Deuteronomy 28 — Chinese TTVR (現代台語譯本羅馬字版)

1Lín nā chin-chiàⁿ thiaⁿ-thàn Siōng Chú — lín ê Siōng-tè ê ōe, chun-hêng góa kin-á-ji̍t só͘ bēng-lēng lín I it-chhè ê kài-bēng, Siōng Chú — lín ê Siōng-tè beh hō͘ lín pí thiⁿ-ē bān-kok koh-khah kiông-sēng.

7Hiah-ê kong-kek lín ê tùi-te̍k, Siōng Chú beh hō͘ lín kā in phah-pāi; in tùi chi̍t tiâu lō͘ lâi kong-kek, beh tī lín ê bīn-chêng tùi chhit tiâu lō͘ tô-cháu.

8Siōng Chú beh hō͘ lín ê chhek-chhng móa-móa, sū-sū heng-thong. Siōng Chú — lín ê Siōng-tè beh tī siúⁿ-sù lín ê tōe sù-hok lín.

9Lín nā chun-siú Siōng Chú — lín ê Siōng-tè ê kài-bēng, kiâⁿ I ê tō-lō͘, Siōng Chú beh chiàu I tùi lín li̍p-sè--ê, siat-li̍p lín chòe I sèng-kiat ê chú-bîn;

10thiⁿ-ē bān-cho̍k khòaⁿ-kìⁿ lín sio̍k tī Siōng Chú, chiū ōe kiaⁿ-ùi lín.

11Siōng Chú beh tī I tùi lín lia̍t-chó͘ li̍p-sè siúⁿ-sù lín ê tōe, hō͘ lín só͘ siⁿ--ê, cheng-siⁿ siⁿ--ê, thó͘-tōe chhut-sán--ê, chhiong-chiok ū-chhun.

12Siōng Chú beh kā lín khui I thiⁿ-téng ê pó-khò͘, chiàu kùi-choeh lo̍h-hō͘ hō͘ lín ê thó͘-tōe, hō͘ lín sū-sū heng-thong; lín beh chioh hō͘ chin chōe kok, m̄-kú m̄-bián kā lâng chioh.

13Lín nā thiaⁿ-thàn góa kin-á-ji̍t só͘ bēng-lēng lín Siōng Chú — lín ê Siōng-tè ê kài-bēng, chhiat-si̍t chun-hêng, bô phian-chó-phian-iū, lī-khui góa só͘ bēng-lēng lín chiah-ê ōe, khì ho̍k-sāi pa̍t-ê sîn-bêng, Siōng Chú chiū beh hō͘ lín tī lia̍t-kok tiong choh-thâu, bô siū chi-phòe.

15Lín nā bô thiaⁿ-thàn Siōng Chú — lín ê Siōng-tè ê ōe, bô chhiat-si̍t chun-hêng góa kin-á-ji̍t só͘ bēng-lēng lín I it-chhè ê kài-bēng kap kui-lē, chiah-ê chiù-chó͘ chiū ōe chin kín lîm-kàu lín:

16Lín tī siâⁿ-tìn, tī hiong-chhoan, ōe siū chiù-chó͘.

17Lín ê nâ-á kap chhiau mī-hún ê phûn, ōe siū chiù-chó͘.

18Lín só͘ siⁿ--ê, thó͘-tōe chhut-sán--ê, í-ki̍p gû-á-kiáⁿ, iûⁿ-á-kiáⁿ, lóng ōe siū chiù-chó͘.

19Lín chhut, lín ji̍p, lóng ōe siū chiù-chó͘.

20In-ūi lín chòe pháiⁿ khì-sak góa, Siōng Chú beh hō͘ lín só͘ chòe ê sū siū chiù-chó͘, jiáu-loān, chek-hoa̍t, ti̍t-kàu lín chin kín oân-choân siū húi-bia̍t.

21Siōng Chú beh hō͘ un-e̍k khó͘-chhó͘ lín, tī lín ji̍p-khì sêng-chiap ê tōe kā lín siau-bia̍t.

22Siōng Chú beh ēng hì-lô, jia̍t-pīⁿ, hoat-iām, to̍k-jia̍t, khòng-hān, hé-sio-hong, pīⁿ-hāi kong-kek lín; chiah-ê lóng ōe tui-jip lín, ti̍t-kàu lín bia̍t-bông.

