Deuteronomy 7

Chinese TTVR (現代台語譯本羅馬字版)

← Chapter 6 Jump to: Chapter 8 →

1Siōng Chú — lín ê Siōng-tè ōe chhōa lín ji̍p-khì lín beh chiàm-léng ê tōe, tùi lín ê bīn-chêng chiong chhit ê pí lín khah kiông-tāi ê bîn-cho̍k kóaⁿ-cháu, chiū-sī Hek -lâng, Kek-ka-sat -lâng, A-mô͘-lī -lâng, Ka-lâm -lâng, Pí-lī-sé -lâng, Hi-bī -lâng, Iâ-pò͘-su -lâng.

2Siōng Chú — lín ê Siōng-tè chiong in kau tī lín ê chhiú, hō͘ lín kā in phah-pāi. Hit-sî, lín tio̍h kā in thiat-tóe siau-bia̍t, m̄-thang kap in li̍p-iok, mā m̄-thang chhiú-hā-liû-chêng.

3M̄-thang kap in thong-hun; lín ê cha-bó͘-kiáⁿ m̄-thang kè hō͘ in ê hāu-siⁿ, mā m̄-thang hō͘ lín ê hāu-siⁿ chhōa in ê cha-bó͘-kiáⁿ.

4In-ūi in ōe hō͘ lín ê kiáⁿ-jî oa̍t-cháu bô kèng-pài Siōng Chú, khì ho̍k-sāi pa̍t-ê sîn-bêng, tì-kàu Siōng Chú tùi lín hoat tōa siū-khì, chin kín kā lín siau-bia̍t.

5Só͘-í lín tio̍h án-ni tùi-thāi in: Thiah-húi in ê chè-tôaⁿ, kòng-chhùi in ê chio̍h-thiāu-siōng, chhò-tn̄g in ê A-sià-la lú-sîn ê sîn-siōng, ēng hé sio in tiau-khek ê ngó͘-siōng.

6In-ūi lín sī kui-sio̍k Siōng Chú — lín ê Siōng-tè sèng-kiat ê chú-bîn; Siōng Chú ū tùi tōe-chiūⁿ bān-bîn ê tiong-kan kéng-soán lín, chòe I te̍k-pia̍t ê chú-bîn.

7Siōng Chú thiàⁿ lín, kéng lín, m̄-sī in-ūi lín ê lâng-gia̍h pí pa̍t-cho̍k khah chōe; kî-si̍t lín ê lâng-gia̍h sī bān-cho̍k tiong siōng chió--ê;

8sī in-ūi Siōng Chú thiàⁿ lín, koh beh si̍t-hiān I tùi lín lia̍t-chó͘ li̍p-sè ê èng-ún, I chiah ēng tōa koân-lêng ê chhiú chhōa lín chhut--lâi, kiù-sio̍k lín thoat-lī Ai-ki̍p -ông Hoat-ló ê chhiú, thoat-lī chòe lô͘-châi ê ke.

9Só͘-í lín tio̍h chai, chí-ū Siōng Chú — lín ê Siōng-tè sī Siōng-tè, sī sìn-si̍t ê Siōng-tè; tùi thiàⁿ I, chun-siú I kài-bēng ê lâng, I ōe siú-iok, si chû-ài hō͘ in ti̍t-kàu chheng tāi.

10Só͘-ū kū-choa̍t I ê lâng, I ōe kā in pò-èng, kā in siau-bia̍t; I tùi kū-choa̍t I ê lâng ōe chin kín tng-bīn kā in pò-èng.

11Só͘-í, lín tio̍h chhiat-si̍t chun-hêng góa kin-á-ji̍t só͘ hoan-hù lín ê kài-bēng, kui-lē, bēng-lēng.

12Lín nā chhiat-si̍t chun-hêng chiah-ê bēng-lēng, Siōng Chú — lín ê Siōng-tè chiū ōe siú I tùi lín ê lia̍t-chó͘ li̍p-sè só͘ li̍p ê iok, tùi lín si chû-ài.

13I ōe thiàⁿ lín, sù-hok lín, hō͘ lín heng-ōng; mā ōe tī I tùi lín ê lia̍t-chó͘ li̍p-sè beh siúⁿ-sù lín ê tōe, hō͘ lín siⁿ-thòaⁿ chōe-chōe, koh hō͘ lín thó͘-tōe ê chhut-sán, ngó͘-kok, sin-chiú kap sin-iû, gû-á-kiáⁿ kap iûⁿ-á-kiáⁿ ke-thiⁿ chin chōe.

