Deuteronomy 11

Zande

← Chapter 10 Jump to: Chapter 12 →

1“Si du oni nikpí nyemu Yekova nga gaoni Mbori, ki nimangi pa gako sunge na uru, na gako rugaapai, na gako asarangbanga, na gako arugute.

2Oni bérẽ pa ha areme bambiko mi afura nga na agu awironi nga agu yo aina nga ha ya te, naabi nga gu rugahe nga ga Yekova gaoni Mbori a ya, oni ki berẽ pa gu rugapai nga ga Yekova gaoni Mbori na pa du ko nga bahe, pa du beko nyanyaki, na pa taã ko beko,

3na gako yuguyuguapai, na gako mangaapai, ko amangi Ezipeta yo fu Faro nangia bakindo aEzipeto, na fu gako ringara dunduko;

4na gu pai ko amangi fu ga Ezipeta rimbasa aborosovura, fu gayo afarasi, na fu gayo angbagidavura; na waĩ ko amangi gu ime nga ga Zamba Baime si fu ri yo wa i ado fuo roni, na waĩ Yekova agbarasi yo ki da ku areme;

5na agu apai ko amangi fu roni ngbakungba yo, dati ye oni ku rogo gi ba re;

6na gu pai ko amangi fu Datana na Abirama nangia awiri Eriaba, Eriaba ki ngia wiri Rubena; waĩ sende aza ngbaha ka mbira yo dũ, na gayo aborokporo, na gayo abamburoko, na gu ungaahe dũ naapeka yo, dagba aYisaraere dunduko.

7Ono bangironi abi ga Yekova bakere mangaapai dunduko ko amangi.

8“Si du ka oni ká kuti gu rugute ti ni dunduko nga gu rugu mi roni na ni ni gi uru re, oni ki du nyanyaki, ka ndu ka dia ringara ni gaoni, ho oni ka si ni ka dia ha.

9Oni ki ima aima rogo gu ringara re, nga gu Yekova azunga he fu abaroni ka fu he fu yo na fu angbatungayo, gu ringara du adu na mamuanya na nzeme anyege kpaima.

10Bambiko gu ringara re oni andu koyo ka dia ha ni gaoni, si wa ringara Ezipeta yo oni akuru ni te, yo oni arũ gaoni tunga ni, ki nitudi he ni nduroni, wa ati akpepasio;

11ono gu ringara oni andu tigaoni ka dia ha, si nga ringara abaagangara na angboongboorago, nambira ime mai nga ga ngbangbaturũ,

12gu ringara Yekova nga gaoni Mbori nabanda ha, du bangiri Yekova gaoni Mbori ku ri he na uru, tona ti tona garã ki da ti digida garã.

13“Si ayé ka du wa gere, ka oni dége turoni sirisiri sa gimi arugute nga gu mi aruga roni na ni ni gi uru re, ka akpi nyemu Yekova gaoni Mbori, ka amanga pa ko na kpotoroni yo dũ na mbisimoroni dũ,

14mi afú mai tipa gaoni ringara ti regboho, bambata mai na yangara ha, ya oni dúngura gaoni zende ahe, na gaoni imekakue, na gaoni nzeme.

15Mi ki fu nvuo ku rogo gaoni banambu tipa gaoni zogozogo anya, oni ki niri riahe ki nimbiki.

16Oni bánda tironi gu pai ka nanga kpotoroni yo, oni ki sa tironi ku bani, ka manga pa kura ambori, ka irisa ha,

17ga Yekova zinga ki rungudi kuti roni, ko ki kisi angbangbaturũ, ka mai aná nga ya, ka sende azú nga gaha zuzuhe ya, oni ki kpiki ni ipo rogo gu wene ringara Yekova afu fu roni.

18“Si du oni ka iga gi gimi apai ti ni re ku kpotoroni yo na ku mbisimoroni yo a; oni avóda ha ti beroni tipa yuguyuguhe, si ki du ti bangbanda kpakpuroni a.

19Oni ka yugo ho fu awironi, ki nigumba pa ha, ho oni ka nisungu ni dimo kpuroni yo, na ho oni ka nita ni ngba gene, na ho oni ka pi ni, na ho oni ka niguari ni ku ari a.

20Oni ki nike he ti gaoni angua angbadimo, na ti vuro gaoni angbadimo bakporo,

21gaoni arame ki du ni gizasigizasi he na ga awironi a rogo gu ringara Yekova azunga he fu abaroni ka fu he fu yo, wa pa agu arame angbangbaturũ anye ku ari yo ri kpotosende.

22Bambiko ka oni ka kuti gu rugute dunduko sirisiri nga gu rugu mi roni oni nimángi he, ka kpi nyemu Yekova gaoni Mbori, ka peka fuo gako apai, ka ka kuti ko,

23si du Yekova ka do agi arikaaboro ti tii re barangba roni, oni ki di arikaaboro ni gaoni yo nga bakiki pa yo nga airaome ki susi roni.

24Agu arago dunduko nduroni ka simba ha si adú ni gaoni; gaoni bangbanda ringara atóna ngbakungba yo, na Rebanona yo na ti Di nga Ferata, ki da ti gu baime du ku dioyo.

25Boro adu nga yo sa nikarengba na ru barangba roni te; Yekova gaoni Mbori abá gunde roni na inwo roni rogo gu ringara dũ oni ka ndu rogo ho, wa ko agumba pa ha fu roni.

26“Oni ngere, mi ringbisi maku na inotiwa fu roni ni gi uru re:

27maku fu roni ka oni dege turoni sa ga Yekova arugute nga gaoni Mbori, nga gu rugu mi roni kuti ni ni gi uru re;

28motiwa fu roni ka oni adega nga turoni sa agu arugute nga ga Yekova gaoni Mbori ya, oni ki sa tironi ku bani ti gu pai rugu mi roni kuti ni ni gi uru re, ka ndu fuo kura ambori nga agu ahe oni aina nga ha ya.

29Ho Yekova gaoni Mbori ka ye ni na oni ku rogo gu ringara oni andu ka dia ha ni gaoni, oni ki moi maku ri Bagangara Gerizima, na motiwa ri Baga ngara Ebara.

30Ati si mbiti Yaradene yo? gii gu gene nandu koyo uru nati ku ho ni, rogo gu ringara aKanano naaraka rogo ho kpasakpasa rago yo, pati Girigara, pati gu gero du More yo te?

31Oni ka si Yaradene ka ndu ka dia gu ringara Yekova gaoni Mbori afu fu roni; oni adia ha ni gaoni, ki niraki rogo yo,

32oni ki niberẽ pa manga gu rugaapai na gu asarangbanga nga gu ringbisi mi he ku bangironi ni gi uru re.

← Chapter 10 Jump to: Chapter 12 →