Deuteronomy 7

Zande

← Chapter 6 Jump to: Chapter 8 →

1“Ho Yekova gaoni Mbori ka ye ni na oni ku rogo gu ringara oni andu ka dia ha ni ũkumbo, ki bafu dungu arikaaboro barangba roni, nga aEto, aGirigaso, aAmoro, aKanano, aPereso, aIvo na aYebuso a, wa arikaaboro saba du ni bangenge yo nga airaome ki susi roni,

2ho Yekova gaoni Mbori ka kusa yo ni ku barangba roni, oni ki di be yo; oni ki ba tungayo kpakaya; ka oni amánga nga mokido na yo ya, ka oni ayúgo nga inapai fu yo a ya.

3Ka oni amánga nga pa rogatise na yo ya, ka oni afú nga awironi nga ade fu awiriyo ya, ka oni adía nga awiriyo ni ade fu awironi a ya.

4Bambiko i asá awironi ku sa yo ti peka fuo re, ya i mángi pa kura ambori; bambiko ho ga Yekova zinga ka runguda ni kuti roni, ko ki gbarasi roni ni ipo.

5Ono were oni ka manga fu yo: oni akúadi gayo abamotumo, ki kuadi gayo sese duadua amnia rukutu, ki dedewe gayo aAsera nga ngbama ku sande, ki zokodi gayo sese kpiahe.

6“Bambiko oni tigaoni nga kparakpara ziazia rikaaboro fu Yekova gaoni Mbori; Yekova gaoni Mbori sia roni oni du ni ndikidi gako aboro, dagba aboro auru kpotosende dunduko.

7Yekova aríngbisa nga gako nyemuse aríngbisa fu roni te, ko asia nga roni bambiko oni ange ki susi gu rikaaboro a te, bambiko oni adu tigaoni dunduko ni umba rikaaboro,

8ono bambiko Yekova nakpi nyemu roni, ko akpi nyemu ka ka kuti gu zungahe ko azunga fu abaroni, Yekova akusi roni ni nyanyaki beko, ki tumo roni kporo akanga yo, be Faro nangia bakindo aEzipeto.

9Si du oni ini he ti ni ya Yekova nga gaoni Mbori, ko nga Mbori nga yososo Mbori naka kuti zungahe na inapai fu agu yo nakpi nyemu ko ki nika kuti gako arugute fu arikaaboro wa akutu,

10ko ki nifu mosoro fu agu yo nasoga ko kina ku bangiriyo, ka gbarasa yo. Ko arúngbura nga fu gu ni nasoga ko te, ko afu mosoro fu ni kina ku bangirini.

11Si du oni ka ka kuti rugute ti ni na rugaapai na asarangbanga a, nga gu rugu mi roni na ni ni gi uru re, oni nimángi he.

12“Bambiko wa dege oni turoni sa agi asarangbanga re, ki ka kuti ni, ki nimángi he. Yekova nga gaoni Mbori aká kuti zungahe na oni na inapai nga gu ko azunga ha fu abaroni.

13Ko akpí nyemu roni, ki nifu maku fu roni, ki ningeesi roni: ko afu maku a ku ri agu avungu oni ka vunga yo, na ku ri gu zuzuhe nga ga gaoni sende, gaoni zende ahe na gaoni imekakue na gaoni nzeme, pa zugasi gaoni abagara na awiri gaoni zogozogo anya a, rogo gu ringara ko azunga he fu abaroni ka fu he fu roni.

14Oni adía maku ki susi ga aboro dũ; irazangada kumba na irazangada de adu nga dagba roni te, watadu dagba gaoni zogozogo anya ate.

15Yekova arógaakaza dunduko ti roni ku sa yo; ka ko amáa nga gu gbegberẽ kaza sa nga ga Ezipeta, nga gu ini oni he, ku ri roni ya, ono ko amáa ha kinaku ri agu yo dunduko nasoga roni.

16Oni ki nyasi agu aboro dunduko Yekova gaoni Mbori ka kusa yo fu roni, nungayo amangu nga roni te. Ka oni aírisa nga gayo ambori ya; bambiko si nikadu ni nzingiripai fu roni.

17“Ka oni yá ku kpotoroni yo. ‘Agi arikaaboro re nge ti rani; waĩ ka ani rengbe ka gbandaka yo?’

18Ka oni gúnde nga be yo ya; ono oni ki tingidi gu pai wenengaĩ Yekova gaoni Mbori amangi he fu Faro na fu Ezipeta dunduko,

19gu bakere aasada nga gu bangironi abi he na yuguyuguahe, na iiriwo yuguyuguapai, na nyanyaki beko, ni taã ko beko, Yekova akusi roni na ni; wo ka Yekova gaoni Mbori ka amanga fu aboro dũ nga agu yo oni agunde be yo.

20Ku ri agi apai re Yekova gaoni Mbori akéda abando ku dagba yo daho agu yo nye yo oko tiyo be roni ki kpiki dunduko.

21Iriwoyo atí nga ti roni te; bambiko Yekova gaoni Mbori du na oni, ni kikiipa Mbori ni iiriwoko

22Yekova gaoni Mbori abáfa agu arikaaboro re barangba roni toni, toni. Oni abá nga tungayo ni ba sa te, kere anya nvuo yo ka zuga ki susi roni.

23Ono Yekova gaoni Mbori nikakusa yo ku barangba roni, ko agbárasa yo ni bakere gbarasahe, daho i ka kpika ni du.

24Ko afu gayo abakindo ku be roni, oni agbándaka rimoyo zegino. Boro adú nga yo sa nikarengba na ru barangba roni te, daho oni ka gbarasa yo ni.

25Oni azókoda gayo sese kpiahe nga gayo ambori; oni adia nga ngbiti gu feda na dahabu du ti kpotoho te, ka oni adia nga ha ni gaoni ya, si ka du ni nzingiripai fu roni; bambiko si nga kere gbegberẽ he bangiri Yekova gaoni Mbori.

26Ka oni niyé nga na gu kere gbegberẽ he ku kpuroni yo ya, oni ka du ni tiwatiwa roni wa kina ha; oni ki sogo ho asoga dũ, oni ki payasi pa ha dũ; bambiko si nga tiwauwa he.

← Chapter 6 Jump to: Chapter 8 →