Deuteronomy 6

Zande

← Chapter 5 Jump to: Chapter 7 →

1“Were gere nga gu rugute re, rugaapai, na asarangbanga nga gu Yekova arugu he mi yugu he fu roni, oni tigaoni nimángi he rogo gu ringara oni asi ku rogo ho ka roga ha.

2Oni ki rengbe na gunde ti Yekova gaoni Mbori, ka ka kuti gako rugaapai na gako arugute, gu rugu mi roni kuti ni, oni na awironi, na awiri awironi, rogo agu arame dunduko oni ka du ni ni ungaroni; oni ki ima aima gbe.

3Ako aYisaraere, si du oni gí he ka berã pa manga ha; si ki du ni wenepai fu roni, oni ki nizuga azuga ni dungu roni, a wa Yekova nga ga abaroni Mbori akido he fu roni rogo gu ringara du adu na mamuanya na nzeme anyege kpaima.

4“Ako aYisaraere, oni gí he; Yekova gaoni Mbori nga kina Yekova sa;

5oni kpí nyemu Yekova nga gaoni Mbori na kpotoroni yo du, na mbisimoroni dũ, na omeroni dũ.

6Ono agi apai re, nga gu mi aruga roni kuti ni areme, si du ku kpotoroni yo;

7oni ki niyugu he fu awironi sirisiri, ki nipeke pa ha fu yo ho oni ka nisungu ni rogo gaoni bambu, ho oni ka nita ni gene a, ho oni ka nipi ni sande a, na ho oni ka niguari ni ku ari a.

8Oni ki nivodi he ni yuguyuguhe ti beroni, si ki du ni gu he i ka bi he bangbanda kpakpuroni a.

9Oni ki nike he ti gaoni angua angbadimo, na ti vuro gaoni angbadimo bakporo.

10“Ho Yekova gaoni Mbori ka ye ni na oni ku rogo gu ringara ko azunga he fu abaroni, nga Abarayama, na Yisaka, na Yakoba, ka fu ne fu roni, nga bakere abaakporo ni wene he, nga gu oni adudua nga ha ya,

11na abambu hi ahi na wene ahe, nga gu oni ahisa nga ha na ni ya, na agu adueime ni getekegeteke he, oni ageteka nga ha ya, aati bakakue na angua aeraya, nga gu oni arũka nga ha a ya, oni aniri he ki nimbiki,

12oni ki nibanda tironi bangironi ka go ti Yekova nga gu ko nakusi roni ringara Ezipeta rogo kporo akanga yo.

13Oni ki nigunde ti Yekova gaoni Mbori, oni ki nimangi pa ko, ki nizunga he ni rimoko.

14Ka oni apéka nga fuo kura ambori ya, nga agu ambori nga ga agu aboro du pati roni kirikiri a ya;

15bambiko Yekova gaoni Mbori kina dagba roni nga iraringo Mbori; ga Yekova zinga ka runguda kuti roni, nga gaoni Mbori; ko ki gbarasi roni ku sa yo auru kpotosende.

16“Ka oni aásada nga Yekova nga gaoni Mbori, wa oni aasadi ko Masa yo ya.

17Oni ki ka kuti ga Yekova arugute sirisiri nga gaoni Mbori, na gako dezireapai, na gako rugaapai, nga gu ko arugu roni na ni.

18Oni ki nimangi gu pai ru aru du ni wenepai bangiri Yekova, si ki du ni wenepai fu roni, oni ki ndu ka dia gu wene ringara nga gu Yekova azunga he fu abaroni tipa ha,

19ka bafa avuraroni dunduko barangba roni, wa Yekova agumba ha.

20“Ni gu rago ka awironi sana roni ku mbata yo, niya, ‘Gini pai gu dezireapai ayugo ho re, na rugaapai, na asarangbanga, nga gu Yekova gaani Mbori arugu roni na ni?’

21Oni aniya fu awironi, ‘Ani adu ni ga Faro akanga Ezipeta yo; Yekova ki kusi rani Ezipeta yo ni nyanyaki beko;

22Yekova ki yugu yuguyuguhe na iiriwo yuguyuguapai, ni bakere he ni kere he, ku ri Ezipeta, ku ri Faro a, na ku ri gako aborokporo dunduko, kina ku bangirani.

23Ko ki kusi rani yo, ka rimisa rani ku rogo gu ringara ko azunga he fu abarani tipa ha ka fu he fu rani.

24Yekova ki rugu rani ani nimángi agi arugapai dunduko re, ka gunde ti Yekova gaani Mbori, tipa gaani wenepai na auru, ya ko nikabanda rani ni ungarani, wa du he ni gi uru re.

25Si adú ni rurupai fu rani, ka ani aberã pa manga agi arugute re dunduko ku bara bangiri Yekova gaani Mbori, wa ko arugu rani.’

← Chapter 5 Jump to: Chapter 7 →