Deuteronomy 10

Chinese TTVR (現代台語譯本羅馬字版)

← Chapter 9 Jump to: Chapter 11 →

1Hit-sî, Siōng Chú kā góa kóng, “Lí tio̍h phah nn̄g tè kap í-chêng kâng-khoán ê chio̍h-pán, chiūⁿ-soaⁿ lâi góa chia, koh ēng bo̍k-châi chòe chi̍t ê kūi.

2Lí téng-hôe siak-phòa ê chio̍h-pán téng-bīn ê ōe, góa beh koh siá tī chit nn̄g tè chio̍h-pán téng-bīn; lí tio̍h kā in hē tī hit-ê iok-kūi lāi-bīn.”

3Góa chiū ēng kim-ha̍p-hoan-bo̍k chòe chi̍t ê kūi, koh phah nn̄g tè kap í-chêng kâng-khoán ê chio̍h-pán, jiân-āu chhin-chhiú the̍h chit nn̄g tè chio̍h-pán chiūⁿ-soaⁿ.

4Siōng Chú chiong I tī tāi-hōe ê ji̍t, tī soaⁿ-téng ê hé-iām tiong tùi lín kóng ê cha̍p-tiâu-kài, chiàu í-chêng só͘ siá--ê siá tī hit nn̄g tè chio̍h-pán; Siōng Chú chiū chiong chiah-ê kau-tài góa.

5Góa oa̍t-tńg-sin lo̍h-soaⁿ, chiàu Siōng Chú ê bēng-lēng, chiong chio̍h-pán hē tī góa chòe ê iok-kūi lāi-bīn; kàu hiān-chāi iáu tī hia.

6Í-sek-lia̍t -lâng tùi A-kan -lâng ê chúi-chíⁿ hia chhut-hoat, lâi kàu Mô͘-se-la. A-lûn sí tī hia, mā an-chòng tī hia; i ê kiáⁿ Í-lī-a-sat sòa-chiap i tam-jīm chè-si.

7In tùi hia chhut-hoat, keng-kè Kok-ko-tāi, kàu Iok-pa-tha, tī hia ū chin chōe tiâu khoe.

8Hit-sî, Siōng Chú kéng-soán Lī-bī chi-cho̍k kng Siōng Chú ê iok-kūi, khiā tī Siōng Chú ê bīn-chêng ho̍k-sāi I, hōng I ê miâ chiok-hok, ti̍t-kàu kin-á-ji̍t.

9Só͘-í Lī-bī chi-cho̍k tī in tông-pau ê tiong-kan bô pun-tio̍h sán-gia̍p; chiàu Siōng Chú — lín ê Siōng-tè kā in kóng--ê, Siōng Chú chiū-sī in ê sán-gia̍p.

10Góa koh chi̍t piàn tī soaⁿ-téng sì-cha̍p mî-ji̍t; chit-piàn Siōng Chú koh thiaⁿ góa ê khún-kiû, bô kā lín siau-bia̍t.

11Siōng Chú tùi góa kóng, “Lí khí--lâi, chhōa chiah-ê jîn-bîn chìn-chêng, ji̍p-khì chiàm-léng góa tùi in ê lia̍t-chó͘ li̍p-sè beh hō͘ in ê tōe.”

12Í-sek-lia̍t ah, che chiū-sī Siōng Chú — lín ê Siōng-tè tùi lín ê iau-kiû: Chí-ū kèng-ùi Siōng Chú — lín ê Siōng-tè, kiâⁿ I ê tō-lō͘, thiàⁿ I, choân-sim choân-chêng ho̍k-sāi I,

13chun-siú góa kin-á-ji̍t só͘ pan-pò͘ Siōng Chú ê kài-bēng kap kui-lē, hō͘ lín thang tit-tio̍h hok-khì.

14Khòaⁿ leh, thiⁿ kap chì-koân ê thiⁿ, tōe kap tōe-chiūⁿ ê bān-mi̍h, lóng sio̍k Siōng Chú — lín ê Siōng-tè.

15Siōng Chú chí-ū ì-ài lín ê lia̍t-chó͘, thiàⁿ in, tī bān-bîn tiong kéng-soán in ê hō͘-tāi, chiū-sī lín, chhin-chhiūⁿ kin-á-ji̍t án-ni.

16Só͘-í lín tio̍h kā lín ê sim kiâⁿ kat-lé, m̄-thang koh ngī-sim kò͘-chip.

17Siōng Chú — lín ê Siōng-tè sī bān-sîn ê Sîn, bān-chú ê Chú, sī chì-tōa, koân-lêng, thang kiaⁿ-ùi ê Siōng-tè. I bōe khòaⁿ lâng ê sin-hūn tùi-thāi lâng, mā bōe siu hóe-lō͘;

18I ūi-tio̍h ko͘-jî kóaⁿ-hū sin-oan, koh thiàⁿ chhut-gōa-lâng, hō͘ in chia̍h hō͘ in chhēng.

19Lín tio̍h thiàⁿ chhut-gōa-lâng, in-ūi lín mā bat tī Ai-ki̍p -tōe chòe chhut-gōa-lâng.

20Lín tio̍h kèng-ùi Siōng Chú — lín ê Siōng-tè, ho̍k-sāi I, tiong-sêng kun-tè I, hōng I ê miâ chiù-chōa.

21Lín tio̍h chheng-chàn I, I sī lín ê Siōng-tè; lín bat chhin-ba̍k khòaⁿ-tio̍h I ūi-tio̍h lín chòe tōa koh thang-kiaⁿ ê sū.

22Lín ê lia̍t-chó͘ lo̍h-khì Ai-ki̍p ê sî chí-ū chhit-cha̍p lâng, hiān-chāi Siōng Chú — lín ê Siōng-tè hō͘ lín chhin-chhiūⁿ thiⁿ-téng ê chhiⁿ hiah-ni̍h chōe.

← Chapter 9 Jump to: Chapter 11 →