Deuteronomy 33

Chinese TTVR (現代台語譯本羅馬字版)

← Chapter 32 Jump to: Chapter 34 →

1Siōng-tè tiōng-iōng ê lâng Mô͘-se beh sí í-chêng, kā Í-sek-lia̍t -lâng chiok-hok. Chiok-hok ê ōe kì tī ē-bīn:

2Siōng Chú tùi Se-nāi-soaⁿ lâi, chhin-chhiūⁿ ji̍t-thâu tùi Í-tong khí--lâi, tùi Pa-lân-soaⁿ chiò-kng; I chhōa chheng-chheng-bān-bān thiⁿ-sài lâi, chiàⁿ-chhiú the̍h hoat-kng ê lu̍t-hoat hō͘ in.

3Siōng Chú si̍t-chāi thiàⁿ bān-bîn, koàn-kò͘ I sèng ê chú-bîn. In chē tī lí ê kha-ē, thiaⁿ-siū lí ê kà-sī.

4Mô͘-se ēng lu̍t-hoat thoân hō͘ lán, chòe Ngá-kok hōe-chiòng pó-kùi ê sán-gia̍p.

5Siōng Chú choh-ông thóng-tī Í-sek-lia̍t, jîn-bîn ê léng-siù kap Í-sek-lia̍t chèng chi-cho̍k chū-chi̍p khèng-chiok.

6Lū-piān chi-cho̍k sui-jiân lâng-gia̍h chió, goān in kè-sio̍k seng-chûn bô toān-choa̍t.

7Koan-hē Iû-tāi, i kóng: Goān Siōng Chú thiaⁿ Iû-tāi ê kî-kiû, chhōa in kap pa̍t-ê chi-cho̍k têng-sin liân-ha̍p; in ūi ka-kī kau-chiàn, goān lí pang-chān in phah-pāi tùi-te̍k.

8Koan-hē Lī-bī, i kóng: Goān Siōng Chú chiong Thó͘-bêng sù hō͘ Lī-bī, chiong O͘-lêng sù hō͘ tùi lí tiong-sêng ê lâng; lí tī Má-sat khó-giām in, tī Bí-lī-pa chúi-chôaⁿ kap in cheng-lūn.

9In tiong-sêng chun-hêng lí ê ōe, kian-siú lí ê iok, chhiau-kè khòaⁿ-kò͘ pē-bú, tiōng-sī hiaⁿ-tī chí-bē, chiàu-kò͘ kiáⁿ-jî.

10In beh ēng lí ê kui-lē kà-sī Ngá-kok, ēng lí ê lu̍t-hoat kà-sī Í-sek-lia̍t; in beh tī lí ê bīn-chêng sio-hiuⁿ kèng-pài, tī chè-tôaⁿ hiàn kui-chiah cheng-siⁿ chòe sio-hòa-chè.

11Goān Siōng Chú sù-hok in ê sán-gia̍p, chiap-la̍p in ê chhiú só͘ chòe ê kang-chok; hiah-ê khí-lâi kong-kek in, oàn-hūn in ê lâng, goān lí phah-tn̄g in ê io, hō͘ in bōe-tàng koh khí--lâi.

12Koan-hē Piān-ngá-bín, i kóng: Goān Siōng Chú hō͘ I só͘ thiàⁿ--ê tī I ê sin-piⁿ an-jiân khiā-khí; Siōng Chú kui-ji̍t pó-hō͘ in, hō͘ in tī I ê heng-chêng hióng-siū an-hioh.

13Koan-hē Iok-sek, i kóng: Goān in ê thó͘-tōe tit-tio̍h Siōng Chú sù-hok, tit-tio̍h thiⁿ-téng ê kam-lō͘, tōe-ē ê chúi-chôaⁿ;

14goān in tùi ji̍t-thâu tit-tio̍h hong-siu, tùi ge̍h-niû siu-sêng thó͘-sán,

15tùi kó͘-chá chiū ū ê soaⁿ tit-tio̍h pó-mi̍h, tùi éng-oán khiā-chāi ê soaⁿ-niá tit-tio̍h pó-pòe;

16goān in tit-tio̍h thó͘-tōe kap chhut-sán ê pó-mi̍h, í-ki̍p lîm-chāi tī chhì-phè ê Siōng Chú ê un-hūi. Goān chiah-ê lóng sù hō͘ Iok-sek, kui tī hiaⁿ-tī tiong siū kéng-soán chòe léng-siù ê Iok-sek.

