Deuteronomy 23

Chinese TTVR (現代台語譯本羅馬字版)

← Chapter 22 Jump to: Chapter 24 →

1Sèng-khì-koan siū-siong á-sī iam--khí-lâi ê lâng, bōe-ēng-tit ka-ji̍p Siōng Chú ê hōe.

2Su-seng-chú bōe-ēng-tit ka-ji̍p Siōng Chú ê hōe; i ê kiáⁿ-sun kàu tē-cha̍p tāi, mā bōe-ēng-tit ka-ji̍p.

3A-bûn -lâng kap Mô͘-ap -lâng bōe-ēng-tit ka-ji̍p Siōng Chú ê hōe; sīm-chì kàu tē-cha̍p tāi, mā bōe-ēng-tit ka-ji̍p,

4in-ūi lín chhut Ai-ki̍p ê sî, in bô tī lō͘--ni̍h ēng chia̍h-mi̍h kap chúi gêng-chiap lín; koh chhiàⁿ Bí-soh-put-ta̍t-bí-a ê Pí-toa̍t -lâng, Pí-ní ê kiáⁿ Pa-lân lâi kā lín chiù-chó͘.

5M̄-kú Siōng Chú — lín ê Siōng-tè bô thiaⁿ Pa-lân, in-ūi Siōng Chú thiàⁿ lín, chiong hit-ê chiù-chó͘ pìⁿ-chòe chiok-hok.

6Lín éng-oán m̄-thang pang-chān in tit-tio̍h pêng-an kap hoân-êng.

7M̄-thang oàn-hūn Í-tong -lâng, in-ūi in sī lín ê chhin-cho̍k; m̄-thang oàn-hūn Ai-ki̍p -lâng, in-ūi lín bat kià-ku tī hia;

8in ê kiáⁿ-sun kàu tē-saⁿ tāi thang ka-ji̍p Siōng Chú ê hōe.

9Lín chhut-khì chat-iâⁿ beh kong-kek tùi-te̍k ê sî, tio̍h pī-bián hō͘ lín tì-kàu lé-gî-siōng bô chheng-khì ê sū.

10Lín tiong-kan nā ū lâng bōng-siat tì-kàu bô chheng-khì, i tio̍h chhut-khì iâⁿ-gōa, m̄-thang koh ji̍p-lâi iâⁿ-lāi;

11kàu beh àm ê sî, i tio̍h ēng chúi sóe seng-khu, kàu ji̍t lo̍h chiah thang koh ji̍p iâⁿ.

12Lín tī iâⁿ-gōa tio̍h kui-ōe chi̍t ê só͘-chāi chòe piān-só͘.

13Lín ê chong-pī tio̍h ū thuh-á, hō͘ lín tī gōa-bīn tāi-siáu-piān ê sî, ēng lâi ó͘ thô͘, khàm lín só͘ pàng--ê;

14in-ūi Siōng Chú — lín ê Siōng-tè tī lín ê iâⁿ-lāi kap lín tông-chāi, beh pó-hō͘ lín, chiong tùi-te̍k kau hō͘ lín, só͘-í lín ê peng-iâⁿ tio̍h pó-chhî sèng-kiat; chiah bián I khòaⁿ-kìⁿ lín tiong-kan ū ù-òe, chiū lī-khui lín.

15Nā ū lô͘-lē tô-thoat, cháu-khì lín hia, lín m̄-thang chiong i kau tńg-khì hō͘ i ê chú-lâng;

16lín tio̍h hō͘ i tòa tī i só͘ ài ê só͘-chāi, só͘ kéng ê siâⁿ, kap lín chòe-hé khiā-khí; lín m̄-thang kā i khi-hū.

17Í-sek-lia̍t ê lâm-lú m̄-thang ū lâng tī sī-biō chòe ki-lú á-sī loân-tông.

18Sī-biō ê ki-lú kap loân-tông thàn ê chîⁿ, m̄-thang tòa ji̍p-lâi Siōng Chú — lín ê Siōng-tè ê sèng-tiān siā-goān; in-ūi chit nn̄g hāng lóng sī Siōng Chú — lín ê Siōng-tè iàm-ò͘ⁿ--ê.

19Lín ê tông-pau bô-lūn kā lín chioh chîⁿ-gûn, chia̍h-mi̍h, á-sī ōe siⁿ lī-sek ê mi̍h-kiāⁿ, lóng m̄-thang the̍h lī-sek;

20gōa-cho̍k-lâng nā kā lín chioh, lín thang the̍h lī-sek, m̄-kú chioh hō͘ lín ê tông-pau chiū m̄-thang kā i the̍h; án-ni, Siōng Chú — lín ê Siōng-tè ōe tī lín beh ji̍p-khì chiàm-léng ê tōe, tī lín só͘ chòe it-chhè ê sū, sù-hok lín.

21Lín tùi Siōng Chú — lín ê Siōng-tè hē-goān, siā-goān m̄-thang iân-tî, in-ūi Siōng Chú it-tēng ōe kā lín thó; lín nā bô siā-goān, chiū ū chōe.

22Lín nā bô hē-goān, tian-tò bô chōe.

23Lín só͘-ū chhin-chhùi tùi Siōng Chú — lín ê Siōng-tè kam-sim hē ê goān, tio̍h chhiat-si̍t chun-siú.

24Lín ji̍p-khì chhù-piⁿ ê phû-tô-hn̂g, thang chiàu lín só͘ ài bán lâi chia̍h, m̄-kú m̄-thang tóe tī khì-khū lāi.

25Lín ji̍p-khì chhù-piⁿ iáu-bē siu-koah ê be̍h-hn̂g, thang ēng chhiú tiah be̍h-sūi, m̄-kú m̄-thang ēng liâm-le̍k-á koah.

← Chapter 22 Jump to: Chapter 24 →