1 Samuel 13

Chinese TTVR (現代台語譯本羅馬字版)

← Chapter 12 Jump to: Chapter 14 →

1Sò-lô chòe Í-sek-lia̍t -ông nn̄g nî āu,

2tùi Í-sek-lia̍t tiong kéng saⁿ-chheng lâng; nn̄g-chheng ê tè Sò-lô chū-chāi tī Bi̍t-boat kap Pek-te̍k-lī soaⁿ-khu, chi̍t-chheng ê tè Iok-ná-tan chū-chāi tī Piān-ngá-bín tōe-khu ê Ki-pí-a; kî-tha ê lâng hō͘ in tò-khì ka-kī ê chhù.

3Iok-ná-tan kong-kek tī Ka-pa ê Hui-lī-sū -lâng ê kun-iâⁿ; chit-ê siau-sit tī Hui-lī-sū -lâng ê tiong-kan thoân-khui. Sò-lô hoan-hù lâng tī choân-tōe pûn sàu-kak, kiò Hi-pek-lâi -lâng tio̍h chù-ì.

4Í-sek-lia̍t chèng-lâng thiaⁿ-tio̍h Sò-lô kong-kek Hui-lī-sū -lâng ê kun-iâⁿ, koh thiaⁿ-tio̍h Hui-lī-sū -lâng iàm-ò͘ⁿ Í-sek-lia̍t -lâng, jîn-bîn chiū tè Sò-lô chū-chi̍p tī Kiat-kah.

5Hui-lī-sū -lâng chū-chi̍p beh kong-kek Í-sek-lia̍t -lâng; ū chiàn-chhia saⁿ-bān tâi, bé-peng la̍k-chheng, pō͘-peng chhin-chhiūⁿ hái-soa hiah chōe. In chiūⁿ-lâi tī Pek A-bûn tang-pêng ê Bi̍t-boat chat-iâⁿ.

6Í-sek-lia̍t -lâng khòaⁿ-tio̍h kun-tūi siū pau-ûi, chêng-hêng gûi-kip, chiū khì bih tī soaⁿ-tōng, chhiū-nâ, chio̍h-hia̍t, pōng-khang, kap ta-chíⁿ.

7Koh ū chi̍t-kóa lâng kè Iok-tàn-hô kàu Ka-tek kap Ki-lia̍t tōe-khu. Sò-lô iáu tī Kiat-kah; tè i ê lâng lóng kiaⁿ-hiâⁿ phi̍h-phi̍h-chhoah.

8Sò-lô chiàu Sat-bó-ní koat-tēng ê ji̍t-kî, thèng-hāu chhit ji̍t. In-ūi Sat-bó-ní iáu-bē lâi kàu Kiat-kah, tè Sò-lô ê lâng chiū khai-sí sì-sòaⁿ.

9Sò-lô kóng, “Chiong sio-hòa-chè kap pêng-an-chè ê chè-mi̍h the̍h-lâi góa chia.” I chiū hiàn sio-hòa-chè.

10I hiàn sio-hòa-chè tú-á beh oân-sêng, Sat-bó-ní lâi kàu-ūi. Sò-lô chhut-khì gêng-chiap beh kā i chhéng-an.

11Sat-bó-ní kóng, “Lí teh chòe sím-mi̍h tāi-chì?” Sò-lô kóng, “In-ūi góa khòaⁿ-tio̍h jîn-bîn sì-sòaⁿ lī-khui góa, lí mā bô chiàu koat-tēng ê ji̍t-kî lâi, koh Hui-lī-sū -lâng í-keng chū-chi̍p tī Bi̍t-boat;

12só͘-í góa siūⁿ-kóng Hui-lī-sū -lâng teh-beh lâi kàu Kiat-kah kong-kek góa, koh góa iáu-bē kiû Siōng Chú si-un, góa chiah ko͘-put-chiong hiàn sio-hòa-chè.”

13Sat-bó-ní tùi Sò-lô kóng, “Lí ná chiah hô͘-tô͘! Lí bô chun-siú Siōng Chú — lí ê Siōng-tè ài lí siú ê kài-bēng. Lí nā ū siú, Siōng Chú ōe kian-kò͘ lí tī Í-sek-lia̍t tiong ê ông-ūi kàu éng-oán.

14Taⁿ lí ê ông-ūi bōe kú-tn̂g; Siōng Chú í-keng chhē-tio̍h chi̍t ê ha̍p I sim-ì ê lâng, koat-tēng beh hō͘ i chòe I chú-bîn ê léng-siù, in-ūi lí bô chun-siú Siōng Chú ê bēng-lēng.”

15Sat-bó-ní chiū chhut-hoat, tùi Kiat-kah chiūⁿ-khì Piān-ngá-bín tōe-khu ê Ki-pí-a. Sò-lô tiám-sǹg tè i ê lâng, iok ū la̍k-pah lâng.

16Sò-lô kap i ê kiáⁿ Iok-ná-tan, í-ki̍p tè in ê lâng lóng tiàm tī Piān-ngá-bín tōe-khu ê Ka-pa. M̄-kú Hui-lī-sū -lâng tī Bi̍t-boat chat-iâⁿ.

17Ū tu̍t-kek-tūi tùi Hui-lī-sū kun-iâⁿ chhut--lâi, pun-chòe saⁿ tūi, chi̍t tūi tùi Gô-hut-la ê lō͘ khì Su-a-le̍k tōe-khu;

18chi̍t tūi tùi Pek Hô-lûn ê lō͘ khì; koh chi̍t tūi tùi khòaⁿ ōe tio̍h Sé-pho-im Soaⁿ-kok, thàng kàu khòng-iá hit-tiâu pian-kài ê lō͘ khì.

19Hit-sî Í-sek-lia̍t choân-tōe bô phah-thih sai-hū, in-ūi Hui-lī-sū -lâng kiaⁿ Hi-pek-lâi -lâng chè-chō to kap chhiuⁿ.

20Í-sek-lia̍t -lâng beh bôa tî-thâu, lôe, pó͘-thâu, ku̍t-á, lóng tio̍h lo̍h-khì Hui-lī-sū -lâng hia;

21nā beh bôa tî-thâu, lôe, tio̍h nn̄g ê tâng-chîⁿ; bôa pó͘-thâu kap chhì-kùn, tio̍h chi̍t ê tâng-chîⁿ;

22só͘-í kàu kau-chiàn ê sî, tè Sò-lô kap Iok-ná-tan ê lâng bô chi̍t ê chhiú--ni̍h ū to á-sī chhiuⁿ; chí-ū Sò-lô kap i ê kiáⁿ Iok-ná-tan ū.

23Hui-lī-sū -lâng ū phài peng chhut-khì hông-siú Bi̍t-boat ê ài-kháu.

← Chapter 12 Jump to: Chapter 14 →