1 Samuel 11

Chinese TTVR (現代台語譯本羅馬字版)

← Chapter 10 Jump to: Chapter 12 →

1A-bûn -lâng Ná-hat chiūⁿ-khì ûi-kong Ki-lia̍t ê Ngá-pí. Ngá-pí -lâng kā Ná-hat kóng, “Lí kap goán chhiam-iok, goán chiū ho̍k-sāi lí.”

2A-bûn -lâng Ná-hat ìn kóng, “Hō͘ góa ó͘ lín ta̍k-ê lâng ê chiàⁿ-ba̍k lâi bú-jio̍k Í-sek-lia̍t -lâng, góa chiū kap lín chhiam-iok.”

3Ngá-pí ê tiúⁿ-ló kā i kóng, “Kiû lí khoan-iông goán chhit ji̍t, goán thang phài lâng khì Í-sek-lia̍t choân-kéng; nā bô lâng beh kiù goán, goán chiū tâu-hâng.”

4Só͘ phài ê lâng kàu Sò-lô tòa ê Ki-pí-a, chiong chit-ê siau-sit kóng hō͘ bîn-chiòng thiaⁿ, in chiū lóng tōa-siaⁿ khàu.

5Sò-lô tú tùi hn̂g--ni̍h kóaⁿ gû tò--lâi; Sò-lô kóng, “Tāi-ke sī-án-chóaⁿ teh khàu?” In chiū chiong Ngá-pí -lâng ê tāi-chì kā i kóng.

6Sò-lô thiaⁿ-tio̍h chit-ê siau-sit, siū Siōng-tè ê sîn tōa-tōa chhiong-móa, hui-siông siū-khì.

7I chiū chiong chi̍t tùi gû chhiat-chòe chi̍t-tè chi̍t-tè, kau-tài sù-chiá sàng kàu Í-sek-lia̍t choân-kéng, kéng-kò kóng, “Bô chhut-lâi tè Sò-lô kap Sat-bó-ní ê lâng, in ê gû mā ōe án-ni hō͘ lâng chhiat-chòe chi̍t-tè chi̍t-tè.” Siōng Chú hō͘ jîn-bîn hui-siông kiaⁿ-hiâⁿ, in chiū lóng tâng-sim chhin-chhiūⁿ chi̍t-lâng chhut-lâi èng-chiàn.

8Sò-lô tī Pí-sek tiám-sǹg jîn-sò͘, Í-sek-lia̍t -lâng ū saⁿ-cha̍p-bān, Iû-tāi -lâng ū saⁿ-bān.

9In kā phài--lâi ê lâng kóng, “Lín tio̍h án-ni hôe-ho̍k Ki-lia̍t ê Ngá-pí -lâng, kóng, ‘Bîn-á-chài ji̍t tiong-tàu ê sî, lín ōe tit-tio̍h kái-kiù.’” Phài--lâi ê lâng tńg-khì kā Ngá-pí -lâng kóng, in chiū hui-siông hoaⁿ-hí.

10Ngá-pí -lâng chiū kā A-bûn -lâng kóng, “Bîn-á-chài goán ōe chhut-lâi tâu-hâng, chhut-chāi lín tùi-thāi goán.”

11Keh-ji̍t, Sò-lô kā jîn-bîn pun-chòe saⁿ tūi; thiⁿ teh-beh kng ê sî, in kong-ji̍p A-bûn -lâng ê kun-iâⁿ, it-ti̍t kàu ji̍t tiong-tàu, phah-sí chin chōe lâng; chhun ê lâng lóng sì-sòaⁿ, sûi-lâng tô-miā.

12Jîn-bîn kā Sat-bó-ní kóng, “Sī siáⁿ-lâng kóng ‘ Sò-lô ná ōe-tàng tī-lí lán’? Kā in kau--chhut-lâi, goán beh kā thâi--sí.”

13Sò-lô kóng, “Kin-á-ji̍t chi̍t ê to m̄-thang thâi, in-ūi kin-á-ji̍t Siōng Chú ū chín-kiù Í-sek-lia̍t.”

14Sat-bó-ní kā jîn-bîn kóng, “Lâi, lán lâi-khì Kiat-kah, tī hia chèng-sek khak-li̍p ông-koân.”

15Choân-pō͘ ê jîn-bîn chiū khì Kiat-kah, tī Siōng Chú bīn-chêng siat-li̍p Sò-lô choh-ông, koh hiàn pêng-an-chè hō͘ Siōng Chú. Sò-lô kap Í-sek-lia̍t chèng-lâng hoaⁿ-hí khèng-chiok.

← Chapter 10 Jump to: Chapter 12 →