Deuteronomy 32 — Chinese TTVR (現代台語譯本羅馬字版)

1Thiⁿ ah, tio̍h àⁿ hī-khang, góa beh kóng-ōe; tōe ah, tio̍h chù-ì thiaⁿ góa só͘ kóng ê ōe.

2Góa ê kà-sī beh chhin-chhiūⁿ hō͘-chúi kàng-lo̍h, góa ê ōe beh chhin-chhiūⁿ lō͘-chúi tih-lo̍h; chhin-chhiūⁿ hō͘-mn̂g-á lo̍h tī iù-iù ê chháu, chhin-chhiūⁿ ki̍p-sî ê hō͘-chúi lo̍h tī chhài-soe.

3Góa beh soan-iông Siōng Chú ê miâ; lín tio̍h chun lán ê Siōng-tè chòe tōa.

4Siōng Chú sī Chio̍h-pôaⁿ, I ê só͘-chòe oân-choân, kong-pêng; I sī sìn-si̍t ê Siōng-tè, lóng bô put-gī; I kong-gī koh chèng-ti̍t.

5Chit-ê oan-khiau pāi-hoāi ê sè-tāi, in pōe-ge̍k, bōe-kham-tit chòe I ê kiáⁿ.

6Gû-gōng bû-ti ê jîn-bîn, lín ná ōe án-ni pò-tap Siōng Chú? I kiám m̄-sī lín ê lāu-pē, lín ê Chhòng-chō-chú, ū kiàn-li̍p lín ê kok-ka?

7Tio̍h ōe-kì-tit kó͘-chá ê ji̍t, hôe-sióng le̍k-tāi ê nî; mn̄g lí ê lāu-pē, i ōe chí-sī lí; mn̄g lí ê sī-tōa, in ōe kā lí kóng.

8Chì-koân-chiá pun thó͘-tōe hō͘ bān-kok chòe sán-gia̍p, chiong sè-kan-lâng pun-khui; chiàu Í-sek-lia̍t -lâng ê jîn-sò͘, tēng bān-cho̍k ê kéng-kài.

9Siōng Chú ê hūn-gia̍h sī I ê chú-bîn; Ngá-kok sī I ê sán-gia̍p.

10Siōng Chú tī khòng-iá chhē-tio̍h i, tī pha-hng iá-siù teh háu ê tōe tú-tio̍h i; Siōng Chú lám i, chiàu-kò͘ i, pó-hō͘ i chhin-chhiūⁿ pó-hō͘ ba̍k-chiu-jîn.

11Koh chhin-chhiūⁿ eng-chiáu lā i ê siū, ia̍t-si̍t kà sòe-chiah eng-á o̍h pe; thí-khui si̍t-kó͘ sîn i, chài tī si̍t-kó͘ téng.

12Chí-ū Siōng Chú ín-chhōa I ê chú-bîn, bô kî-tha sîn-bêng ê pang-chān.

13Siōng Chú hō͘ in thóng-tī tōe koân ê só͘-chāi, hō͘ in chia̍h chhân-iá ê thó͘-sán, tùi chio̍h-phāng suh bi̍t, tùi chio̍h-thâu tōe tit-tio̍h kaⁿ-ná-iû;

14koh chia̍h gû-lin chòe ê chhì-jù, iûⁿ-lin, iûⁿ-á-kiáⁿ ê iû, Pa-san ê mî-iûⁿ-káng, soaⁿ-iûⁿ, kap siōng-hó ê sió-be̍h, mā lim phû-tô-chiú.

15Í-sek-lia̍t pûi chiū sáng-sè; lí í-keng tōa-kho͘ koh chho͘-ló͘, phê-bah kim-ku̍t, chiū khì-sak chhòng-chō lí ê Siōng-tè, khòaⁿ-khin kái-kiù lí ê Chio̍h-pôaⁿ.

16In ēng pa̍t-ê sîn-bêng kek I oàn-tò͘, pài khó-ò͘ⁿ ê ngó͘-siōng jiá I siū-khì.

17In chè-pài kúi-sîn, chiah-ê kúi-sîn m̄-sī Siōng-tè, sī in m̄-bat ê sîn-bêng, sī sin--ê, kūn-lâi chiah ū--ê, sī lín ê lia̍t-chó͘ bô teh kiaⁿ--ê.