23Lín thâu-khak téng ê thiⁿ ōe pìⁿ-chòe tâng bōe lo̍h-hō͘, kha-ē ê tōe ōe pìⁿ-chòe thih hiah-ni̍h tēng.

24Siōng Chú beh hō͘ thô͘-soa-hún tāi-thòe hō͘-chúi, lo̍h tī lín sin-chiūⁿ, ti̍t-kàu I kā lín siau-bia̍t.

25Siōng Chú beh hō͘ lín tī tùi-te̍k ê bīn-chêng thâi-su; lín tùi chi̍t tiâu lō͘ chhut-khì kong-kek in, ōe tùi chhit tiâu lō͘ tô-cháu; thiⁿ-ē bān-kok khòaⁿ-tio̍h lín ê chêng-hêng ōe tio̍h-kiaⁿ.

26Lín ê sin-si ōe chiâⁿ-chòe khong-tiong pe-chiáu kap tōe-chiūⁿ cháu-siù ê chia̍h-mi̍h, bô lâng kā in kóaⁿ-cháu.

27Siōng Chú ōe hō͘ lín chhin-chhiūⁿ chá-chêng Ai-ki̍p -lâng siⁿ-chhng, koh siⁿ tī-chhng, sip-chín, sián, bōe-i--tit.

28Siōng Chú ōe hō͘ lín lia̍h-kông, chhiⁿ-mî, tio̍h-kiaⁿ.

29Lín tī ji̍t tiong-tàu, ōe chhin-chhiūⁿ sit-bêng ê lâng tī o͘-àm tiong bong-lâi-bong-khì; lín chòe ê sū bōe heng-thong, siông-siông siū ap-pek, siū chhiúⁿ-toa̍t, bô lâng kiù lín.

30Lín kap cha-bó͘ gín-á tēng-hun, pa̍t-lâng ōe kap i chòe-hé khùn; lín khí-chhù, bô thang tòa; lín chai-chèng phû-tô-hn̂g, mā bô thang chia̍h hiah-ê ké-chí.

31Lín ê gû tī lín ê bīn-chêng hō͘ lâng thâi-sí, m̄-kú lín chia̍h bōe tio̍h bah; lín ê lû tī lín ê bīn-chêng hō͘ lâng chhiúⁿ--khì, koh thó bōe tńg--lâi; lín ê iûⁿ hō͘ lâng lia̍h--khì, bô lâng pang-chān lín.

32Lín ê kiáⁿ cha-bó͘-kiáⁿ ōe tī lín ê bīn-chêng hō͘ pa̍t-cho̍k lia̍h--khì; lín ê ba̍k-chiu kui-ji̍t kim-kim khòaⁿ, tán in tńg--lâi, m̄-kú lín bû-lêng-ûi-le̍k.

33Lín ê thó͘-sán, kap lín lô-khó͘ tit--tio̍h-ê, ōe hō͘ lín m̄-bat ê bîn-cho̍k chia̍h-liáu-liáu. Lín ōe siông-siông hō͘ lâng khi-hū, siū ap-chè,

34ti̍t-kàu lín in-ūi tú--tio̍h ê kéng-hóng lia̍h-kông.

35Siōng Chú ōe hō͘ lín tùi kha-tóe, kha-thâu-u, kha-thúi, kàu thâu-khak téng, jiám-tio̍h bōe-i--tit ê to̍k-chhng.

36Siōng Chú ōe chiong lín kap lín só͘ siat-li̍p koán-hat lín ê ông, chhian-sóa khì lín kap lín ê lia̍t-chó͘ m̄-bat ê kok-ka; tī hia lín beh ho̍k-sāi pa̍t-ê sîn-bêng, sī ēng chhâ kap chio̍h-thâu chō--ê.

37Lín tī Siōng Chú kóaⁿ lín khì ê lia̍t-kok tiong, lâng ōe chiong lín tòng-chòe chhiàu-tâm, kā lín thí-chhiò, koh in-ūi lín tú--tio̍h ê chêng-hêng tio̍h-kiaⁿ.

38Lín tī hn̂g--ni̍h iā chin chōe chéng-chí, m̄-kú siu-sêng chin chió, in-ūi chháu-meh lâi chia̍h.

