Deuteronomy 6

Chinese TTVR (現代台語譯本羅馬字版)

← Chapter 5 Jump to: Chapter 7 →

1Ē-bīn sī Siōng Chú — lín ê Siōng-tè hoan-hù góa tio̍h kà-sī lín ê kài-bēng, kui-lē, bēng-lēng, hō͘ lín tī beh khì chiàm-léng ê tōe chun-hêng,

2thang hō͘ lín kap lín ê kiáⁿ-kiáⁿ-sun-sun it-seng kèng-ùi Siōng Chú — lín ê Siōng-tè, chun-siú góa só͘ bēng-lēng it-chhè ê kui-lē kap kài-bēng, hō͘ lín tn̂g-hè-siū.

3Í-sek-lia̍t ah, tio̍h chù-ì thiaⁿ, tio̍h chhiat-si̍t chun-hêng, hō͘ lín thang chiàu Siōng Chú — lín lia̍t-chó͘ ê Siōng-tè ê èng-ún, tī lâu lin kap bi̍t ê tōe tit-tio̍h hok-khì, lâng-gia̍h ke-thiⁿ chin chōe.

4Í-sek-lia̍t ah, tio̍h chù-ì thiaⁿ, Siōng Chú — lán ê Siōng-tè sī to̍k-it ê Siōng Chú.

5Lín tio̍h choân-sim, choân-chêng, choân-le̍k thiàⁿ Siōng Chú — lín ê Siōng-tè.

6Góa kin-á-ji̍t bēng-lēng lín chiah-ê ōe tio̍h kì tī sim-lāi,

7mā tio̍h un-khûn kà-sī lín ê kiáⁿ-jî. Bô-lūn tī chhù-lāi chē, tī lō͘--ni̍h kiâⁿ, tó--teh á-sī khí--lâi, lóng tio̍h liām hō͘ in thiaⁿ;

8koh tio̍h pa̍k tī chhiú--ni̍h chòe kì-hō, pa̍k tī thâu-hia̍h thê-chhíⁿ;

9tio̍h siá tī chhù ê mn̂g-khiā, mā tio̍h siá tī siâⁿ-mn̂g.

10Siōng Chú — lín ê Siōng-tè beh chhōa lín chìn-ji̍p I tùi lín ê lia̍t-chó͘, A-pek-la-hán, Í-sat, Ngá-kok, li̍p-sè beh hō͘ lín ê tōe; tī hia ū khoah-tōa koh súi ê siâⁿ, m̄-sī lín khí-chō--ê;

11ū chhù tóe chin chōe hó-mi̍h, m̄-sī lín chek-chū--ê; ū ó͘ hó-sè ê chúi-chíⁿ, m̄-sī lín ó͘--ê; ū phû-tô-hn̂g, kaⁿ-ná-chhiū, m̄-sī lín chai-chèng--ê. Kàu lín ta̍k-hāng hù-chiok ê sî,

12tio̍h kín-sīn, chiah bián lín bōe-kì-tit chhōa lín tùi Ai-ki̍p -tōe, tùi chòe lô͘-châi ê ke chhut--lâi ê Siōng Chú.

13Lín kan-ta tio̍h kèng-ùi Siōng Chú — lín ê Siōng-tè, ho̍k-sāi I, hōng I ê miâ chiù-chōa;

14m̄-thang pài pa̍t-ê sîn-bêng, chiū-sī lín sì-ûi ê gōa-cho̍k teh pài ê sîn-bêng,

15chiah bián Siōng Chú — lín ê Siōng-tè tùi lín hoat tōa siū-khì, kā lín tùi tōe-chiūⁿ siau-bia̍t, in-ūi kap lín tông-chāi ê Siōng Chú — lín ê Siōng-tè, sī iau-kiû choân-chêng ho̍k-sāi I ê Siōng-tè.

16Lín m̄-thang chhì-thàm Siōng Chú — lín ê Siōng-tè, chhin-chhiūⁿ lín bat tī Má-sat chhì-thàm I chi̍t-iūⁿ.

17Tio̍h khak-si̍t chun-siú Siōng Chú — lín ê Siōng-tè ê kài-bēng, kap I bēng-lēng lín ê kà-sī, kui-lē.

18Siōng Chú khòaⁿ-chòe chèng-ti̍t, khòaⁿ-chòe hó--ê, lín tio̍h si̍t-hêng; lín chiū ōe sū-sū sūn-lī, koh ji̍p-khì chiàm-léng Siōng Chú li̍p-sè beh hō͘ lín ê lia̍t-chó͘ súi ê tōe;

19lín mā tio̍h chiàu Siōng Chú ê èng-ún chiong lín só͘-ū ê tùi-te̍k kóaⁿ--chhut-khì.

20Chiong-lâi lín ê kiáⁿ-sun mn̄g lín kóng, “Siōng Chú — lán ê Siōng-tè só͘ bēng-lēng lín chiah-ê kà-sī, kui-lē, bēng-lēng sī sím-mi̍h ì-sù?”

21Lín tio̍h kā lín ê kiáⁿ-sun án-ni kóng, “Chá-chêng goán tī Ai-ki̍p chòe Ai-ki̍p -ông ê lô͘-châi, Siōng Chú ēng tōa khùi-la̍t ê chhiú chhōa goán chhut Ai-ki̍p.

22Siōng Chú tī goán ê ba̍k-chiu chêng kiâⁿ tōa koh lī-hāi ê sîn-jiah kî-sū, tùi-hù Ai-ki̍p -lâng, Hoat-ló kap i ê choân-ke,

23chhōa goán tùi hia chhut--lâi, hō͘ goán ji̍p-khì Siōng Chú tùi lán ê lia̍t-chó͘ li̍p-sè beh siúⁿ-sù lán ê tōe.

24Siōng Chú hoan-hù lán, tio̍h chun-hêng chiah-ê só͘-ū ê kui-lē, tio̍h kèng-ùi Siōng Chú — lán ê Siōng-tè, hō͘ lán it-seng sū-sū sūn-lī, tit-tio̍h I pó-choân lán ê sìⁿ-miā, chhin-chhiūⁿ kin-á-ji̍t án-ni.

25Lán nā chiàu Siōng Chú — lán ê Siōng-tè ê hoan-hù, tī I ê bīn-chêng chun-hêng I it-chhè ê kài-bēng, I ōe hoaⁿ-hí chiap-la̍p lán.”

← Chapter 5 Jump to: Chapter 7 →