14Lín tit--tio̍h ê hok-khì ōe chhiau-kè bān-cho̍k; lín ê lâm-lú bô chi̍t ê bōe siⁿ, lín ê cheng-siⁿ bô chi̍t chiah bōe siⁿ-thòaⁿ.

15Siōng Chú ōe hō͘ pīⁿ-thiàⁿ lī-khui lín; lín só͘ chai Ai-ki̍p ta̍k-khoán ê pháiⁿ chèng-thâu, I bōe kàng hō͘ lín, chí-ū ōe kàng hō͘ só͘-ū oàn-hūn lín ê lâng.

16Siōng Chú — lín ê Siōng-tè kau hō͘ lín ê bîn-cho̍k, lín tio̍h lóng kā in siau-bia̍t, m̄-thang tùi in chhiú-hā-liû-chêng; lín m̄-thang ho̍k-sāi in ê sîn-bêng, in-ūi án-ni ōe tì-kàu lín siū chai-lān.

17Lín nā sim-lāi siūⁿ-kóng, “Chiah-ê kok pí goán khah kiông, goán ná ōe-tàng kā in kóaⁿ-cháu?”

18Lín m̄-bián kiaⁿ in; it-tēng tio̍h ōe-kì-tit Siōng Chú — lín ê Siōng-tè tùi Ai-ki̍p -ông kap lóng-chóng ê Ai-ki̍p -lâng só͘ chòe ê sū,

19chiū-sī lín ū chhin-ba̍k khòaⁿ--tio̍h ê tōa chai-lān, sîn-jiah, kî-sū, koh Siōng Chú — lín ê Siōng-tè chhun-chhut tōa khùi-la̍t ê chhiú chhōa lín chhut--lâi; I mā ōe án-ni tùi-thāi lín só͘ kiaⁿ ê bîn-cho̍k.

20Siōng Chú — lín ê Siōng-tè beh kàng un-e̍k tī in tiong-kan, ti̍t-kàu hiah-ê chhun--lo̍h-lâi cháu-khì bih ê lâng tī lín ê bīn-chêng siau-bia̍t.

21Lín m̄-bián kiaⁿ in, in-ūi kap lín tông-chāi ê Siōng Chú — lín ê Siōng-tè, sī úi-tāi koh thang kiaⁿ-ùi ê Siōng-tè.

22Siōng Chú — lín ê Siōng-tè ōe tī lín ê bīn-chêng chiām-chiām chiong chiah-ê bîn-cho̍k kóaⁿ-cháu; lín m̄-thang chin kín kā in siau-bia̍t, chiah bián iá-siù ke-thiⁿ chin chōe soah siong-hāi tio̍h lín.

23Siōng Chú — lín ê Siōng-tè ōe chiong chiah-ê bîn-cho̍k kau tī lín ê chhiú, hō͘ in tōa-kiaⁿ jiáu-loān, ti̍t-kàu in bia̍t-bông;

24koh ōe chiong in hiah-ê ông kau tī lín ê chhiú, hō͘ in tùi sè-kan siau-sit; bô chi̍t ê lâng ōe-tàng tùi-khòng lín, ti̍t-kàu lín kā in siau-bia̍t.

25Lín tio̍h chiong in tiau-khek ê sîn-siōng ēng hé sio-tiāu; m̄-thang tham sîn-siōng sin-chiūⁿ ê kim-gûn, mā m̄-thang the̍h-lâi chòe ka-kī ê, chiah bián lín in-ūi án-ni siū chai-lān; in-ūi chiah-ê sī Siōng Chú — lín ê Siōng-tè só͘ iàm-ò͘ⁿ--ê.

26Jīm-hô ngó͘-siōng, lín lóng m̄-thang tòa-ji̍p lín ê chhù, chiah bián lín kap hiah-ê mi̍h siâng-khoán chiâⁿ-chòe tio̍h húi-bia̍t--ê. Lín tio̍h thiat-tóe iàm-ò͘ⁿ chiah-ê mi̍h, in-ūi chiah-ê sī tio̍h húi-bia̍t--ê.

← Chapter 6 Jump to: Chapter 8 →