1 Samuel 14 — Chinese TTVR (現代台語譯本羅馬字版)

1Ū chi̍t ji̍t, Sò-lô ê kiáⁿ Iok-ná-tan kā gia̍h i ê kun-khì ê siàu-liân-lâng kóng, “Lán lâi-khì Hui-lī-sū -lâng ê kun-iâⁿ hit-pêng.” M̄-kú Iok-ná-tan bô kā i ê lāu-pē kóng.

2Sò-lô tī Ki-pí-a ê kau-gōa, chē tī Bí-ki-lûn ê sia̍h-liû chhiū-kha; tè i ê lâng iok ū la̍k-pah.

3Koh ū A-hi-tu̍t ê kiáⁿ A-hi-ngá tòa í-hut-tek lâi tī hia. I sī Í-ka-phok ê hiaⁿ-ko, Hui-nî-hap ê kiáⁿ, sī bat tī Sī-lô chòe Siōng Chú chè-si ê Í-lī ê sun. Bô lâng chai Iok-ná-tan í-keng lī-khui iâⁿ-tōe.

4Iok-ná-tan beh khì Hui-lī-sū ê kun-iâⁿ tio̍h keng-kè ê ài-kháu, nn̄g pêng lóng sī chiam-chiam chin kiā ê chio̍h-piah, chi̍t ê kiò-chòe Pò͘-sih, chi̍t ê kiò-chòe Se-nî;

5pak-pêng ê chio̍h-piah kap Bi̍t-boat sio-tùi, lâm-pêng ê chio̍h-piah kap Ka-pa sio-tùi.

6Iok-ná-tan kā gia̍h i ê kun-khì ê siàu-liân-lâng kóng, “Lâi, lán lâi-khì bô siū kat-lé ê lâng ê kun-iâⁿ hia, khó-lêng Siōng Chú ōe pang-chān lán, in-ūi Siōng Chú hō͘ lâng tek-sèng m̄-sī chāi-tī lâng chōe lâng chió.”

7Gia̍h kun-khì--ê kā i kóng, “Góa kap lí tâng-sim, lí chiàu lí só͘ ài--ê khì chòe; lí chòe chêng, góa tè lí.”

8Iok-ná-tan kóng, “Lâi! Lán kè lâi-khì in hia, hō͘ in khòaⁿ-tio̍h lán;

9in nā kā lán kóng ‘Khiā leh! Tán goán kè--khì’, lán chiū tiāⁿ-tiāⁿ khiā--teh, mài chiūⁿ--khì.

10M̄-kú in nā kóng ‘Lâi goán chia’, lán chiū chiūⁿ--khì; che sī Siōng Chú chiong in kau tī lán ê chhiú ê kì-hō.”

11In nn̄g lâng chiū thiau-kò͘-ì hō͘ Hui-lī-sū hông-siú ê peng khòaⁿ--tio̍h; Hui-lī-sū -lâng kóng, “Lí khòaⁿ, Hi-pek-lâi -lâng tùi in bih ê tōng chhut--lâi lah.”

12Hông-siú ê peng kā Iok-ná-tan kap gia̍h kun-khì ê lâng kóng, “Lín kè--lâi, goán beh hō͘ lín chai-sí.” Iok-ná-tan chiū kā gia̍h kun-khì--ê kóng, “Lí tè góa chiūⁿ--khì; in-ūi Siōng Chú í-keng chiong in kau tī Í-sek-lia̍t -lâng ê chhiú.”

13Iok-ná-tan chiū chhiú-khîⁿ-kha-lèng peh--khí-khì, gia̍h kun-khì--ê tè i. Iok-ná-tan phah-tó Hui-lī-sū -lâng, gia̍h kun-khì--ê tè āu-bīn thâi-sí in.

14Tē-it piàn tu̍t-kek, Iok-ná-tan kap gia̍h kun-khì--ê tī sì-hūn-chi̍t kong-khéng lāi thâi-sí iok jī-cha̍p lâng.

15Só͘-ū ê Hui-lī-sū kun-peng, bô-lūn tī kun-iâⁿ, tī iá-gōa; bô-lūn hông-ōe--ê, tu̍t-kek--ê, lóng kiaⁿ kah phi̍h-phi̍h-chhoah; tāi-tōe mā iô-tāng, che sī Siōng-tè kàng-lo̍h hō͘ in ê tōa khióng-pò͘.

16Tī Piān-ngá-bín tōe-khu ê Ki-pí-a, Sò-lô ê sàu-peng khòaⁿ-tio̍h Hui-lī-sū kun-peng sì-sòaⁿ, sì-kòe loān-chông.

17Sò-lô kā tè i ê kun-peng kóng, “Lín tiám-sǹg, khòaⁿ siáⁿ-lâng tùi lán chia chhut--khì.” In sǹg liáu, chiū chai Iok-ná-tan kap kā i gia̍h kun-khì ê lâng bô tī hia.

18Sò-lô kā A-hi-ngá kóng, “Lí chiong Siōng-tè ê iok-kūi kng--lâi.” Hit-chūn Siōng-tè ê iok-kūi tī Í-sek-lia̍t -lâng hia.

