Deuteronomy 12

Zande

← Chapter 11 Jump to: Chapter 13 →

1“Gere nga gu rugaapai na agu asarangbanga nga gu oni ka berã pa manga ha rogo gu ringara Yekova nga ga abaroni Mbori afu he fu roni oni di he ni gaoni, ni agu arame dunduko oni ka du ni ungaroni auru kpotosende.

2Ni rengo oni agbárasa agu aba dunduko, yo agu arikaaboro oni ka dia yo anairisa gayo ambori ni, ri gbangagbanga abaagangara yo, na ri agangara yo, na tii agu angua dunduko du na fogo kpehe.

3Oni ki kuadi gayo abamotumo, ki kuadi gayo duadua ambia rukutu, ki zokodi gayo aAsera nga ngbama; oni ki dedewe gayo sese kpiaahe ku sande nga gayo ambori, ki gbandaka rimoho rogo gu ba re ku sa yo.

4Ka oni amánga nga wo fu Yekova gaoni Mbori ya.

5Ono ku rogo gu ba nga gu Yekova gaoni Mbori ka sia ha dagba angbatungaroni yo ka maa rimoko yo, oni ka gbata gako banye a; yo oni ka ye ku ho ni,

6yo oni ka ye ku ho ni na gaoni zozo amotumo, na gaoni amotumo, na gaoni asa dagba bawe, na gu tumbatumba gamahe nga ga beroni, na gaoni akidohe, na agu agamunihe oni afu he zaza ni nyemuhe, na bambata vungu nga ga gaoni rimbasa abagara na ga gaoni rimbasa akandoro.

7Oni ki niri riahe yo ku bangiri Yekova gaoni Mbori. Oni angí rogo agu apai dunduko oni ka amánga ha, oni na gaoni aborokporo, rogo agu apai Yekova gaoni Mbori nafu maku fu roni kuti ni.

8Ono oni amánga nga pai wa agu apai dunduko mangi ani erẽ areme te, wa aboro dunduko ni ba sa sa ninamanga gu pai ru kina bangiriyo;

9bambiko oni ata da nga ti gu ongoda na ti gu ringara nga gu Yekova gaoni Mbori afu fu roni te.

10Ono ho oni ka si Yaradene ni, ka araka rogo gu ringara nga gu Yekova gaoni Mbori aida oni di he ni gaoni, ko nikafu ongoda fu roni be avuraroni dũ du kirikiri pati roni, si du oni araka zezeredi,

11si adú wa gere gu rago Yekova gaoni Mbori ka sia rimoko si nye rogo ho, yo oni ka ye na agu ahe ku ho ni rugu mi roni tipa ha; gaoni zozo amotumo na gaoni amotumo, gaoni asa dagba bawe, na gaoni tumbatumba gamahe nga ga beroni, na gaoni siasia azungahe nga gu kido oni pa ha fu Yekova.

12Oni ki ningi bara bangiri Yekova gaoni Mbori, oni, na awironi, na agu awironi nga ade, na gaoni amoyambu, na gaoni anagbindi, na agu aRevi ka du kpuroni yo, bambiko wa adu nga bete he beyo na ringara a dagba roni ya.

13Oni bánda tironi ka oni fú nga gaoni zozo amotumo rogo aba ni ba sa sa wa oni abi he ya;

14ono kina rogo gu ba nga gu Yekova ka sia rogo gu ngbatungaroni sa, oni ki nifu gaoni zozo amotumo kina yo, kina yo oni ka manga agu apai ni rugu mi roni na ni.

15“Ono oni rengbe ka imo anya ki niri pasiora rogo gaoni akporo dunduko, a wa oni akpi nyemu he dunduko, ku sangba gu maku nga ga Yekova gaoni Mbori ngagu ko afu he fu roni; birikobiriko aboro ari he ari na gigiri aboro a, pasio gbangbaria, na pasio nzungba a.

16Kina kurera ka oni arí nga ha ya; oni aniuka ha auka ku sande wa ime.