39Lín chai-chèng koh siu-chéng phû-tô-hn̂g, m̄-kú bô chiú thang lim, bô ké-chí thang bán, in-ūi thâng lâi chia̍h.

40Lín choân-kok chèng kaⁿ-ná-chhiū, m̄-kú bô iû thang boah seng-khu, in-ūi kaⁿ-ná lak-liáu-liáu.

41Lín ê kiáⁿ cha-bó͘-kiáⁿ bōe-tàng lâu tī seng-khu piⁿ, in-ūi in ōe hō͘ lâng lia̍h--khì.

42Lín ê chhiū-ba̍k kap thó͘-tōe ê chhut-sán, ōe hō͘ chháu-meh chia̍h-liáu-liáu.

43Tòa tī lín tiong-kan ê gōa-cho̍k-lâng ōe jú lâi jú chun-kùi, lín ōe jú lâi jú pi-bî;

44in ū thang chioh lín, lín bô thang chioh in; in ōe choh-thâu koán lín, lín ōe choh-bé.

45Chiah-ê chiù-chó͘ lóng ōe lîm-kàu lín, tui-jip lín, kā lín lia̍h-tiâu-tiâu, ti̍t-kàu lín bia̍t-bông, in-ūi lín bô thiaⁿ-thàn Siōng Chú — lín ê Siōng-tè ê ōe, bô siú I só͘ bēng-lēng lín ê kài-bēng kap kui-lē.

46Chiah-ê chiù-chó͘ ōe lîm-kàu lín kap lín ê hō͘-tāi, éng-oán chiâⁿ-chòe kì-hō kap kéng-kài.

47Lín bô tī ta̍k-hāng hù-jū ê sî, kam-sim lo̍k-ì ho̍k-sāi Siōng Chú — lín ê Siōng-tè,

48só͘-í lín ōe chòe Siōng Chú chhe-lâi kong-kek lín ê tùi-te̍k ê lô͘-lē, tì-kàu iau-gō, chhùi-ta, thǹg-theh, it-bû-só͘-iú. In ōe ēng thih ê taⁿ kòa tī lín ê ām-kún, ti̍t-kàu lín bia̍t-bông.

49Siōng Chú beh tùi chin hn̄g ê só͘-chāi heng-khí chi̍t kok, chhin-chhiūⁿ eng-chiáu chin kín chhiong lo̍h-lâi kong-kek lín; hit-kok ê ōe lín thiaⁿ bô,

50in ê lâng bīn hiông-kài-kài, bōe chun-kèng lāu-lâng, bōe thiàⁿ-sioh gín-á;

51in ōe thun-chia̍h lín ê cheng-siⁿ só͘ siⁿ--ê, kap lín ê thó͘-tōe chhut-sán--ê, ti̍t-kàu lín bia̍t-bông; koh chiong lín ê ngó͘-kok, sin-chiú, sin-iû, gû-á-kiáⁿ kap iûⁿ-á-kiáⁿ, chia̍h kah bô chhun pòaⁿ-hāng, ti̍t-kàu lín gō-sí.

52In beh tī choân-kok ta̍k-ê siâⁿ ûi-khùn lín, ti̍t-kàu lín só͘ óa-khò koân-tōa koh kian-kò͘ ê siâⁿ-chhiûⁿ lóng tó-hoāi. In beh chiong lín ûi-khùn tī Siōng Chú — lín ê Siōng-tè só͘ siúⁿ-sù lín choân-kok ta̍k-ê siâⁿ.

53Lín tī khún-pek khùn-khó͘ ê tiong-kan, beh chia̍h ka-kī ê chhin-siⁿ-kiáⁿ, chiū-sī Siōng Chú — lín ê Siōng-tè siúⁿ-sù lín ê hāu-siⁿ cha-bó͘-kiáⁿ ê bah.

54Lín tiong-kan un-hô, ū tông-chêng-sim ê lâng, ōe léng-tām tùi-thāi i ê hiaⁿ-tī, i só͘ thiàⁿ ê bó͘, kap chhun--lo̍h-lâi ê gín-á,

55bô beh chiong ka-kī só͘ chia̍h chhin-siⁿ-kiáⁿ ê bah, pun chi̍t-tiám-á hō͘ in; in-ūi lín tī ta̍k-ê siâⁿ siū tùi-te̍k ûi-khùn, siū khún-pek, lóng bô chhun pòaⁿ-hāng.

