Deuteronomy 20

Chinese TTVR (現代台語譯本羅馬字版)

← Chapter 19 Jump to: Chapter 21 →

1Lín chhut-khì kap tùi-te̍k kau-chiàn, khòaⁿ-tio̍h in ê chiàn-bé, chiàn-chhia, í-ki̍p kun-peng pí lín khah chōe, m̄-bián kiaⁿ in, in-ūi chhōa lín chhut Ai-ki̍p -tōe ê Siōng Chú — lín ê Siōng-tè kap lín tông-chāi.

2Lín pâi-tīn ê sî, chè-si tio̍h tī kun-peng ê bīn-chêng soan-pò͘,

3kóng, “ Í-sek-lia̍t -lâng, tio̍h chù-ì thiaⁿ! Kin-á-ji̍t lín beh kap tùi-te̍k kau-chiàn. M̄-bián kiaⁿ, m̄-bián lún, m̄-bián khióng-hông, m̄-thang in-ūi in phi̍h-phi̍h-chhoah,

4in-ūi Siōng Chú — lín ê Siōng-tè ōe kap lín chòe-hé khì, ūi-tio̍h lín kap tùi-te̍k kau-chiàn, hō͘ lín tit-tio̍h sèng-lī.”

5Hiah-ê koaⁿ-tiúⁿ mā tio̍h tùi kun-peng soan-pò͘, kóng, “Nā ū lâng khí sin-chhù iáu-bē kú-hêng hōng-hiàn-lé, i thang tò-khì in tau, chiah bián i sí tī chiàn-tiûⁿ, pa̍t-lâng thòe i hōng-hiàn.

6Nā ū lâng chèng phû-tô, iáu-bē siu-sêng, i thang tò-khì in tau, chiah bián i sí tī chiàn-tiûⁿ, pa̍t-lâng hióng-siū i ê ké-chí.

7Nā ū lâng tēng-hun, iáu-bē chhōa, i thang tò-khì in tau, chiah bián i sí tī chiàn-tiûⁿ, pa̍t-lâng chhōa i ê bī-hun-chhe.”

8Koaⁿ-tiúⁿ tio̍h koh tùi kun-peng soan-pò͘, kóng, “Nā ū lâng kiaⁿ-hiâⁿ khióng-hông, i thang tò-khì in tau, chiah bián i éng-hióng choân-kun ê sū-khì.”

9Koaⁿ-tiúⁿ tùi kun-peng soan-pò͘ liáu-āu, tio̍h chí-phài kun-koaⁿ chòe thâu chhōa kun-peng.

10Lín óa-kūn siâⁿ beh kong-táⁿ ê sî, tio̍h hō͘ siâⁿ-lāi ê chū-bîn ū ki-hōe tâu-hâng.

11In nā chiap-siū, khui siâⁿ-mn̂g, in só͘-ū ê chū-bîn lóng tio̍h chòe khó͘-kang lâi ho̍k-sāi lín.

12In nā m̄ tâu-hâng, beh kap lín kau-chiàn, lín tio̍h kā in ûi-khùn.

13Siōng Chú — lín ê Siōng-tè ōe chiong in kau tī lín ê chhiú, lín tio̍h ēng to thâi-sí in só͘-ū ê ta-po͘-lâng;

14m̄-kú hū-lú, gín-á, cheng-siⁿ, kap siâⁿ-lāi só͘-ū ê mi̍h, lín thang chhiúⁿ-lâi chòe chiàn-lī-phín; lín chhiúⁿ--lâi ê mi̍h, sī Siōng Chú — lín ê Siōng-tè siúⁿ-sù lín--ê, lín thang the̍h-khì chia̍h, the̍h-khì ēng.

15Hiah-ê lī-khui lín chin hn̄g, m̄-sī hù-kūn kok-ka ê siâⁿ, lín tio̍h án-ni tùi-thāi in.

16Hiah-ê tòa tī Siōng Chú — lín ê Siōng-tè siúⁿ-sù lín chòe sán-gia̍p ê tōe ê bîn-cho̍k, só͘-ū ōe chhoán-khùi--ê, lín m̄-thang hō͘ in oa̍h--teh.

17Tio̍h chiàu Siōng Chú — lín ê Siōng-tè ê bēng-lēng, chiong Hek -lâng, A-mô͘-lī -lâng, Ka-lâm -lâng, Pí-lī-sé -lâng, Hi-bī -lâng, Iâ-pò͘-su -lâng, choân-pō͘ siau-bia̍t;

18chiah bián in kà lín chòe ta̍k-khoán khó-ò͘ⁿ ê sū, hō͘ lín o̍h in kèng-pài in ê sîn-bêng, tì-kàu lín tek-chōe Siōng Chú — lín ê Siōng-tè.

19Lín nā ûi-khùn chi̍t ê siâⁿ, ài chin kú chiah ōe kā i kong-phòa, m̄-thang ēng pó͘-thâu chhò ké-chí-chhiū. Lín thang chia̍h in ê ké-chí, m̄-thang kā chhò--khí-lâi, in-ūi iá-gōa ê chhiū-ba̍k m̄-sī lín ê tùi-te̍k.

20M̄-kú lín nā chai-iáⁿ hiah-ê chhiū bōe kiat ōe-chia̍h--tit ê ké-chí, chiū thang kā chhò--khí-lâi, the̍h-lâi chòe kong-siâⁿ ê khì-khū, kong-kek kap lín kau-chiàn ê siâⁿ, ti̍t-kàu kā siâⁿ kong-phòa.

← Chapter 19 Jump to: Chapter 21 →