Deuteronomy 16

Chinese TTVR (現代台語譯本羅馬字版)

← Chapter 15 Jump to: Chapter 17 →

1Lín tio̍h tī A-pit-ge̍h siú Siōng Chú — lín ê Siōng-tè ê Pôaⁿ-kè-choeh; in-ūi Siōng Chú — lín ê Siōng-tè tī A-pit-ge̍h ê chi̍t ê àm-mî chhōa lín chhut Ai-ki̍p.

2Tio̍h tī Siōng Chú kéng-soán hō͘ lín ho̍k-sāi I ê só͘-chāi, ǹg Siōng Chú — lín ê Siōng-tè hiàn gû kap iûⁿ chòe Pôaⁿ-kè-choeh ê chè-mi̍h.

3Pôaⁿ-kè-choeh ê chia̍h-mi̍h m̄-thang ū kàⁿ. Lín tio̍h chia̍h bô-kàⁿ ê piáⁿ chhit ji̍t, in-ūi lín lī-khui Ai-ki̍p -tōe ê sî chin kóaⁿ-kín, chia̍h--ê sī bô-kàⁿ ê piáⁿ. Chit-chióng piáⁿ mā kiò-chòe khùn-khó͘ ê piáⁿ, lín tio̍h chia̍h, hō͘ lín it-seng kì-liām chhut Ai-ki̍p, thoat-lī khó͘-lān ê ji̍t.

4Tī lín ê kéng-lāi, chhit ji̍t kú ta̍k-ê lâng ê chhù lóng m̄-thang ū kàⁿ; thâu chi̍t ji̍t ē-hng só͘ hiàn ê chè-bah, m̄-thang lâu kàu thiⁿ-kng.

5Lín m̄-thang tī Siōng Chú — lín ê Siōng-tè siúⁿ-sù lín jīm-hô chi̍t ê siâⁿ hiàn Pôaⁿ-kè-choeh ê chè,

6chí-ū thang tī Siōng Chú — lín ê Siōng-tè kéng-soán hō͘ lín ho̍k-sāi I ê só͘-chāi hiàn; tio̍h tī ji̍t lo̍h ê sî hiàn, in-ūi lín tī ji̍t lo̍h ê sî chhut Ai-ki̍p.

7Tio̍h tī Siōng Chú — lín ê Siōng-tè kéng-soán ê só͘-chāi hang lâi chia̍h; keh-chá-khí chiah tò-khì lín tau.

8Lín tio̍h chia̍h bô-kàⁿ-piáⁿ la̍k ji̍t; tē-chhit ji̍t kú-hêng giâm-siok-hōe kèng-pài Siōng Chú — lín ê Siōng-tè, m̄-thang chòe kang.

9Lín tio̍h tùi ēng liâm-le̍k-á siu-koah ê ji̍t khai-sí, sǹg chhit ê chhit ji̍t,

10siú Chhit-chhit Siu-koah-choeh kèng-pài Siōng Chú — lín ê Siōng-tè, chiàu I sù-hok hō͘ lín ê siu-sêng, kam-sim hiàn lé-mi̍h hō͘ I.

11Lín kap lín ê kiáⁿ, cha-bó͘-kiáⁿ, lô͘-po̍k, lú-pī, kap tòa tī lín tiong-kan ê Lī-bī -lâng, kap gōa-cho̍k-lâng, í-ki̍p ko͘-jî, kóaⁿ-hū, lóng tio̍h tī Siōng Chú — lín ê Siōng-tè kéng-soán hō͘ lín ho̍k-sāi I ê só͘-chāi, tī I ê bīn-chêng chòe-hé khèng-chiok.

12Lín tio̍h ōe-kì-tit lín bat tī Ai-ki̍p chòe lô͘-châi; lín tio̍h chun-hêng chiah-ê kui-lē.

13Lín siu-khǹg ngó͘-kok kap sin-chiú liáu-āu, tio̍h siú Tah-liâu-choeh chhit ji̍t.

14Tī choeh-kî tiong, lín kap lín ê kiáⁿ, cha-bó͘-kiáⁿ, lô͘-po̍k, lú-pī, kap tòa tī lín tiong-kan ê Lī-bī -lâng, gōa-cho̍k-lâng, í-ki̍p ko͘-jî, kóaⁿ-hū, lóng tio̍h chòe-hé khèng-chiok.

15Lín tio̍h tī Siōng Chú kéng-soán ê só͘-chāi, siú-choeh chhit ji̍t kèng-pài I. Tio̍h hoaⁿ-hí siú-choeh, in-ūi Siōng Chú — lín ê Siōng-tè ū sù-hok lín, hō͘ lín hong-siu, sū-sū sūn-lī.

16Lín só͘-ū ê ta-po͘-lâng lóng tio̍h chi̍t nî saⁿ piàn, tī Tû-kàⁿ-choeh, Chhit-chhit Siu-koah-choeh, Tah-liâu-choeh, kàu Siōng Chú — lín ê Siōng-tè kéng-soán ê só͘-chāi kèng-pài I; m̄-thang khang-chhiú kìⁿ Siōng Chú.

17Ta̍k-ê lâng tio̍h chiàu Siōng Chú — lín ê Siōng-tè siúⁿ-sù lín ê hok-hūn, chīn ka-kī ê khùi-la̍t hōng-hiàn.

18Lín tio̍h tī Siōng Chú — lín ê Siōng-tè siúⁿ-sù lín khiā-khí ê siâⁿ, ūi-tio̍h ta̍k chi-cho̍k jīm-bēng sím-phòaⁿ-koaⁿ kap koaⁿ-oân; in tio̍h chiàu kong-gī sím-phòaⁿ jîn-bîn.

19Lín sím-phòaⁿ m̄-thang tian-tò sī-hui, m̄-thang phian-thán, mā m̄-thang chiap-siū hóe-lō͘; in-ūi hóe-lō͘ ōe hō͘ tì-hūi ê lâng pìⁿ-chòe chhiⁿ-mî, koh ōe oai-khiok chèng-ti̍t ê lâng ê chèng-sû.

20Lín tio̍h tui-kiû kong-pêng chèng-gī, hō͘ lín tī Siōng Chú — lín ê Siōng-tè siúⁿ-sù lín chòe sán-gia̍p ê tōe kú-tn̂g khiā-khí.

21Lín ūi Siōng Chú — lín ê Siōng-tè khí chè-tôaⁿ, m̄-thang tī piⁿ--á chhāi A-sià-la lú-sîn ê thiāu-siōng;

22mā m̄-thang chhāi chio̍h-thiāu-siōng; chiah-ê lóng sī Siōng Chú — lín ê Siōng-tè thòng-hūn iàm-ò͘ⁿ--ê.

← Chapter 15 Jump to: Chapter 17 →