19Sò-lô kap chè-si kóng-ōe ê sî, Hui-lī-sū iâⁿ-tiong hán-hoah ê siaⁿ jú lâi jú tōa. Sò-lô chiū kā chè-si kóng, “Bián lah! Bōe hù mn̄g lo͘h!”

20Sò-lô kap tè i ê kun-peng lóng chū-chi̍p lâi kàu chiàn-tiûⁿ, khòaⁿ-tio̍h Hui-lī-sū -lâng hō͘-siōng chân-sat, tōa hūn-loān.

21Í-chêng óa Hui-lī-sū -lâng, tùi ta̍k só͘-chāi lâi kàu in iâⁿ-tiong ê Hi-pek-lâi -lâng, hiān-chāi hoán-tò-tńg lâi pang-chān tè Sò-lô kap Iok-ná-tan ê Í-sek-lia̍t -lâng.

22Hiah-ê bih tī Í-hoat-liân soaⁿ-khu ê Í-sek-lia̍t -lâng thiaⁿ-tio̍h Hui-lī-sū -lâng tô-cháu, chiū chhut-lâi tui-sat in, kap in kau-chiàn.

23Hit-ji̍t Siōng Chú hō͘ Í-sek-lia̍t tek-sèng; chiàn-cheng iân-sio̍k kàu Pek A-bûn hit-pêng.

24Hit-ji̍t Í-sek-lia̍t -lâng iau kah chin kan-khó͘, in-ūi Sò-lô ū chiù-chōa, bēng-lēng kun-peng kóng, “Bô tán kàu ji̍t àm, góa kā tùi-te̍k pò oan-siû liáu chiū chia̍h mi̍h-kiāⁿ ê lâng tio̍h siū chiù-chó͘.” Só͘-í kun-peng lóng bô chia̍h sím-mi̍h.

25In ji̍p chhiū-nâ, hoat-kiàn chit só͘-chāi thô͘-kha lóng ū bi̍t.

26Kun-peng ji̍p chhiū-nâ, khòaⁿ-tio̍h ū bi̍t teh tih, m̄-kú bô lâng káⁿ ēng chńg-thâu-á uih lâi chia̍h, in-ūi kiaⁿ siū chiù-chó͘.

27Iok-ná-tan bô thiaⁿ-tio̍h in lāu-pē ê chiù-chōa, só͘-í chhun koáiⁿ-á-bé tu̍h bi̍t-pô͘, jiân-āu ēng chńg-thâu-á uih lâi chia̍h, ba̍k-chiu chiū kim, hôe-ho̍k goân-khì.

28Ū chi̍t ê kun-peng tùi i kóng, “Lí ê lāu-pē ū giâm-giâm chiù-chōa bēng-lēng kun-peng kóng, ‘Kin-á-ji̍t chia̍h mi̍h-kiāⁿ--ê tio̍h siū chiù-chó͘.’ Só͘-í kun-peng chin ià-siān.”

29Iok-ná-tan kóng, “Goán lāu-pē ū hāi-tio̍h lán chiah-ê kun-peng. Lín khòaⁿ, góa kan-ta tam chi̍t-tiám-á bi̍t, chiū hôe-ho̍k goân-khì;

30kin-á-ji̍t nā chhut-chāi kun-peng chia̍h in kā tùi-te̍k chhiúⁿ--lâi ê chia̍h-mi̍h, kiám m̄-sī koh-khah ū-la̍t thang phah-sí khah chōe Hui-lī-sū -lâng?”

31Hit-ji̍t, in phah-pāi Hui-lī-sū -lâng, tùi Bi̍t-boat kóaⁿ kàu A-ngá-lûn; kun-peng hui-siông ià-siān.

32Kun-peng chông-khì lia̍h só͘ chhiúⁿ ê gû, iûⁿ, gû-á-kiáⁿ, chiū tī hia thâi, chia̍h kâⁿ-huih ê bah.

33Ū lâng kā Sò-lô pò-kò, “Kun-peng ū hoān-chōe ûi-pōe Siōng Chú, in-ūi in chia̍h kâⁿ-huih ê bah.” Sò-lô tōa-siaⁿ hoah, “Lín tek-chōe Siōng Chú lah! Taⁿ khì kō chi̍t tè tōa chio̍h lâi chia.”

34Sò-lô koh kóng, “Lín tio̍h khì kiò ta̍k-ê kun-peng khan in ê gû kap iûⁿ lâi góa chia, tī chia thâi lâi chia̍h; m̄-thang chia̍h kâⁿ-huih ê bah lâi tek-chōe Siōng Chú.” Hit-mî kun-peng lóng khan in ka-kī ê gû khì hia thâi.

35Sò-lô kā Siōng Chú khí chi̍t chō chè-tôaⁿ; che sī i thâu chi̍t piàn kā Siōng Chú khí ê tôaⁿ.

