Deuteronomy 12

Chinese TTVR (現代台語譯本羅馬字版)

← Chapter 11 Jump to: Chapter 13 →

1Lín tòa tī Siōng Chú — lín ê lia̍t-chó͘ ê Siōng-tè siúⁿ-sù lín chòe sán-gia̍p ê tōe ê sî, tio̍h chun-siú ē-bīn chiah-ê kui-lē kap bēng-lēng.

2Lín beh chiàm-léng ê kok-ka, in ê jîn-bîn teh ho̍k-sāi sîn-bêng ê só͘-chāi, bô-lūn tī koân-soaⁿ, tī sió-soaⁿ, tī chhiⁿ-chhùi ê chhiū ē-bīn, lóng tio̍h kā húi-hoāi;

3lín mā tio̍h thiah-húi in ê chè-tôaⁿ, kòng-chhùi in ê chio̍h-thiāu-siōng, ēng hé sio in ê A-sià-la lú-sîn ê sîn-siōng, chhò-tn̄g in tiau-khek ê ngó͘-siōng, hō͘ lâng bōe koh khì hiah-ê só͘-chāi kèng-pài.

4Lín m̄-thang o̍h in ê hong-sek ho̍k-sāi Siōng Chú — lín ê Siōng-tè.

5Chí-ū thang tī Siōng Chú — lín ê Siōng-tè chiong-lâi tùi lín ê chi-cho̍k kéng-soán ê só͘-chāi kèng-pài I, chhē-kiû I;

6chiong lín ê sio-hòa-chè, pa̍t-khoán ê chè-mi̍h, cha̍p-hūn-chi̍t ê hōng-hiàn, kî-tha ê lé-mi̍h, siā-goān ê chè, kam-sim hiàn ê chè, í-ki̍p thâu-chiūⁿ-siⁿ ê gû kap iûⁿ, lóng tòa-khì hia.

7Tī hia, lín kap lín ê ka-koàn tio̍h tī Siōng Chú — lín ê Siōng-tè bīn-chêng lim-chia̍h, ūi-tio̍h I tī lín só͘ chòe ê it-chhè kā lín sù-hok lâi hoaⁿ-hí.

8Lán kin-á-ji̍t iáu-bē khì kàu Siōng Chú — lán ê Siōng-tè siúⁿ-sù lán an-hioh kap chòe sán-gia̍p ê tōe, ta̍k-ê lâng chiàu ka-kī khòaⁿ-chòe tio̍h--ê khì chòe, chiong-lâi ji̍p-khì liáu-āu chiū m̄-thang án-ni.

10Lín kè Iok-tàn-hô, khì tòa tī Siōng Chú — lín ê Siōng-tè hō͘ lín sêng-chiap ê tōe, koh hō͘ lín bô siū sì-ûi tùi-te̍k ê kiáu-jiáu, tit-tio̍h thài-pêng, an-ku-lo̍k-gia̍p;

11hit-sî, Siōng Chú — lín ê Siōng-tè ōe kéng-soán chi̍t ê hō͘ lín thang kèng-pài I ê só͘-chāi, lín tio̍h chiàu góa ê bēng-lēng, chiong sio-hòa-chè, pa̍t-khoán ê chè-mi̍h, cha̍p-hūn-chi̍t ê hōng-hiàn, kî-tha ê lé-mi̍h, í-ki̍p lín tùi Siōng Chú hē-goān beh hiàn ê hó-mi̍h, lóng tòa-khì hia hiàn hō͘ I.

12Lín kap lín ê kiáⁿ, cha-bó͘-kiáⁿ, lô͘-po̍k, lú-pī, lóng tio̍h kap tòa tī lín tiong-kan ê Lī-bī -lâng, tī Siōng Chú — lín ê Siōng-tè bīn-chêng chòe-hé hoaⁿ-hí; tio̍h ōe-kì--tit, Lī-bī -lâng tī lín tiong-kan bô pun-tio̍h sán-gia̍p.

13Lín tio̍h kín-sīn, m̄-thang tī lín khòaⁿ kah-ì ê só͘-chāi hiàn sio-hòa-chè;

14chí-ū thang tī Siōng Chú só͘ kéng-soán bó͘ chi̍t ê chi-cho̍k ê só͘-chāi hiàn sio-hòa-chè, koh tī hia chiàu góa só͘ bēng-lēng lín ê it-chhè khì chòe.

15Lín tī lín tòa ê só͘-chāi, thang chiàu Siōng Chú — lín ê Siōng-tè siúⁿ-sù lín ê hok-hūn, chiàu lín ê ì-sù thâi cheng-siⁿ chia̍h-bah; bô-lūn lé-gî-siōng chheng-khì á-sī bô chheng-khì ê lâng lóng thang chia̍h, chhin-chhiūⁿ teh chia̍h lêng-iûⁿ kap lo̍k.

16M̄-kú huih m̄-thang chia̍h, tio̍h piàⁿ tī thô͘-kha, chhin-chhiūⁿ teh piàⁿ-chúi.

