Deuteronomy 15

Chinese TTVR (現代台語譯本羅馬字版)

← Chapter 14 Jump to: Chapter 16 →

1Ta̍k-piàn móa chhit nî, lín tio̍h bián-tû it-chhè ê chè-bū.

2Ē-bīn sī bián-tû chè-bū ê kui-lē: Chè-chú chioh hō͘ chhù-piⁿ--ê, tio̍h bián-tû in ê chè-bū; m̄-thang tùi lín ê chhù-piⁿ, chiū-sī lín ê tông-pau, thó in khiàm--lín-ê; in-ūi Siōng Chú í-keng soan-pò͘ chè-bū bián-tû.

3Gōa-cho̍k-lâng lín thang kā in thó; m̄-kú lín chioh hō͘ tông-pau--ê, tio̍h kā in bián-tû.

4Lín nā chin-chiàⁿ thiaⁿ-thàn Siōng Chú — lín ê Siōng-tè ê ōe, chun-hêng góa kin-á-ji̍t só͘ bēng-lēng lín it-chhè ê kài-bēng, lín chiū bōe ū sàn-chhiah-lâng; in-ūi Siōng Chú — lín ê Siōng-tè ōe tī I siúⁿ-sù lín chòe sán-gia̍p ê tōe tōa-tōa sù-hok lín.

6Siōng Chú — lín ê Siōng-tè ōe chiàu I ê èng-ún sù-hok lín; lín ōe chioh hō͘ chin chōe kok, m̄-bián kā in chioh; lín ōe koán-hat chin chōe kok, in bōe kā lín koán-hat.

7Tī Siōng Chú — lín ê Siōng-tè siúⁿ-sù lín ê tōe, bô-lūn tó chi̍t ê siâⁿ, nā ū sàn-chhiah ê tông-pau, lín m̄-thang ngī-sim, chhiú kiu--khí-lâi bô beh pang-chān i;

8lín it-tēng tio̍h chhun-chhiú pang-chān i, chiàu i ê su-iàu chioh i, pó͘ i ê khiàm-kheh.

9Tio̍h kín-sīn, chiah bián lín sim-lāi ū pháiⁿ liām-thâu, kóng “Tē-chhit nî, bián-tû chè-bū ê nî teh-beh kàu lah”, chiū tùi lín sàn-chhiah ê tông-pau tàng-sng, m̄ hō͘ i; i nā ūi-tio̍h lín ê iân-kò͘ kiû-kiò Siōng Chú, lín chiū ū chōe.

10Lín it-tēng tio̍h hō͘ i, hō͘ i ê sî tio̍h kam-sim, in-ūi tùi chit-ê sū, Siōng Chú — lín ê Siōng-tè ōe tī lín it-chhè ê kang-chok kap lín ê só͘-chòe sù-hok lín.

11Tī hit-ê só͘-chāi, siông-siông ōe ū sàn-chhiah-lâng, só͘-í góa bēng-lēng lín, tī lín khiā-khí ê tōe, it-tēng tio̍h chhun-chhiú pang-chān lín sàn-chhiah khùn-khó͘ ê tông-pau.

12Lí ê Í-sek-lia̍t tông-pau bô-lūn lâm lú, bōe hō͘ lí chòe lô͘-lē, ho̍k-sāi lí la̍k nî, kàu tē-chhit nî, lí tio̍h kā i tháu-pàng hō͘ i chū-iû lī-khui.

13Lí tháu-pàng i ê sî, m̄-thang hō͘ i khang-chhiú lī-khui;

14tio̍h tùi Siōng Chú — lí ê Siōng-tè siúⁿ-sù lí ê iûⁿ, ngó͘-kok, chiú the̍h chi̍t-pō͘-hūn, hō͘ i siang-chhiú móa-móa chhut--khì.

15Tio̍h ōe-kì-tit lín bat tī Ai-ki̍p -tōe chòe lô͘-châi, Siōng Chú — lín ê Siōng-tè ū kiù-sio̍k lín, só͘-í, góa kin-á-ji̍t chiong chit-ê sū bēng-lēng lín.

16Lí ê lô͘-lē nā tùi lí kóng “Góa bô beh lī-khui lí”, in-ūi i thiàⁿ lí kap lí ê ke, koh chin ài kap lí chòe-hé tòa;

17lí tio̍h hō͘ i óa mn̂g-sìⁿ, ēng chǹg-á kā i ê hī-á chǹg-khang, i chiū éng-oán chòe lí ê lô͘-lē. Lí mā tio̍h án-ni tùi-thāi lí ê lú-pī.

18Lí kā i tháu-pàng hō͘ i chū-iû lī-khui ê sî, m̄-thang m̄ kam-goān, in-ūi i ho̍k-sāi lí la̍k nî, i só͘ chòe ê kang sī chhiàⁿ--lâi ê kang-lâng ê têng-pē; Siōng Chú — lín ê Siōng-tè ōe tī lí só͘ chòe it-chhè ê sū, sù-hok lí.

19Só͘-ū thâu-chiūⁿ-siⁿ kang ê gû iûⁿ, tio̍h hun-pia̍t-choh-sèng kui Siōng Chú — lín ê Siōng-tè; thâu-chiūⁿ-siⁿ ê gû m̄-thang choh-kang, thâu-chiūⁿ-siⁿ ê iûⁿ m̄-thang kā chián-mn̂g.

20Lín kap lín ê ka-koàn, ta̍k-nî tio̍h tī Siōng Chú — lín ê Siōng-tè kéng-soán ê só͘-chāi, tī I ê bīn-chêng chia̍h chiah-ê gû iûⁿ ê bah.

21Nā ū phòa-siùⁿ, bô-lūn sī kha-pái, sit-bêng, á-sī ū sím-mi̍h giâm-tiōng ê hâ-chhû, lóng m̄-thang chòe chè-mi̍h hiàn hō͘ Siōng Chú — lín ê Siōng-tè.

22Chit-khoán gû iûⁿ ê bah, lín thang tī lín tòa ê só͘-chāi chia̍h, bô-lūn lé-gî-siōng chheng-khì á-sī bô chheng-khì ê lâng lóng thang chia̍h, chhin-chhiūⁿ teh chia̍h lêng-iûⁿ kap lo̍k.

23M̄-kú huih m̄-thang chia̍h, tio̍h piàⁿ tī thô͘-kha, chhin-chhiūⁿ teh piàⁿ-chúi.

← Chapter 14 Jump to: Chapter 16 →