Deuteronomy 31

Zande

← Chapter 30 Jump to: Chapter 32 →

1Mose ki nigumba agi apai re dunduko fu aYisaraere kindi.

2Ko ki ya fu yo, “Garãre awere nga 120, ki da ku areme. Mi arengba nga ka ndu sa pai na ka yega berewe te. Ono Yekova aya fere wẽ, ‘Mo así nga gi Yaradene te re.’

3Yekova gaoni Mbori, ko nikasi ki ngbe ku mbata yo fu roni ku mbiti yo; ko tigako agbárasa agi arikaaboro re barangba roni, oni ki di bayo. Yosua ko nikasi ki ngbe ku mbata yo fu roni, wa gumba Yekova ha.

4Yekova amánga fu yo wa ko amangi fu Siona na Ogo, nangia abakindo aAmoro, na fu gayo aringara, nga agu yo ko agbarasi yo.

5Yekova afu yo dunduko ku be roni, oni amánga fu yo kina kuti gu rugute nga gu rugu mi roni na ni.

6Oni dú nyanyaki ki du na bakere era, ka oni gúnde nga be yo ya, ka gbudagbuda zí nga roni a ya, bambiko Yekova gaoni Mbori nga gu ko nandu na oni, ko ahé nga unda roni te, ko ambú nga roni a te.”

7Mose ki yambu Yosua, ki ya fu ko ku bangiri aYisaraere dunduko, “Mo dú nyanyaki ki du na bakere erá; bambiko mo nikandu na agi aboro re ku rogo gu ringara Yekova azunga he fu abayo ka fu he fu yo. Mo nikaunda yo i di he ni gayo.

8Yekova nga gu ko nikangbe mbata yo foro, ko adú na mo, ko ahé nga unda ro te, ko ambú nga ro a te; ka mo nigúnde nga ya, ka mo niyúngura nga a ya.”

9Mose ki ke gi rugute re, ki fu he fu aboromotumo nangia awiri Revi, nga agu yo nanatinda sanduki mokido nga ga Yekova, na fu abaakumba dunduko nga ga aYisaraere yo.

10Mose ki rugu yo, niya, “Ti digida asaba garã dunduko, rogo gu ringbisiringbisi rago nga ga gu garã nga ga mbu pa bape, rago pumbo abasura,

11ho aYisaraere ka nikuru ni ku bangiri Yekova gaoni Mbori ku rogo gu ba nga gu ko ka sia ha, oni anigedi gi rugute re ku bangiri aYisaraere dunduko ku tuyo yo.

12Oni dúngura aboro, akumba na ade na rukutu agude, na gaoni kungba aboro nga agu yo du kpuroni yo, i nigí he, ki niwiriki he, ki nigunde ti Yekova gaoni Mbori, ki niberẽ pa manga agu apai nga ga gi rugute re dunduko,

13ya agu awiriyo naina nga pa ha ya, i ki gi he, ki wiriki pa gunde ti Yekova gaoni Mbori, ti agu arago a wa oni ka araka rogo gu ringara yo, oni akasi ku ho ni ku mbiti Yaradene yo ka dia ha.”

14Yekova ki ya fu Mose, “Mo ngére, iamero mbedi mo kpi. Mo yámbu Yosua, ki kuru ku ngbadimo bamburoko dunguiati yo, ya mi asia pai fu ko.” AMose na Yosua ki ndu, ki kuru ku ngbadimo ba mburoko dungurati yo.

15Yekova ki kuru ku bamburoko yo rogo bakamikami dubo; bakamikami dubo ki ru ri ngbadimo bamburoko.

16Yekova ki ya fu Mose, “Mo ngére, mo nikakpi fuo atitaro; ono agi aboro re nikaguari ka ndu ka manga pai ni sino pa bari na kungba ambori nga ga gu ringara re, yo i andú ku ho ni ka sunga dagba yo. I ambú re ki gbarasi gi zungahe nga gu mi amangi na yo.

17Si du gi zinga arúnguda kuti yo rogo gu uru re, mi ki mbu yo ambu, mi ki oko kpakpure ti yo, i ki nyasi anyasa dũ. Dungu gbegberẽpai na fudifudiapai ayé ku ri yo, si du i ayá rogo gu uru re wẽ. ‘A nga gi gbegberẽapai re naye ku ri rani bambiko gaani Mbori dagba rani te? te.’

18Ni rengo, mi aóka kpakpure ti yo rogo gu uru re tipa gu gbegberẽpai dunduko nga gu i ka manga rogo gu pai nga sa tiyo fu kura ambori.

19Si du oni ké gi bia re tipa roni, oni ki yugu he fu awiri aYisaraere; oni moi he ku ngbayo yo, gi bia re ki du ni dezire fere kuti awiri aYisaraere.

20Bambiko ho mi ka ye ni na yo ku rogo gu ringara nga gu mi azunga he tipa ha fu abayo, du adu na mamuanya na nzeme anyege kpaima; i arí he ki mbiki, ki nikindigi akindiga. Fuo ho i asá tiyo fu kura ambori, ka amanga pa ha, ki nipayasi pa re, ki gbarasi gi zungahe.

21Si adú wa gere, ho dungu gbegberẽpai ka ye ni ku ri yo, na fudifudiapai, gi bia re ki nigumba pai fu yo ni dezire kuti yo, bambiko bangiri atitayo ago nga ti ni ku ngbayo te; bambiko mi ima ina gu gayo berã i aberã ha awere, mbata mi nikada na yo ku rogo gu ringara nga gu mi azunga he tipa ha ka fu he fu yo.”

22Si du Mose ki ke gi bia re ni kina gu uru re, ki yugu he fu awiri aYisaraere.

23Yekova ki asia pai fu Yosua wiri Nuna, ki ya, “Mo dú nyanyaki ki du na bakere erã; bambiko mo tigamo nikaye na awiri aYisaraere ku rogo gu ringara nga gu mi azunga he fu yo tipa ha ka fu he fu yo: mi adú na mo.”

24Ho Mose adigisi ke agi apai re ni nga ga gi rugute re ku rogo kitabu, ki da ti digida ha,

25Mose ki rugu aRevi nanatinda sanduki mokido nga ga Yekova, niya,

26“Oni dí gi kitabu nga ga rugute re, ki moi he pati sanduki mokido nga ga Yekova gaoni Mbori, si du yo ni dezire kuti roni.

27Bambiko mi ini gaoni samungu, na gaoni nyakari. Oni ngére, wa du mi ni ungare na oni rogo gi uru re, oni nidu nga kina airasamungu kuti Yekova, angbatikafuokpiore!

28Oni dúngura gaoni abaakumba kono dunduko nga ga angbatungaroni, na gaoni abarutirivura, mi gumba gi pai re ku tuyo yo, ki yambu ngbangbaturũ na kpotosende ni dezire kuti yo.

29Bambiko mi ini he nga fuo kpiore oni kpakaya awási tironi awasi, ki sa tironi ku bani ti gu pai rugu mi roni na ni; gbigbitapai ki ti ati were ku ri roni giza, bambiko oni amánga gu pai dũ ni gbigbita ha bangiri Yekova, ka gara gako zinga kuti roni be gu mangapai nga ga beroni.”

30Mose ki gumba pa agu apai nga ga gi bia re, ku tu gbuu aYisaraere yo dũ, ko ki digisi he:

← Chapter 30 Jump to: Chapter 32 →