Deuteronomy 22

Zande

← Chapter 21 Jump to: Chapter 23 →

1“Ka oni bi ga awirinaroni babagara watadu gayo kandoro u ningbuo, ka oni óko nga pa ru ya. Oni aniye na u fu awirinaroni berewe ni rengo.

2Ka awirinaroni adu nga mbembedi na oni ya, watadu oni aina nga yo te, oni ki yega na u kina ku kpuroni yo, u ki du ho be roni daho awirinaroni ka gbata ru ni; oni ki karaga ru fu yo berewe.

3Si du kina wo oni ka nimángi tipa gayo dongi, kina wo oni ka manga na gayo roko, na agu ahe dunduko nainga nga ga awirinaroni, a nga gu ingi be yo, oni ki bi he, ka oni aóka nga pa ha ya.

4Ka oni bi ga awirinaroni dongi watadu gayo babagara u ti bangiri gene, ka oni óko nga pa ru ya. Oni aniunda yo ni rengo ka tumba ru ku ari berewe.

5“Ka ade úkadi nga gu roko nga ga akumba ya, ka akumba úkadi nga ga ade roko a ya; bambiko gu ni mangi agi apai re nga kere gbegberẽ sino boro bangiri Yekova gaoni Mbori.

6“Ka bambuzire ti ku bangiri gene barangba roni, rogo ngua watadu si nidu sande, na awiru watadu apararu rogo ho, nara ki sungu ri ra, watadu ri pararu, oni anidi nga nara na awiru te.

7Oni animbu nara ambu u ga, oni ki rogo kina awiru ni gaoni ra. Si ki du ni wenepai fu roni, oni ki ima aima gbe.

8“Ho oni ka nidua vovo bambu ni, oni ki nivo ndugu ri he yo kirikiri, ka ngbanga kure du nga ku ri gaoni bambu mbiko boro zutuka yo ka ti ya.

9“Ka oni rũ nga ngbatunga atunga ue rogo gaoni ati bakakue sa ya; agu azuzuhe dunduko ka gberã agberã, gu tunga oni arú, na gu ka zuga nga bakakue.

10Ka oni nivódi nga babagara na dongi ami sopo bino wa sa ya.

11Ka oni niúkadi nga gu remu i atu he ni mange nya na giri nzibi wa sa ya.

12“Oni animangi ngba gaoni gbanga roko wa du he biama ni zawizawi he, nga gu oni ka dada tironi na ni.

13“Ka gu kumba di de, ki ndu fuo ri, ki nisogo ri asoga,

14ki gumba pa zee kuti ri, ki yambu gbegberẽ rimo ku ri ni, ki ya. ‘Mi adi gi de re, ho mi ambedi ni na ri, mi abi nga ri ni ngasu de te.’

15Si du ba gu degude re na nari ki rogo gu ũ pa ngasu de nga ga degude ki yugu he fu abaakumba ngbadimo bakporo yo;

16ba degude ki ya fu abaakumba wẽ, ‘Mi afu wire fu gi kumba re ni diako, ono ko nasoga ri asoga.

17Oni ngere, ko gumba pa zee kuti gari pai, niya, “Mi abi nga wiro ni ngasu de te.” Ono gere nga agu aũ pa du ni ngasu de nga ga wire.’ I ki gbaragi gu roko re bara bangiri abaakumba nga ga bakporo yo.

18Agu abaakumba re nga ga bakporo yo ki di gu kumba re ki ta ko.

19I anigedi marã mbusa fu ko nga asekere feda 100, ki fu ra fu ba degude, bambiko ko ye na gbegberẽ rimo ku ri gu ngasu de nga ga aYisaraere ri. Ri ki du ni kina diako, ka ko ambú nga ri wa du ko ni ungako wa sa ya.

20Ono ka gu pai re du ni rengo, ya i abi nga ũ pa ngasu de ti gu degude re te,

21i ki ye na gu degude re ku ngbadimo ku bari yo, aboro gari bakporo ki sopo ri ni ambia ri ki kpi, bambiko ri mangi mumungo pai ku dagba aYisaraere, ni manga pa bari ku bari yo. Si du oni ka nidi gbigbitapai ti ni ku sa yo dagba roni.

22“Ka i bi kumba ni nira na dia kura boro, i aniimi yo wa du yo ue, gu kumba ra na de, na de a. Si du oni ka nidi gbigbitapai ti ni dagba aYisaraere ku sa yo.

23“Ka ngasu de du ho i apazua ri fu kumba, kura kumba ki bi ri bakporo yo, ki ra na ri,

24oni ki kusi yo ue ku ngbadimo gu bakporo re oni ki sopo yo ni ambia i ki kpiki, degude bambiko wa ri ata nga wawa wa ri adu kina rogo bakporo ya; na gu kumba re a, bambiko ko payasi pa dia kura ko. Si du oni ka nidi gbigbitapai ti ni ku sa yo dagba roni.

25“Ka kumba bi pazuapazua degude haurago yo, kumba ki darĩ ri adarã, ki ra na ri, kina gu kumba ra na ri ko nikanikpi.

26Ono ka oni amánga nga degude ni pai ya; a nga pai ho tipa degude re na kpio te, bambiko ho boro nizingi ni kuti kura ni, ki imi ni, kina wo du gi pai re;

27mbiko ho ko abi ri ni haurago yo, gu pazuapazua degude re akpari, ka boro adu nga ho ka batasa ri ya.

28“Ka kumba bi degude nga ngasu de, i apazua nga ri ya, ki zi ri, ki ra na ri, i ki bi yo,

29si du gu kumba nira na ri afú asekere feda 50 fu ba gu degude re, ri ki du ni diako, bambiko ko payasi pa ri. Ka ko ambú nga ri wa du ko ni ungako ya.

30“Kumba adía nga dia bani te, ka ni aúra nga ga bani baukadi ya.

← Chapter 21 Jump to: Chapter 23 →