Deuteronomy 31

Chinese TTVR (現代台語譯本羅馬字版)

← Chapter 30 Jump to: Chapter 32 →

1Mô͘-se kè-sio̍k tùi Í-sek-lia̍t -lâng kóng,

2“Góa í-keng chi̍t-pah jī-cha̍p hè, bōe-tàng koh léng-tō lín. Siōng Chú bat tùi góa kóng, ‘Lí bōe-tàng kè Iok-tàn-hô.’

3Siōng Chú — lín ê Siōng-tè ōe tī lín ê bīn-chêng chhōa lín kè--khì, siau-bia̍t chiah-ê cho̍k, hō͘ lín chiàm-léng in ê thó͘-tōe. Chiàu Siōng Chú só͘ kóng--ê, Iok-su-a ōe chhōa lín kè--khì.

4Siōng Chú ōe tùi-thāi chiah-ê cho̍k, chhin-chhiūⁿ I í-chêng tùi-thāi A-mô͘-lī -lâng nn̄g ê ông, Se-hông kap Go̍k, í-ki̍p tùi-thāi in ê kok-ka kâng-khoán, kā in oân-choân siau-bia̍t.

5Siōng Chú ōe chiong in kau hō͘ lín; lín tio̍h chiàu góa só͘ hoan-hù lín it-chhè ê bēng-lēng tùi-thāi in.

6Lín tio̍h ióng-kám chòng-táⁿ, m̄-bián kiaⁿ in, m̄-bián in-ūi in khióng-hông; in-ūi Siōng Chú — lín ê Siōng-tè ōe kap lín chòe-hé khì, bōe lī-khui lín, bōe pàng-sak lín.”

7Mô͘-se kiò Iok-su-a lâi, tī Í-sek-lia̍t chèng-lâng ê bīn-chêng tùi i kóng, “Lí tio̍h ióng-kám chòng-táⁿ, in-ūi chiū-sī lí beh chhōa chit-ê jîn-bîn ji̍p-khì sêng-chiap Siōng Chú tùi in ê lia̍t-chó͘ li̍p-sè beh hō͘ in ê tōe.

8Siōng Chú beh kiâⁿ tī lí ê thâu-chêng, kap lí tông-chāi, bōe lī-khui lí, mā bōe pàng-sak lí. Lí m̄-bián kiaⁿ, mā m̄-bián lún.”

9Mô͘-se chiong lu̍t-hoat ê chheh siá hó, chiū kau hō͘ kng Siōng Chú iok-kūi ê Lī-bī -lâng chòe chè-si--ê, kap Í-sek-lia̍t ê tiúⁿ-ló.

10Mô͘-se bēng-lēng in, kóng, “Ta̍k-piàn móa chhit nî, tī bián-tû chè-bū hit-nî ê Tah-liâu-choeh,

11Í-sek-lia̍t chèng-lâng lâi kàu Siōng Chú — lín ê Siōng-tè só͘ kéng-soán kèng-pài I ê só͘-chāi, hit-sî, lín tio̍h tī Í-sek-lia̍t chèng-lâng ê bīn-chêng tōa-siaⁿ tha̍k chit-ê lu̍t-hoat hō͘ in thiaⁿ.

12Tio̍h chū-chi̍p jîn-bîn, bô-lūn ta-po͘, cha-bó͘, gín-á, í-ki̍p lín siâⁿ-lāi ê gōa-cho̍k-lâng, hō͘ in lóng thiaⁿ, hō͘ in ha̍k-si̍p, thang kèng-ùi Siōng Chú — lín ê Siōng-tè, chhiat-si̍t chun-hêng chit-ê lu̍t-hoat múi chi̍t kù ōe;

13mā hō͘ hiah-ê iáu m̄ bat lu̍t-hoat ê hō͘-tāi lóng ōe-tàng thiaⁿ--tio̍h, thang tī kè Iok-tàn-hô khì sêng-chiap chòe sán-gia̍p ê tōe, chi̍t-sì-lâng ha̍k-si̍p kèng-ùi Siōng Chú — lín ê Siōng-tè.”

14Siōng Chú tùi Mô͘-se kóng, “Lí bô-jōa-kú ōe lī-khui sè-kan. Lí kiò Iok-su-a lâi, kap lí chòe-hé khiā tiàm hōe-bō͘ lāi; góa beh kau-tài i jīm-bū.” Mô͘-se chiū kap Iok-su-a khì khiā tī hōe-bō͘ lāi.

15Siōng Chú tī hōe-bō͘ lāi, tī hûn-thiāu tiong hián-hiān; hûn-thiāu thêng tī hōe-bō͘ mn̂g-kháu ê téng-bīn.

