1 Samuel 19

Chinese TTVR (現代台語譯本羅馬字版)

← Chapter 18 Jump to: Chapter 20 →

1Sò-lô iau-kiû i ê kiáⁿ Iok-ná-tan kap só͘-ū ê koaⁿ-tiúⁿ tio̍h thâi-sí Tāi-pi̍t. M̄-kú Iok-ná-tan chin ì-ài Tāi-pi̍t,

2chiū kā Tāi-pi̍t kóng, “Góa ê lāu-pē siūⁿ-beh thâi lí; lí tio̍h sòe-jī, bîn-á-chá-khí lí khì bih tiàm pì-bi̍t ê só͘-chāi.

3Góa ōe khì iá-gōa lí bih ê só͘-chāi, khiā tī góa ê lāu-pē sin-piⁿ, kap i kóng-khí lí ê tāi-chì; góa nā chai-iáⁿ sím-mi̍h, ōe kā lí kóng.”

4Iok-ná-tan tùi i ê lāu-pē thòe Tāi-pi̍t kóng hó-ōe, kóng, “Chhiáⁿ ông m̄-thang siong-hāi lí ê po̍k-jîn Tāi-pi̍t, in-ūi i m̄-bat siong-hāi lí. I só͘ chòe--ê lóng tùi lí chin ū pang-chān.

5I bat mō͘ sìⁿ-miā ê gûi-hiám, thâi-sí hit-ê Hui-lī-sū -lâng. Siōng Chú ū hō͘ Í-sek-lia̍t -lâng tit-tio̍h tōa sèng-lī; chiah-ê tāi-chì lí lóng chai, mā chin hoaⁿ-hí. Taⁿ sī-án-chóaⁿ ông bô-iân-bô-kò͘ beh thâi Tāi-pi̍t, lâu bû-ko͘ ê lâng ê huih tek-chōe Siōng-tè?”

6Sò-lô thiaⁿ Iok-ná-tan ê ōe, chiū kí éng-oa̍h ê Siōng Chú chiù-chōa, “Góa bōe thâi Tāi-pi̍t.”

7Iok-ná-tan kiò Tāi-pi̍t lâi, chiong che it-chhè ê keng-kè lóng kā i kóng. Iok-ná-tan chhōa Tāi-pi̍t khì kìⁿ Sò-lô; Tāi-pi̍t chiū kè-sio̍k sū-hāu Sò-lô.

8Chiàn-cheng koh po̍k-hoat; Tāi-pi̍t chhut-khì kap Hui-lī-sū -lâng kau-chiàn, kā in thiat-tóe phah-pāi, in chiū tô-cháu.

9Ū chi̍t ji̍t, Sò-lô chē tī chhù-lāi, chhiú--ni̍h gia̍h chhiuⁿ, tùi Siōng Chú hia lâi ê pháiⁿ-sîn koh lîm-kàu i; hit-sî Tāi-pi̍t teh tôaⁿ-khîm.

10Sò-lô ēng chhiuⁿ siā Tāi-pi̍t, beh kā i tèng tī piah--ni̍h; Tāi-pi̍t siám-khui, hit-ki chhiuⁿ chha̍k-ji̍p piah--ni̍h. Hit-mî, Tāi-pi̍t tô-cháu, lī-khui.

11Sò-lô phài lâng khì Tāi-pi̍t ê chhù kàm-sī, àn-sǹg thàu-chá beh kā i thâi. Tāi-pi̍t ê bó͘ Bí-kah tùi i kóng, “Lí kim-àm nā bô tô-miā, bîn-á-chài it-tēng ōe hō͘ lâng thâi-sí.”

12Bí-kah chiū tùi thang-á kā Tāi-pi̍t lūi--lo̍h-khì; i chiū tô-cháu khì bih.

13Bí-kah ēng ka-cho̍k-sîn-siōng hē tī bîn-chhn̂g, ēng soaⁿ-iûⁿ-mn̂g khàm thâu-khak, ēng gōa-saⁿ kā i kah--teh.

14Sò-lô phài lâng khì lia̍h Tāi-pi̍t; Bí-kah kā in kóng, “I teh phòa-pīⁿ.”

15Sò-lô koh phài lâng khì, it-tēng beh khòaⁿ-tio̍h Tāi-pi̍t, kóng, “Liân bîn-chhn̂g sòa kng-lâi góa chia, góa beh hō͘ i sí.”

16Sù-chiá ji̍p--khì, khòaⁿ-tio̍h bîn-chhn̂g ū ka-cho̍k-sîn-siōng, thâu-khak khàm soaⁿ-iûⁿ-mn̂g.

17Sò-lô tùi Bí-kah kóng, “Lí sī-án-chóaⁿ phiàn góa, pàng góa ê tùi-te̍k tô-cháu?” Bí-kah ìn kóng, “I kā góa kóng, ‘Pàng góa cháu. Nā bô, góa beh kā lí thâi-sí.’”

18Tāi-pi̍t tô-cháu, khì La-má kìⁿ Sat-bó-ní, chiong Sò-lô tùi i só͘ chòe ê tāi-chì lóng kā Sat-bó-ní kóng. I kap Sat-bó-ní chiū khì tòa tī Ná-iok.

19Ū lâng kā Sò-lô kóng, “ Tāi-pi̍t tī La-má ê Ná-iok.”

20Sò-lô phài sù-chiá khì lia̍h Tāi-pi̍t; in khòaⁿ-tio̍h Sat-bó-ní chòe thâu chhōa chi̍t tīn sian-ti ji̍p-sîn kóng-ōe, Siōng-tè ê sîn lîm-kàu Sò-lô ê sù-chiá, in mā khai-sí ji̍p-sîn kóng-ōe.

21Ū lâng chiong chit-ê tāi-chì kā Sò-lô kóng, i koh phài sù-chiá khì, in mā ji̍p-sîn kóng-ōe. Sò-lô tē-saⁿ piàn phài sù-chiá khì, in mā ji̍p-sîn kóng-ōe.

22Āu-lâi i pún-sin mā khì La-má, kàu Se-ko͘ ê hit-ê tōa kó͘-chíⁿ hia, mn̄g lâng, “ Sat-bó-ní kap Tāi-pi̍t tī tó-ūi?” Ū lâng kā i kóng, “In tī La-má ê Ná-iok.”

23Sò-lô chiū khì Ná-iok; Siōng-tè ê sîn mā lîm-kàu i; i ná kiâⁿ ná ji̍p-sîn kóng-ōe, it-ti̍t kàu Ná-iok.

24I sīm-chì thǹg-saⁿ, tī Sat-bó-ní ê bīn-chêng ji̍p-sîn kóng-ōe, kui-mî kui-ji̍t thǹg-theh tó--teh. In-ūi án-ni, lâng kóng, “Liân Sò-lô mā teh chòe sian-ti o͘h?”

← Chapter 18 Jump to: Chapter 20 →