Deuteronomy 17

Zande

← Chapter 16 Jump to: Chapter 18 →

1“Oni anifu nga babagara ni motumo, watadu kandoro du na serõ ti kpotora te, watadu gu ru i nasoga ru tipa kura pai, bambiko gure nga kere gbegberẽ sino bangiri Yekova gaoni Mbori.

2“Ka i bi boro dagba roni, rogo gu kporo nga gu Yekova gaoni Mbori afu he fu roni, kumba watadu de, gu ni mangi gu pai nga gbigbita ha bangiri Yekova gaoni Mbori, ni ti ndika gako zungahe,

3ka ndu ka irisa kura ambori, ki niirisi he watadu uru, watadu diwi, watadu rimbasa agu ahe du ngbangbaturũ yo, nga gu mi aka na pa ha be roni;

4i ki gumba pa ha fu roni, oni ki gi pa ha, oni ki nisana he sirisiri, oni ngére, ka si du ni rengo, gu pai re ki du ni rengo nzunzu, ya i namanga ngbatunga gu kere gbegberẽ sino re dagba aYisaraere;

5oni ki nikusi gu kumba re watadu gu de re nimangi gu gbigbitapai re, ku ngbadimo kpuroni, kumba watadu de a; oni ki nisopo ni ni ambia, ni ki kpi akpi.

6Ku sangba adezire yo ue, watadu adezire biata, i ka niimi gu ni i akaimo ni; i aniimi nga boro ku sangba dezire yo sa te.

7Kina adezire nikanimoi beyo mbata ti ni i nikaimo ni, fuo gure be kura aboro ki ye. Si du oni ka dia gbigbitapai ti ni dagba roni ku sa yo.

8“Ka pai dũ ho ni nyanyaki he fu roni tipa sarangbanga ha, watadu tipa pa imo boro, watadu dagba boro bape na irabape, watadu dagba gu ni ta yo ni, na gu ni nata ni, watadu pa paa rogo gaoni kporo, oni ki guari, ki ndu ku rogo gu ba Yekova gaoni Mbori ka sia ha,

9oni ki niye koyo du aboromotumo ni na aRevi, na koyo du gu basaringbanga ni du ni gu rago re, ki gumba gu ngbanga re fu yo; i ki yugu sarangbanga fu roni.

10Oni ki nimangi he kina kuti pa gu sarangbanga i nisari he fu roni, nga gu i ka yugo fu roni rogo gu ba Yekova ka sia ha. Oni ki berẽ pa manga agu apai du tipa kina gu pai i ka yugo ho fu roni;

11kina kuti gu rugute ka i rugu roni na ni, na kuti gu sarangbanga ka i gumba ha fu roni, kina si oni ka nimangi he. Oni anisa nga sarangbanga ku bani ti gu i niyugu fu roni te, ku kumbabe na ku garebe yo a te.

12Ono gu boro ka manga pai ni ruka ka ni adéga nga tuni fu boromotumo nga gu ni ru ka manga sunge bara bangiri Yekova gaoni Mbori ya, watadu fu basaringbanga a ya, i aniimi ni aimo; si oni ka dia gbigbitapai ti ni ku sa yo ti aYisaraere,

13Aboro anigi he agia dunduko ki gunde, ka i amánga nga pai ni ruka berewe ya.

14“Ho oni ka da ni ku rogo gu ringara nga gu Yekova gaoni Mbori afu he fu roni, oni ki di he ni gaoni, ki niraki yo; ki niya. ‘Ani amáa bakindo ku ri rani, wa agu arikaaboro dunduko du pati rani kirikiri’.

15Oni amáa ni ni bakindo ku ri roni ni rengo, gu ni Yekova gaoni Mbori ka sia ni. Boro sa dagba awirinaroni yo oni ka maa ni ni bakindo ku ri roni. Oni amáa nga kungba boro ku ri roni te, angia nga gumeroni ya.

16Ono ni angéesa nga afarasi tipa ni, watadu ni akáraga nga aboro ku Ezipeta yo a te, ka ngeesa afarasi a te, bambiko Yekova gumba ha fu roni, ‘Oni akáraga nga tironi ngba gu gene re berewe te.’

17Ni aróga nga dungu ade te, ngbaduni ka sa tihe; ni adúngura nga feda na dahabu ni bakere he ni gani a te.

18“Si adú were, ho ni ka sunga ni auru gani mbatabakindo nga ga gani ngbi, ni aké kpia gi ndika re tipa ni ku rogo kitabu, gu du be aboromotumo na aRevi a;

19si ki du be ni, ni agéda agu apai du yo dedede wa du ni ni ungani, ya ni wiriki pa gunde ti Yekova gani Mbori, ka ka kuti agu apai dunduko nga ga gi ndika re na gi rugaapai re, ka amanga ha;

20ka ni kíisi nga pa tini ki susi pa awirinani ya, ka ni asáka nga tini ti sangba rugute ku bani ku kumbabe watadu ku garebe yo ya; ya ni ima aima rogo gani ngbi, ni na awirini dagba aYisaraere.

← Chapter 16 Jump to: Chapter 18 →