17Ka oni rí nga gu sa dagba bawe nga ga gaoni zende ahe kpuroni yo ya, watadu ga gaoni imekakue, watadu ga gaoni nzeme, watadu bambata vungu nga ga gaoni rimbasa abagara watadu ga gaoni rimbasa akandoro, ka oni rí nga gu dagba gaoni kidoahe kpuroni yo sa ya, nga gu oni akido pa ha na ga gaoni gamunihe du zaza mbiko nyemuhe, na tumbatumba gamahe nga ga beroni a ya;

18ono oni ki niri he kina ku bara bangiri Yekova gaoni Mbori rogo gu ba Yekova gaoni Mbori ka sia ha, oni, na awironi, na agu awironi nga ade, na gaoni amoyambu, na gaoni anagbindi, na agu aRevi ka du kpuroni yo; oni ki ningi bara bangiri Yekova gaoni Mbori rogo agu apai du oni ka amanga ha.

19Oni bánda tironi ka bangironi gó nga ti aRevi wa oni ka du ni ungaroni rogo gaoni ringara ya.

20“Ho Yekova gaoni Mbori ka kiisa gaoni bangbandarago ni, wa ko akido roni, oni ki niya, ‘Ani arí pasio,’ bambiko oni nakpi nyemu ka ri pasio, oni ki niri pasio, a wa oni ka kpi nyemu he.

21Ka gu ba du tuturũ na oni nga gu sia Yekova gaoni Mbori rimoko du yo, si du oni ki imi nya dagba gaoni rimbasa abagara watadu dagba gaoni rimbasa akandoro, nga agu ra Yekova afu ra fu roni, wa mi arugu roni; oni ki niri pasiora kina kpuroni yo, wa bororoni akpi nyemu he.

22Birikobiriko aboro na gigiri aboro arí gbangbaria na nzungba, kina wo oni ka ri ra a.

23Ono oni ki rugu tironi na ni nyanyaki ya oni arí nga kurera wa sa te; bambiko kure nga unga, ka oni nirí nga unga na pasio wa sa ya.

24Ka oni rí nga ha ya, oni aniuka ha auka ku sande wa ime.

25Ka oni ari nga ha ya; si ki du ni wenepai fu roni, na fu awironi a fuo kpioroni, ho oni ka manga gu pai ni ru aru bangiri Yekova.

26Kina gu gaoni kparakpara ziazia ahe du be roni, na gaoni aũkidoahe, oni ka nidi he ka ndu na ni ku rogo gu ba Yekova asia ha.

27Oni ki nifu gaoni zozo amotumo, pasio na kure, ku ri gu bamotumo nga ga Yekova gaoni Mbori; gu kure nga ga gaoni amotumo oni ka niuka ha ku ri bamotumo nga ga Yekova gaoni Mbori, oni ki niri kina pasio.

28Oni kpária pa agi apai re dunduko rugu mi roni kuti ni ki gi he, si ki du ni wenepai fu roni na fu awironi fuo kpioroni nye anye kindi, ho oni ka manga gu pai ni ngba angba ni ruru he bangiri Yekova gaoni Mbori.

29“Ho Yekova gaoni Mbori ka manga arikaaboro ni barangba roni, yo oni nandu ku ho ni ka dia yo ni gaoni, oni ki kpara yo ku sa yo, ki niraki rogo gayo ringara;

30ono oni bánda tironi ka pai ingisi nga roni oni peke yo ya, fuo du yo ni gbarasigbarasi yo barangba roni; ka oni asána nga he tipa gayo ambori a ya, niya, ‘Waĩ agi arikaaboro re namanga pa gayo ambori? ani mángi he kina wo.’

31Ka oni mángi nga wo fu Yekova gaoni Mbori ya; bambiko kere gbegberẽ asino dunduko bangiri Yekova nga gu ko nasoga ha, si i amanga fu gayo ambori? ― Awiriyo a nga akumba na ade i nazokoda yo ku we yo fu gayo ambori.

32“Agu apai dunduko rugu mi roni kuti ni, gure oni ka berã pa ha sirisiri ki nimangi he; ka oni agbia nga pai kuti ni ya, ka oni adía nga pai ti ni a ya.

← Chapter 11 Jump to: Chapter 13 →