17Goān i chhin-chhiūⁿ thâu-chiūⁿ-siⁿ ê gû-káng, ū tōa ui-giâm; i nn̄g ki kak chhin-chhiūⁿ iá-gû ê kak, chiong bān-kok tak kàu thiⁿ-piⁿ-hái-kak; chit nn̄g ki kak sī Í-hoat-liân bān-bān ê cheng-peng, kap Má-ná-se chheng-chheng ê ióng-sū.

18Koan-hē Se-pò͘-lûn, i kóng: Goān Se-pò͘-lûn hoaⁿ-hí chhut-gōa; goān Í-sat-ka khoài-lo̍k tiàm chhù-lāi.

19In beh tiàu-chi̍p bān-cho̍k lâi soaⁿ--ni̍h, tī hia hiàn kong-gī ê chè; in beh khip-siu hái--ni̍h hong-hù ê chu-goân, kap chhàng tī soa--ni̍h ê pó-pòe.

20Koan-hē Ka-tek, i kóng: Tio̍h chheng-chàn khok-tián Ka-tek léng-thó͘ ê Siōng Chú! Goān Ka-tek chhin-chhiūⁿ bih--teh ê sai-bú, thiah-li̍h la̍h-bu̍t ê chêng-thúi kap thâu-khak.

21I ūi ka-kī soán-te̍k siōng-hó ê thó͘-tōe, sī chiáng-koân-chiá ê hūn-gia̍h; i kap Í-sek-lia̍t ê léng-siù chòe-hé, si̍t-hêng Siōng Chú ê kong-gī, chip-hêng Siōng Chú ūi Í-sek-lia̍t só͘ chòe ê phòaⁿ-toàn.

22Koan-hē Tān, i kóng: Tān sī siàu-chòng ê sai, tùi Pa-san thiàu--chhut-lâi.

23Koan-hē Ná-hut-tha-lī, i kóng: Ná-hut-tha-lī, lí tit-tio̍h chhiong-chiok ê un-hūi, tit-tio̍h Siōng Chú móa-móa ê sù-hok; goān lí tit-tio̍h sai-pêng kap lâm-pêng ê tōe.

24Koan-hē A-siat, i kóng: A-siat sī Siōng Chú siōng chiok-hok ê kiáⁿ-jî; goān i tit-tio̍h hiaⁿ-tī ê hoaⁿ-hí, kaⁿ-ná-iû im i ê kha-ba̍k.

25Lí siâⁿ-mn̂g ê chhòaⁿ sī thih--ê, tâng--ê; lí ōe kú-tn̂g hióng-siū thài-pêng.

26Í-sek-lia̍t ah, bô chi̍t ê ōe-tàng kap Siōng-tè pí; I tùi thiⁿ-téng pang-chān lí, I chē hûn hián-chhut I ê êng-kng.

27Tùi kó͘-chá chiū ū ê Siōng-tè sī pī-lān-só͘, I ê chhiú éng-oán hû-chhî lí; I tī lí ê bīn-chêng chiong tùi-te̍k kóaⁿ--chhut-khì, koh kóng, “Kā in siau-bia̍t!”

28Í-sek-lia̍t thang hióng-siū thài-pêng, Ngá-kok ê hō͘-tāi tòa tī chhut-sán ngó͘-kok kap sin-chiú ê tōe; thiⁿ mā kàng-lo̍h lō͘-chúi hō͘ i.

29Í-sek-lia̍t, lí chin ū hok-khì! Lí sī Siōng Chú chín-kiù ê chú-bîn, ū tó chi̍t ê bîn-cho̍k chhin-chhiūⁿ lí? I sī pó-hō͘ lí ê tún-pâi, sī lí tek-sèng ê to-kiàm; lí beh cheng-ho̍k tùi-te̍k, beh ta̍h in ê ka-chiah-phiaⁿ.

← Chapter 32 Jump to: Chapter 34 →