56Lín tiong-kan un-hô, ū tông-chêng-sim, pêng-sî m̄-káⁿ thǹg-chhiah-kha ta̍h-thô͘ ê hū-jîn-lâng, ōe léng-tām tùi-thāi i só͘ thiàⁿ ê tiōng-hu, kap i ê hāu-siⁿ cha-bó͘-kiáⁿ;

57thau-thau-á chia̍h i siⁿ--lo̍h-lâi ê thai-pôaⁿ, sīm-chì chia̍h ka-kī siⁿ ê jî-lú, in-ūi lín tī ta̍k-ê siâⁿ siū tùi-te̍k ûi-khùn, siū khún-pek, lóng bô chhun pòaⁿ-hāng.

58Lín nā bô chhiat-si̍t chun-hêng chit-pún chheh só͘ kì-chài lu̍t-hoat ê ōe, bô kèng-ùi Siōng Chú — lín ê Siōng-tè êng-kng thang kiaⁿ-ùi ê miâ,

59Siōng Chú chiū ōe ēng lín siūⁿ bōe kàu ê chai-hō, chiū-sī tōa koh kú-tn̂g ê chai-lān, giâm-tiōng koh tn̂g-kî ê pīⁿ, kàng-lo̍h hō͘ lín kap lín ê hō͘-tāi.

60I mā ōe hō͘ lín só͘ kiaⁿ Ai-ki̍p -lâng ê pīⁿ lóng lîm-kàu lín, kā lín tîⁿ--teh, éng-oán i bōe hó;

61liân chit-pún lu̍t-hoat ê chheh bô kì-chài ê pīⁿ kap chai-hō, Siōng Chú mā ōe hō͘ in lîm-kàu lín, ti̍t-kàu lín bia̍t-bông.

62Lín í-chêng sui-jiân chhin-chhiūⁿ thiⁿ-téng ê chhiⁿ hiah-ni̍h chōe, m̄-kú lín bô thiaⁿ-thàn Siōng Chú — lín ê Siōng-tè ê ōe, só͘-í lín chhun--lo̍h-lâi ê jîn-kháu tōa-tōa kiám-chió.

63Í-chêng Siōng Chú ì-ài hó khoán-thāi lín, hō͘ lín jîn-kháu ke-thiⁿ, m̄-kú í-āu Siōng Chú ì-ài kā lín húi-hoāi, kā lín siau-bia̍t; lín mā ōe tùi ji̍p-khì sêng-chiap ê tōe siū pu̍ih-chhut.

64Siōng Chú ōe hō͘ lín sì-sòaⁿ tī bān-kok tiong, tùi tōe ê chit-pêng kàu tōe ê hit-pêng; lín ōe tī hia ho̍k-sāi pa̍t-ê sîn-bêng, sī ēng chhâ ēng chio̍h tiau-khek, lín kap lín ê lia̍t-chó͘ m̄-bat ê sîn-bêng.

65Tī hiah-ê kok, lín bōe-tàng ū an-tēng ê seng-oa̍h, bô tēng-ku ê só͘-chāi; Siōng Chú mā beh hō͘ lín tī hia sim-sîn put-an, ba̍k-sîn bô chheng-chhái, cheng-sîn soe-pāi;

66lín ê sìⁿ-miā bô an-choân, mî-ji̍t thê-sim-tiàu-táⁿ, sìⁿ-miā lân-pó.

67Lín ōe in-ūi sim-lāi ê kiaⁿ-hiâⁿ, kap ba̍k-chiu khòaⁿ--tio̍h-ê, chá-khí-sî beh kóng, “Thiⁿ ná iáu-bē àm!” Àm-sî beh kóng, “Thiⁿ ná iáu-bē kng!”

68Siōng Chú ōe hō͘ lín chē-chûn tò-khì Ai-ki̍p, kiâⁿ hit-tiâu góa bat hoan-hù lín m̄-thang koh tò--khì ê lō͘; tī hia, lín ōe bōe ka-kī hō͘ tùi-te̍k chòe lô͘-po̍k lú-pī, m̄-kú bô lâng beh bóe.