Deuteronomy 30

Chinese TTVR (現代台語譯本羅馬字版)

← Chapter 29 Jump to: Chapter 31 →

1Chiong-lâi, góa só͘ kā lín kóng ê chiok-hok kap chiù-chó͘ hoat-seng tī lín ê sin-chiūⁿ, lín tī Siōng Chú — lín ê Siōng-tè kā lín liû-hòng--khì ê lia̍t-kok tiong, siūⁿ-khí chiah-ê sū,

2hit-sî, lín kap lín ê kiáⁿ-sun nā choân-sim choân-chêng kui-ǹg Siōng Chú — lín ê Siōng-tè, chiàu góa kin-á-ji̍t ê hoan-hù, chun-thàn I it-chhè ê ōe,

3Siōng Chú — lín ê Siōng-tè chiū ōe lîn-bín lín, hō͘ lín siū-lia̍h ê lâng tò-tńg--lâi. I ōe hôe-sim-tńg-ì, chiong I kā lín sì-sòaⁿ tī lia̍t-kok ê lâng chū-chi̍p, chhōa--tńg-lâi.

4Lín nā ū lâng siū kóaⁿ-tio̍k, chiū-sī tī thiⁿ-piⁿ-hái-kak, Siōng Chú — lín ê Siōng-tè mā ōe kā lín chū-chi̍p, tùi hia chhōa lín tò--lâi.

5Siōng Chú — lín ê Siōng-tè ōe chhōa lín sêng-chiap lín ê lia̍t-chó͘ chiàm-léng ê tōe, hó khoán-thāi lín, hō͘ lín ê jîn-kháu ke-thiⁿ, pí lín ê lia̍t-chó͘ khah chōe.

6Siōng Chú — lín ê Siōng-tè ōe kiat-chēng lín kap lín hō͘-tāi ê sim, hō͘ lín it-sim-it-ì thiàⁿ Siōng Chú — lín ê Siōng-tè, hō͘ lín tī chit-ê tōe éng-oán khiā-khí.

7Siōng Chú — lín ê Siōng-tè ōe chiong chiah-ê chiù-chó͘ kàng-lo̍h tī lín ê tùi-te̍k, kap oàn-hūn lín, khún-pek lín ê lâng ê sin-chiūⁿ.

8Lín ōe koh thiaⁿ-thàn Siōng Chú ê ōe, chun-siú góa kin-á-ji̍t só͘ bēng-lēng lín I it-chhè ê kài-bēng.

9Lín nā thiaⁿ-thàn Siōng Chú — lín ê Siōng-tè ê ōe, chun-siú chit-ê lu̍t-hoat só͘ kì-chài ê kài-bēng kap kui-lē, koh choân-sim choân-chêng kui-ǹg Siōng Chú — lín ê Siōng-tè, I ōe hō͘ lín sū-sū heng-thong, hō͘ lín só͘ siⁿ--ê, cheng-siⁿ siⁿ--ê, thó͘-tōe chhut-sán--ê, chhiong-chiok ū-chhun; in-ūi Siōng Chú ōe chhin-chhiūⁿ í-chêng ì-ài lín ê lia̍t-chó͘ án-ni, hó khoán-thāi lín, sù-hok lín.

11Góa kin-á-ji̍t só͘ bēng-lēng lín ê kài-bēng, m̄-sī lín chòe bōe kàu--ê, lī lín mā bô hn̄g;

12m̄-sī tī thiⁿ-téng, lín m̄-bián mn̄g, kóng, “Siáⁿ-lâng ōe-tàng ūi-tio̍h lán khì thiⁿ-téng, chiong chit-ê kà-sī tòa--lo̍h-lâi, hō͘ lán thiaⁿ--kìⁿ lâi si̍t-hêng?”

13Mā m̄-sī tī hái ê hit-pêng, lín m̄-bián mn̄g, kóng, “Siáⁿ-lâng ōe-tàng ūi-tio̍h lán kè-hái, chiong chit-ê kà-sī tòa--lâi, hō͘ lán thiaⁿ--kìⁿ lâi si̍t-hêng?”

14Chit-ê kài-bēng lī lín chin kūn, sī tī lín ê chhùi-lāi, tī lín ê sim-tiong, hō͘ lín ōe-tàng si̍t-hêng.

15Tio̍h ōe-kì--tit, góa kin-á-ji̍t chiong siⁿ-sí hō-hok kā lín kóng, hō͘ lín soán-te̍k.

16Góa kin-á-ji̍t hoan-hù lín, tio̍h thiàⁿ Siōng Chú — lín ê Siōng-tè, kiâⁿ I ê tō-lō͘, siú I ê kài-bēng, kui-lē, bēng-lēng, Siōng Chú — lín ê Siōng-tè chiū ōe hō͘ lín tī beh ji̍p-khì chiàm-léng ê tōe kú-tn̂g khiā-khí, jîn-kháu ke-thiⁿ, tit-tio̍h hok-khì.

17Lín nā ûi-pōe Siōng Chú koh m̄ sūn-thàn, siū ín-iú khì kèng-pài ho̍k-sāi pa̍t-ê sîn-bêng,

18góa kin-á-ji̍t bêng-bêng kā lín kóng, lín it-tēng ōe bia̍t-bông, bōe-tàng tī lín kè Iok-tàn-hô beh ji̍p-khì chiàm-léng ê tōe kú-tn̂g khiā-khí.

19Góa kin-á-ji̍t kiò thiⁿ kiò tōe lâi tùi lín choh-chèng: Góa chiong siⁿ kap sí, chai-hō kap hok-khì pâi tī lín ê bīn-chêng; tio̍h kéng sìⁿ-miā, lín kap lín ê hō͘-tāi chiū ōe-tàng kè-sio̍k seng-chûn;

20tio̍h thiàⁿ Siōng Chú — lín ê Siōng-tè, thiaⁿ-thàn I ê ōe, tiong-sêng kun-tè I; I sī lín ê oa̍h-miā, lín tio̍h khò I chiah ōe-tàng kè-sio̍k seng-chûn; án-ni lín chiū thang tī Siōng Chú tùi lín ê lia̍t-chó͘ A-pek-la-hán, Í-sat, Ngá-kok, li̍p-sè beh siúⁿ-sù in ê tōe kú-tn̂g khiā-khí.

← Chapter 29 Jump to: Chapter 31 →