16Siōng Chú koh tùi Mô͘-se kóng, “Lí teh-beh tńg-khì lí ê lia̍t-chó͘ hia. Lí sí í-āu, chiah-ê jîn-bîn ōe tī in ji̍p--khì ê só͘-chāi, ho̍k-sāi hit só͘-chāi ê gōa-cho̍k sîn-bêng kiâⁿ siâ-îm; khì-sak góa, ûi-pōe kap góa li̍p ê iok.

17Hit-sî, góa ōe tùi in hoat siū-khì, khì-sak in, bīn oa̍t-cháu m̄ khòaⁿ in; in ōe siū thun-bia̍t, tú-tio̍h chin chōe chai-hō hoān-lān; hit-ji̍t in chiū ōe mn̄g, kóng, ‘Lán tú-tio̍h chai-hō hoān-lān, sī m̄-sī in-ūi lán ê Siōng-tè bô kap lán tông-chāi?’

18Hit-ji̍t in-ūi in pài pa̍t-ê sîn-bêng, chok-ok-to-toan, só͘-í góa it-tēng bīn oa̍t-cháu m̄ khòaⁿ in.

19“Taⁿ, lí tio̍h siá chit-siú koa, kà jîn-bîn chhiùⁿ, ēng lâi kà-sī Í-sek-lia̍t ê hō͘-tāi, chòe góa chí-chek Í-sek-lia̍t -lâng ê kiàn-chèng.

20Góa chhōa in chìn-ji̍p góa tùi in ê lia̍t-chó͘ li̍p-sè beh hō͘ in hit-ê lâu lin kap bi̍t ê tōe liáu-āu, in ōe chia̍h kah pûi-chut-chut, phian-ǹg pa̍t-ê sîn-bêng ho̍k-sāi in, soah khòaⁿ-khin góa, ûi-pōe góa ê iok.

21Kàu in tú-tio̍h chai-hō hoān-lān ê sî, chit-siú koa ōe chòe góa chí-chek in ê kiàn-chèng; in ê hō͘-tāi ōe kè-sio̍k chhiùⁿ chit-siú koa, bōe bōe-kì--tit. Sui-jiân góa iáu-bē chhōa in chìn-ji̍p góa li̍p-sè beh sù hō͘ in ê tōe, m̄-kú góa í-keng chai in ê sim-su liām-thâu.”

22Hit-ji̍t, Mô͘-se chiū siá chit-siú koa, ēng lâi kà-sī Í-sek-lia̍t -lâng.

23Siōng Chú hoan-hù Lūn ê kiáⁿ Iok-su-a, kóng, “Lí tio̍h ióng-kám chòng-táⁿ, in-ūi lí beh chhōa Í-sek-lia̍t -lâng ji̍p-khì góa li̍p-sè beh hō͘ in ê tōe; góa beh kap lí tông-chāi.”

24Mô͘-se chiong chit-ê lu̍t-hoat ê chheh siá chheng-chhó,

25chiū hoan-hù kng Siōng Chú iok-kūi ê Lī-bī -lâng, kóng,

26“Chit-ê lu̍t-hoat ê chheh tio̍h hē tī Siōng Chú — lín ê Siōng-tè ê iok-kūi piⁿ, thang chòe chí-chek lín ê kiàn-chèng.

27Góa chai lín sī pōe-ge̍k, sim-ngī kò͘-chip ê bîn-cho̍k; góa kin-á-ji̍t iáu oa̍h--teh kap lín chòe-hé, lín to ōe pōe-ge̍k Siōng Chú, hô-hòng góa sí liáu-āu!

28Tio̍h chū-chi̍p lín só͘-ū chi-cho̍k ê tiúⁿ-ló kap koaⁿ-tiúⁿ lâi góa chia, góa beh chiong chiah-ê ōe kóng hō͘ in thiaⁿ, mā beh kiò thiⁿ kiò tōe lâi chèng-si̍t lín ê m̄-tio̍h.

29Góa chai, góa sí liáu-āu, lín ōe thiat-tóe pāi-hoāi, phian-lī góa só͘ bēng-lēng lín tio̍h kiâⁿ ê tō-lō͘; chiong-lâi lín ōe tú-tio̍h chai-hō, in-ūi lín ōe chòe Siōng Chú khòaⁿ-chòe pháiⁿ ê sū, jiá I siū-khì.”

30Mô͘-se chiong chit-siú koa, tùi thâu kàu bé liām hō͘ Í-sek-lia̍t hōe-chiòng thiaⁿ.

← Chapter 30 Jump to: Chapter 32 →