17Lín ê ngó͘-kok, sin-chiú, sin-iû, cha̍p-hūn-chi̍t ê hōng-hiàn, thâu-chiūⁿ-siⁿ ê gû iûⁿ, hē-goān beh hiàn ê mi̍h, kam-sim hiàn ê chè, á-sī kî-tha ê lé-mi̍h, lóng m̄-thang tī lín tòa ê só͘-chāi chia̍h;

18chí-ū thang tī Siōng Chú — lín ê Siōng-tè kéng-soán ê só͘-chāi, kap lí ê kiáⁿ, cha-bó͘-kiáⁿ, lô͘-po̍k, lú-pī, í-ki̍p tòa tī lín tiong-kan ê Lī-bī -lâng, tī Siōng Chú ê bīn-chêng chòe-hé lim-chia̍h, chòe-hé hoaⁿ-hí, hióng-siū lín ê chhiú só͘ chòe ê sêng-kó.

19Tio̍h kín-sīn, lín tòa tī lín ê thó͘-tōe, tio̍h éng-oán chiàu-kò͘ Lī-bī -lâng.

20Siōng Chú — lín ê Siōng-tè chiàu I ê èng-ún hō͘ lín ê thó͘-tōe khok-tián ê sî, lín nā siūⁿ-kóng beh chia̍h-bah, chiū thang chiàu lín ê ì-sù chia̍h.

21Siōng Chú — lín ê Siōng-tè kéng-soán beh chòe lín kèng-pài I ê só͘-chāi nā lī lín chin hn̄g, lín thang chiàu góa ê bēng-lēng, chiong Siōng Chú siúⁿ-sù ê gû, iûⁿ, chiàu lín só͘ ài, tī lín tòa ê só͘-chāi thâi lâi chia̍h.

22Lín lé-gî-siōng chheng-khì kap bô chheng-khì ê lâng thang chòe-hé chia̍h, chhin-chhiūⁿ teh chia̍h lêng-iûⁿ kap lo̍k.

23M̄-kú choa̍t-tùi m̄-thang chia̍h huih, in-ūi huih sī sìⁿ-miā; lín m̄-thang bah kap sìⁿ-miā chòe-hé chia̍h.

24Huih m̄-thang chia̍h, tio̍h piàⁿ tī thô͘-kha, chhin-chhiūⁿ teh piàⁿ-chúi.

25M̄-thang chia̍h huih, lín kap lín ê hō͘-tāi chiū ōe tit-tio̍h hok-khì, in-ūi lín án-ni chòe sī Siōng Chú khòaⁿ-chòe tio̍h ê sū.

26Lín ê chè-mi̍h kap siā-goān ê chè, lóng tio̍h tòa-khì Siōng Chú beh kéng-soán ê só͘-chāi.

27Lín ê sio-hòa-chè ê bah kap huih, tio̍h hiàn tī Siōng Chú — lín ê Siōng-tè ê chè-tôaⁿ téng; kî-tha ê chè-mi̍h, huih tio̍h piàⁿ tī Siōng Chú — lín ê Siōng-tè ê tôaⁿ-téng; bah, lín thang chia̍h.

28Góa só͘ bēng-lēng lín chiah-ê ōe, lín lóng tio̍h chun-siú thiaⁿ-thàn, chòe Siōng Chú — lín ê Siōng-tè khòaⁿ-chòe hó, khòaⁿ-chòe tio̍h ê sū; án-ni lín kap lín ê hō͘-tāi chiū ōe éng-oán tit-tio̍h hok-khì.

29Siōng Chú — lín ê Siōng-tè tī lín ê bīn-chêng chiong hiah-ê kok ê jîn-bîn kóaⁿ-cháu, siau-bia̍t, hō͘ lín chiàm-léng in ê tōe, tī hia khiā-khí;

30hit-sî, lín tio̍h kín-sīn, m̄-thang tī in siau-bia̍t liáu-āu o̍h in, soah hām-lo̍h in ê lô-bāng; m̄-thang thàm-thiaⁿ in pài sîn-bêng ê sū, kóng, “Chiah-ê jîn-bîn án-chóaⁿ teh ho̍k-sāi in ê sîn-bêng, goán mā beh án-ni chòe.”

31Lín m̄-thang ēng in ê hong-sek ho̍k-sāi Siōng Chú — lín ê Siōng-tè, in-ūi in ho̍k-sāi in ê sîn-bêng ê sî, chòe Siōng Chú thòng-hūn iàm-ò͘ⁿ ê sū, sīm-chì sio in ê kiáⁿ cha-bó͘-kiáⁿ hiàn hō͘ in ê sîn-bêng.

32Góa bēng-lēng lín--ê, lín lóng tio̍h chhiat-si̍t chun-hêng; m̄-thang ke-thiⁿ, mā m̄-thang kiám-chió.

← Chapter 11 Jump to: Chapter 13 →