18Siⁿ lín ê Chio̍h-pôaⁿ, lín bô khòaⁿ-tāng I; siⁿ lín ê Siōng-tè, lín bōe-kì-tit I.

19Siōng Chú khòaⁿ--kìⁿ, chiū pàng-sak in, in-ūi I ê kiáⁿ cha-bó͘-kiáⁿ jiá I siū-khì.

20I chiū kóng: Góa bô beh koh chhap in, beh khòaⁿ in ê kiat-kio̍k án-chóaⁿ; in sī khúi-khiat ê sè-tāi, bô tiong-si̍t ê kiáⁿ-jî.

21In pài m̄-sī Siōng-tè ê sîn-bêng, kek góa oàn-tò͘; in pài ngó͘-siōng, jiá góa siū-khì; góa chiū ēng m̄-chiâⁿ bîn-cho̍k ê jîn-bîn, kek in oàn-tò͘, ēng gû-gōng ê kok-bîn, jiá in siū-khì.

22Góa siū-khì ê hé teh to̍h, to̍h kàu Im-kan ke̍k-chhim ê só͘-chāi, sio-bia̍t tāi-tōe kap it-chhè ê thó͘-sán, thun-bia̍t soaⁿ ê kun-ki.

23Siōng Chú koh kóng: Góa beh put-toān ēng chai-hō kong-kek in, ēng góa chìⁿ-tē lāi só͘-ū ê chìⁿ siā in.

24In in-ūi ki-hng siau-sán, hō͘ iām-jia̍t kap un-e̍k thun-bia̍t, hō͘ iá-siù kā--tio̍h, siū to̍k-chôa kong-kek.

25Gōa-bīn ū to-kiàm, lāi-bīn ū kiaⁿ-hiâⁿ, hō͘ siàu-liân-lâng kap chāi-sek-lú, chia̍h-lin ê eⁿ-á kap pe̍h thâu-mn̂g ê lāu-lâng lóng bia̍t-bông.

26Góa goân-pún beh thiat-tóe siau-bia̍t in, hō͘ sè-kan-lâng bōe-kì-tit in ê miâ.

27M̄-kú, góa kiaⁿ in ê tùi-te̍k chū-khoa, kiaⁿ-liáu in gō͘-hōe, kiaⁿ-liáu in ōe kóng, “Sī goán phah-pāi Í-sek-lia̍t, m̄-sī Siōng Chú ê chok-ûi.”

28In sī bōe-hiáu siūⁿ ê bîn-cho̍k, bô chi̍t-sut-á tì-sek.

29Khó͘-bōe-tit in ū tì-hūi, ōe bêng-pe̍k chit-ê sū, ōe-hiáu siūⁿ ka-kī ê kiat-kio̍k.

30Nā m̄-sī in ê Chio̍h-pôaⁿ kā in bōe hō͘ lâng, nā m̄-sī Siōng Chú khì-sak in, in ê tùi-te̍k ná ōe chi̍t ê phah-pāi in chi̍t-chheng ê, nn̄g ê hō͘ in chi̍t-bān ê tô-cháu?

31In ê chio̍h-pôaⁿ bô chhin-chhiūⁿ lán ê Chio̍h-pôaⁿ, lán ê tùi-te̍k mā án-ni sêng-jīn.

32Tùi-te̍k ê phû-tô-chhiū sī Só͘-to-má ê chéng, tùi Gô-mô͘-la ê hn̂g sóa--lâi-ê; in ê phû-tô sī to̍k phû-tô, kui-pha lóng sī khó͘--ê.

33In ê chiú sī tōa-bé chôa ê to̍k, sī to̍k-chôa tì-miā ê to̍k.

34Siōng Chú chiong tùi-te̍k só͘ chòe ê pháiⁿ, lóng hong-ba̍t tī I ê hú-khò͘.

35Sin-oan pò-èng chāi-tī Siōng Chú, sî-ki chi̍t-ē kàu I ōe kā in pò-èng; in tú-tio̍h chai-lān ê ji̍t kūn lah, ōe chin-kín siū hêng-hoa̍t.

