h--lo̍h-lâi, hē tī hit-tè tōa chio̍h ê téng-bīn. Pek Sī-be̍k -lâng tī hit-ji̍t hiàn sio-hòa-chè kap pa̍t-khoán ê chè hō͘ Siōng Chú.

16Hui-lī-sū -lâng gō͘ ê siú-léng lóng ū khòaⁿ--tio̍h, chiū tī siâng hit-ji̍t tò-khì Í-kek-lûn.

17Hui-lī-sū -lâng tòa gō͘ ê kim to̍k-chhng chòe pê-chōe-chè hêng hō͘ Siōng Chú; chi̍t ê ūi-tio̍h A-si̍t-tu̍t -siâⁿ, chi̍t ê ūi-tio̍h Ka-sat -siâⁿ, chi̍t ê ūi-tio̍h A-si̍t-ki-lûn -siâⁿ, chi̍t ê ūi-tio̍h Ka-te̍k -siâⁿ, chi̍t ê ūi-tio̍h Í-kek-lûn -siâⁿ.

18Kim niáu-chhú ê sò͘-bo̍k chiàu Hui-lī-sū gō͘ ê siú-léng só͘ koán siat-hông ê siâⁿ kap bô siat-hông ê chng-siā lâi tēng. In hē Siōng Chú ê iok-kūi hit-tè tōa chio̍h, kàu kin-á-ji̍t iáu tī Pek Sī-be̍k -lâng Iok-su-a ê hn̂g--ni̍h chòe chèng-kù.

19Siōng Chú phah-sí chhit-cha̍p ê Pek Sī-be̍k -lâng, in-ūi in thau-khòaⁿ iok-kūi ê lāi-bīn. Jîn-bîn tōa ai-khàu, in-ūi Siōng Chú phah-sí hiah chōe lâng.

20Pek Sī-be̍k -lâng kóng, “Siáⁿ-lâng ōe-tàng ho̍k-sāi Siōng Chú chit-ūi Chì-sèng ê Siōng-tè? Lán beh kā iok-kūi sàng-khì tó-ūi?”

21In chiū chhe lâng khì kìⁿ Ki-lia̍t Iâ-lîm -lâng, kóng, “ Hui-lī-sū -lâng ū chiong Siōng Chú ê iok-kūi sàng--tò-lâi; chhiáⁿ lín lâi, kā i chiap-khì lín hia.”

← Chapter 5 Jump to: Chapter 7 →