Deuteronomy 30

Zande

← Chapter 29 Jump to: Chapter 31 →

1“Ho agi apai re ka ye ni ku ri roni dunduko, maku na motiwa, nga gu ringbisi mi he fu roni, oni ki nitingidi pa ha dagba agu arikaaboro dunduko yo Yekova gaoni Mbori ka do roni ku ho ni,

2oni ki karaga tironi fu Yekova gaoni Mbori, oni na awironi, oni ki nigi fugoko kuti agu apai dunduko rugu mi roni na ni ni gi uru re, na kpotoroni yo dũ, na mbisimoroni dũ;

3Yekova gaoni Mbori ka karaga pa du oni ni zizi roni, nunga roni ki du ti ko, ko ki karaga roni ki dungura roni be aboro dunduko, yo Yekova gaoni Mbori agbandaka roni ku ho ni.

4Ka gaoni merẽsimerẽsi aboro du rogo gu tuturu papara arago nga ga zegino, Yekova gaoni Mbori adungura yo yo, yo ko ka yega ni na yo.

5Yekova gaoni Mbori ki ye na oni ku rogo gu ringara nga gu abaroni adi he, ni ukumbo, oni ki di he ni gaoni. Ko ki mangi wenepai fu roni, ki ngeesi roni, ki susi abaroni.

6Ono Yekova gaoni Mbori ayéra kpotoroni yo ni yeratise, na kpoto awironi yo a, oni nikpí nyemu Yekova gaoni Mbori na kpotoroni yo dũ, na mbisimoroni du, oni ki nye ni ungaroni.

7Yekova gaoni Mbori ki moi agi amotiwa re kina ku ri avuraroni, na ku ri agu yo nasoga roni, nga agu yo narungosi roni.

8Oni ki karaga tironi ka gia fugo Yekova berewe, ka manga gako arugute dunduko nga gu rugu mi roni na ni ni gi uru re.

9Yekova ki zugasi roni ni dungu he rogo gu sunge nga ga beroni, rogo gu vungu oni ka vunga na rogo gaoni zogozogo anya, na rogo zuzuhe nga ga gaoni sende, tipa wenepai; bambiko Yekova angí tipa roni berewe, ka manga pa roni wenengaĩ, wa ko angi tipa abaroni;

10ka oni gi fugo Yekova gaoni Mbori, ka ka kuti gako arugute na gako rugaapai du ni keke he rogo gi kitabu nga ga rugute re, ka oni sa tironi fu Yekova gaoni Mbori na kpotoroni yo dũ, na mbisimoroni dũ.

11“Bambiko gi rugute mi aruga roni na ni ni gi uru re, si ni kpakarakpakara ha fu roni ki susi te, turũ nga ha a te.

12Si ngbangbaturũ yo te, ka oni ya, ‘Da nikandu fu rani ku ngbangbaturũ yo, ka ye na ni fu rani, ani gi he, ki mangi he?’

13Si mbiti baime yo a te, ka oni ya, ‘Da nikasi baime fu rani, ka ye na ni fu rani, ani gi he, ki mangi he?’

14Ono gu pai re si kina mbembedi na oni, si kina ngbaroni, na kpotoroni yo, ka oni mangi he amanga.

15“Oni bí, mi ringbisi unga na wenepai fu roni ni gi uru re, na kpio na gbegberẽpai.

16Ka oni ka kuti agu arugute nga ga Yekova nga gu mi naruga roni na ni ni gi uru re, ki nikpi nyemu Yekova gaoni Mbori, ki nipeke fuo gako apai, ki nika kuti gako arugute na gako rugaapai na gako asarangbanga, si oni ka nye ti ni ni ungaroni ki nge ange, Yekova gaoni Mbori ki fu maku fu roni rogo gu ringara oni andu ku ho ni ka dia ha.

17Ono ka ngbaduroni yo sa tihe ku sa yo, ka oni akpí nga nyemu ka gia pai ya, oni ki du ni gbegbe roni ku sa yo, ki niirisi kura ambori ki nimangi pa ha,

18mi taki pande he fu roni areme, ya oni akpíka akpika ni rengo; oni aíma nga rogo gu ringara te re yo oni asi Yaradene ku ho ni ka dia ha.

19Mi yambu ngbangbaturũ na kpotosende si du ni dezire kuti roni areme, ya mi ringbisi unga na kpio fu roni, maku na motiwa, si du oni sia unga, oni ki nye ni ungaroni, oni na awironi a,

20ka akpi nyemu Yekova gaoni Mbori, ka agia fugoko, ka aka kuti ko; bambiko ko nga gaoni unga, nga bagiza gaoni arame, oni ki niraki rogo gu ringara nga gu Yekova azunga he fu abaroni, fu Abarayama, fu Yisaka, na fu Yakoba a, ka fu he fu yo.”

← Chapter 29 Jump to: Chapter 31 →