36Sò-lô kóng, “Taⁿ lán tio̍h thàu-mî lo̍h-khì jip Hui-lī-sū -lâng, kā in chhiúⁿ, ti̍t-kàu thiⁿ-kng, kā in lóng thâi-sí, liân chi̍t ê to m̄-thang lâu--teh.” Kun-peng kóng, “Lí khòaⁿ-chòe hó--ê, chiū chiàu án-ni chòe.” Chè-si kóng, “Lán tio̍h tāi-seng mn̄g Siōng-tè.”

37Sò-lô chiū mn̄g Siōng-tè, “Góa tio̍h lo̍h-khì jip Hui-lī-sū -lâng bô? Lí kiám ōe kā in kau hō͘ Í-sek-lia̍t -lâng?” Hit-ji̍t Siōng-tè bô ìn i.

38Sò-lô kóng, “Lín kun-tūi ê koaⁿ-tiúⁿ lóng lâi góa chia, cha-bêng lán kin-á-ji̍t ū hoān-tio̍h sím-mi̍h chōe.

39Góa kí hō͘ Í-sek-lia̍t sèng-lī ê éng-oa̍h ê Siōng Chú chiù-chōa, ‘Hoān-chōe ê lâng lóng tio̍h sí, sīm-chì góa ê kiáⁿ Iok-ná-tan, mā tio̍h sí.’” M̄-kú bô lâng ìn i.

40I chiū kā Í-sek-lia̍t chèng-lâng kóng, “Lín khiā hit-pêng, góa kap góa ê kiáⁿ Iok-ná-tan khiā chit-pêng.” Kun-peng tùi Sò-lô kóng, “Lí khòaⁿ-chòe hó--ê, chiū chiàu án-ni chòe.”

41Sò-lô tùi Siōng Chú — Í-sek-lia̍t ê Siōng-tè kóng, “Kiû lí chí-sī si̍t-chêng, khòaⁿ siáⁿ-lâng ū chōe.” In chiū thiu-tio̍h Iok-ná-tan kap Sò-lô, kun-peng bô tāi-chì.

42Sò-lô kóng, “Tio̍h tī góa kap góa ê kiáⁿ Iok-ná-tan tiong-kan thiu khòaⁿ siáⁿ-lâng ū chōe.” In thiu-tio̍h Iok-ná-tan.

43Sò-lô kā Iok-ná-tan kóng, “Lí kā góa kóng, lí ū chòe sím-mi̍h tāi-chì.” Iok-ná-tan kóng, “Góa khak-si̍t ū ēng koáiⁿ-á-bé uih chi̍t-tiám-á bi̍t lâi tam. Góa kam-goān sí.”

44Sò-lô kóng, “ Iok-ná-tan, lí it-tēng tio̍h sí; nā bô, goān Siōng-tè ka-pē chek-hoa̍t góa.”

45Kun-peng kā Sò-lô kóng, “ Iok-ná-tan ū hō͘ Í-sek-lia̍t tit-tio̍h tōa sèng-lī, i kiám tio̍h sí? Choa̍t-tùi m̄-thang! Goán kí éng-oa̍h ê Siōng Chú chiù-chōa, i liân chi̍t ki thâu-mn̂g to bōe-ēng-tit hō͘ i lak-lo̍h thô͘-kha, in-ūi i kin-á-ji̍t só͘ chòe--ê ū Siōng-tè ê pang-chān.” Án-ni, kun-peng kiù Iok-ná-tan bián sí.

46Sò-lô bô koh tui-jip Hui-lī-sū -lâng; Hui-lī-sū -lâng chiū tńg-khì in pún só͘-chāi.

47Sò-lô khak-li̍p Í-sek-lia̍t ông-koân liáu-āu, khì kong-táⁿ chiu-ûi só͘-ū ê tùi-te̍k, chiū-sī Mô͘-ap -lâng, A-bûn -lâng, Í-tong -lâng, Hui-lī-sū -lâng, kap Só-pa ê chu-ông; i pek-chiàn-pek-sèng, phah kàu tó-ūi iâⁿ kàu tó-ūi.

48Sò-lô hùn-ióng phah-pāi A-má-le̍k -lâng, kiù Í-sek-lia̍t thoat-lī chhiúⁿ-kiap in ê lâng ê chhiú.

49Sò-lô ê kiáⁿ ū Iok-ná-tan, E̍k-si-úi, Be̍k-ki Su-a; i ū nn̄g ê cha-bó͘-kiáⁿ, tōa--ê kiò-chòe Bí-la, sòe--ê kiò-chòe Bí-kah.

50Sò-lô ê bó͘ kiò-chòe A-hi-loán, sī A-hi-má-su ê cha-bó͘-kiáⁿ; i ê goân-sòe kiò-chòe Ap-nî-ní, sī Sò-lô ê a-chek Nî-ní ê kiáⁿ.

51Sò-lô ê lāu-pē Ki-sū, Ap-nî-ní ê lāu-pē Nî-ní, lóng sī A-pia̍t ê kiáⁿ.

52Sò-lô it-seng siông-siông kap Hui-lī-sū -lâng ū ke̍k-lia̍t ê kau-chiàn; i khòaⁿ-tio̍h kiông-béng ê lâng kap ióng-sū, lóng chio-chi̍p in ka-ji̍p i ê pō͘-tūi.