Deuteronomy 21

Chinese TTVR (現代台語譯本羅馬字版)

← Chapter 20 Jump to: Chapter 22 →

1Tī Siōng Chú — lín ê Siōng-tè siúⁿ-sù lín chòe sán-gia̍p ê tōe, nā ū lâng m̄-chai hō͘ siáⁿ-lâng thâi-sí, tó tī iá-gōa,

2lín ê tiúⁿ-ló kap sím-phòaⁿ-koaⁿ tio̍h tùi hit-ê lâng siū-thâi ê só͘-chāi, niû kàu sì-ûi hiah-ê siâⁿ;

3lī-khui si-thé siōng kūn hit-ê siâⁿ ê tiúⁿ-ló, tio̍h tùi gû-kûn chhú chi̍t chiah m̄-bat chòe kang, m̄-bat kòa taⁿ ê sòe-chiah gû-bú;

4hit-ê siâⁿ ê tiúⁿ-ló tio̍h khan hit-chiah gû-bú kàu ū chúi teh lâu, m̄-bat chèng-choh ê soaⁿ-kok, tī hia kòng-tn̄g hit-chiah gû-bú ê ām-kún.

5Lī-bī -lâng ê hō͘-tāi chòe chè-si--ê mā tio̍h lâi hia, in-ūi Siōng Chú — lín ê Siōng-tè ū kéng-soán in lâi ho̍k-sāi I, hōng Siōng Chú ê miâ chiok-hok, chhâi-koat só͘-ū sio-kò kap siong-hāi ê àn-kiāⁿ.

6Lī-khui si-thé siōng kūn hit-ê siâⁿ só͘-ū ê tiúⁿ-ló, tio̍h tī hit-chiah tī soaⁿ-kok tiong ām-kún kòng-tn̄g ê sòe-chiah gû-bú ê téng-bīn sóe-chhiú,

7seng-bêng kóng, “Goán ê chhiú bô lâu chit-ê lâng ê huih, goán ê ba̍k-chiu mā bô khòaⁿ-tio̍h siáⁿ-lâng thâi i.

8Siōng Chú ah, kiû lí sià-bián lí só͘ kái-kiù ê chú-bîn Í-sek-lia̍t, m̄-thang hō͘ goán sêng-tam lâu bû-ko͘ ê lâng ê huih ê chōe.” Án-ni, lâu hit-ê huih ê chōe chiū tit-tio̍h sià-bián.

9Lín chiàu án-ni chòe Siōng Chú khòaⁿ-chòe tio̍h ê sū, chiū ōe tùi lín tiong-kan tû-khì lâu bû-ko͘ ê lâng ê huih ê chōe.

10Lín khì kap tùi-te̍k kau-chiàn, Siōng Chú — lín ê Siōng-tè nā hō͘ lín thâi-iâⁿ, lia̍h in chòe hu-ló͘;

11hit-sî, tī hu-ló͘ ê tiong-kan, nā khòaⁿ-tio̍h bīn-māu hó-khòaⁿ ê lú-chú, chin kah-ì, beh chhōa i chòe bó͘,

12chiū thang chhōa ji̍p-mn̂g; i tio̍h thì thâu-mn̂g, siu chńg-kah,

13thǹg-khì siū-lia̍h ê sî chhēng ê saⁿ, tī lí ê chhù ūi-tio̍h ka-kī ê pē-bú ai-khàu chi̍t ge̍h-ji̍t, jiân-āu lí thang kap i tâng-pâng; lí chiū chòe i ê tiōng-hu, i chòe lí ê bó͘.

14Āu-lâi lí nā bô ài i, tio̍h hō͘ i lī-khui, tit-tio̍h chū-iû; choa̍t-tùi m̄-thang kā i bōe, m̄-thang kā i tòng-chòe lú-pī khoán-thāi; in-ūi lí bat kiông-pek i kap lí kiat-hun.

15Lâng nā ū nn̄g ê bó͘, chi̍t ê i khah ài, chi̍t ê khah bô ài, nn̄g ê lóng ū kā i siⁿ-kiáⁿ; tōa-kiáⁿ sī khah bô ài ê bó͘ siⁿ--ê.

16Pun châi-sán ê sî, m̄-thang chiong khah ài ê bó͘ siⁿ ê kiáⁿ tòng-chòe tōa-kiáⁿ, bô hō͘ khah bô ài ê bó͘ siⁿ ê kiáⁿ chòe tōa-kiáⁿ.

17Tio̍h sêng-jīn khah bô ài ê bó͘ siⁿ ê kiáⁿ chòe tōa-kiáⁿ, chiong só͘-ū ê châi-sán pun siang-hūn hō͘ i; in-ūi i sī lāu-pē ióng-chòng ê sî siⁿ ê thâu-chiūⁿ-kiáⁿ, tōa-kiáⁿ ê bêng-hūn sī i ê.

18Lâng nā ū kiáⁿ ngó͘-ge̍k put-hàu, m̄ thiaⁿ pē-bú ê ōe; in kā i kéng-kài, i iû-goân m̄ thiaⁿ,

19i ê pē-bú tio̍h kā i lia̍h--khí-lâi, thoa-khì hit-ê siâⁿ ê kóng-tiûⁿ kìⁿ tiúⁿ-ló,

20kā hiah-ê tiúⁿ-ló kóng, “Goán chit-ê kiáⁿ ngó͘-ge̍k put-hàu, m̄ thiaⁿ goán ê ōe, tham-chia̍h, hò͘ⁿ-chiú.”

21Hit-ê siâⁿ ê lâng lóng tio̍h ēng chio̍h-thâu kā i tìm-sí; án-ni chiū tùi lín tiong-kan tû-khì chit-khoán siâ-ok ê sū. Í-sek-lia̍t chèng-lâng thiaⁿ--tio̍h chiū ōe kiaⁿ.

22Lâng nā hoān sí-chōe, siū chhú-sí tiàu tī chhâ-kè,

23i ê sin-si m̄-thang tiàu tī chhâ-kè kè-mî, it-tēng tio̍h tī hit-ji̍t kā i bâi-chòng, in-ūi siū tiàu-sí ê lâng sī Siōng-tè chiù-chó͘--ê. M̄-thang kā Siōng Chú — lín ê Siōng-tè siúⁿ-sù lín chòe sán-gia̍p ê tōe phah lâ-sâm.

← Chapter 20 Jump to: Chapter 22 →