36Siōng Chú beh ūi-tio̍h I ê chú-bîn sin-oan, beh lîn-bín I ê po̍k-jîn, in-ūi I khòaⁿ-kìⁿ in khùi-la̍t í-keng bô--khì, chū-iû--ê kap bô chū-iû--ê, liân chi̍t ê to bô lâu--teh.

37I beh kóng: In ê sîn-bêng tī tó-ūi? In óa-khò ê chio̍h-pôaⁿ tī tó-ūi?

38Hiah-ê chia̍h in hiàn-chè ê iû, lim in tiān-chiú-chè ê chiú ê sîn-bêng, taⁿ tio̍h khí-lâi pang-chān in, pó-hō͘ in.

39Taⁿ, lín tio̍h chai, chí-ū góa sī Siōng-tè, góa í-gōa bô pa̍t-ê sîn-bêng; góa hō͘ lâng sí, mā hō͘ lâng oa̍h; góa phah-siong lâng, mā i-tī lâng; bô lâng ōe-tàng tùi góa ê chhiú-thâu kái-kiù in.

40Góa ǹg thiⁿ gia̍h-chhiú, ēng góa éng-oán ê oa̍h-miā li̍p-sè, kóng:

41Góa beh chiong góa kim-siak-siak ê to bôa-lāi, chip-hêng sím-phòaⁿ, pò-ho̍k góa ê tùi-te̍k, pò-èng oàn-hūn góa ê lâng.

42Góa beh hō͘ góa ê chìⁿ lim-huih, lim hiah-ê siū-thâi siū-lia̍h chiàn-sū ê huih; góa ê to beh chia̍h-bah, chia̍h tùi-te̍k hiah-ê tn̂g thâu-mn̂g ê léng-siù ê bah.

43Lia̍t-kok ah, tio̍h kap Siōng Chú ê chú-bîn chòe-hé hoan-ho͘; Siōng Chú beh ūi-tio̍h I ê po̍k-jîn só͘ lâu ê huih sin-oan, pò-ho̍k I ê tùi-te̍k, sio̍k-hôe I ê tōe kap I ê chú-bîn.

44Mô͘-se kap Lūn ê kiáⁿ Iok-su-a chòe-hé lâi, chiong chit-siú koa liām hō͘ hōe-chiòng thiaⁿ.

45Mô͘-se chiong chiah-ê ōe lóng kóng hō͘ Í-sek-lia̍t chèng-lâng thiaⁿ liáu-āu,

46koh tùi in kóng, “Góa kin-á-ji̍t kéng-kài lín ê ōe, lín tio̍h ōe-kì--tit, mā tio̍h hoan-hù lín ê hō͘-tāi chhiat-si̍t chun-hêng chit-ê lu̍t-hoat it-chhè ê ōe;

47in-ūi chit-ê lu̍t-hoat tùi lín m̄-sī khang-khang bô lō͘-ēng, sī lín ê sìⁿ-miā; chit-ê lu̍t-hoat ōe hō͘ lín tī kè Iok-tàn-hô beh chiàm-léng ê tōe kú-tn̂g khiā-khí.”

48Hit-ji̍t, Siōng Chú hoan-hù Mô͘-se, kóng,

49“Lí tio̍h khì Iâ-lī-ko tùi-bīn ê Mô͘-ap -tōe, chiūⁿ-khì A-pa-lîm soaⁿ-khu ê Nî-pho-soaⁿ, khòaⁿ góa beh siúⁿ-sù hō͘ Í-sek-lia̍t -lâng chòe ke-gia̍p ê Ka-lâm -tōe.

50Lí ōe sí tī lí chiūⁿ--khì ê soaⁿ, chhin-chhiūⁿ lí ê hiaⁿ-ko A-lûn sí tī Hô-ní-soaⁿ, tò-khì lín ê lia̍t-chó͘ hia.

51In-ūi lín nn̄g ê tī Sîm ê khòng-iá, Ka-te-su ê Bí-lī-pa chúi-chôaⁿ, tī Í-sek-lia̍t -lâng tiong-kan tek-chōe góa, bô chun góa chòe sèng.

52Lí thang khòaⁿ tùi-bīn hit-ê tōe, m̄-kú bōe-tàng ji̍p-khì góa siúⁿ-sù hō͘ Í-sek-lia̍t -lâng ê tōe.”