Deuteronomy 29

Zande

← Chapter 28 Jump to: Chapter 30 →

1Gere nga agu apai nga ga zungahe Yekova arugu Mose na ni i nimángi he na awiri aYisaraere ringara Moaba yo, ku ri gu zungahe ko amangi na yo Orebe yo.

2Mose ki yambu aYisaraere dunduko, ki ya fu yo: “Oni abi agu apai Yekova amangi ku bangironi rogo ringara Ezipeta fu Faro, na fu gako amoyambu dunduko, na fu gako ringara dũ,

3gu bakere aasada nga gu bangironi abi he na gu yuguyuguahe, na gu bakere uriwo yuguyuguapai;

4ono da ku awere Yekova afu nga berã fu roni ka ruga tironi na ni te, na bangirise ka bi he te, na tue ka gia pai a te.

5Ono mi angbe fu roni ku mbata yo ku ngbakungba yo tipa garã 40; gaoni roko akpataka nga ti kpotoroni te, ka gaoni arakata akpataka nga nduroni yo a ya.

6Oni ari nga riahe te, oni ambira nga imekakue na baripiro a te; ya oni ini he ya mi nga Yekova nga gaoni Mbori.

7Ho oni ada ni ku rogo gi rago re. Siona bakindo Esebona na Ogo bakindo Basana, i aye sa rani na vura, ani ki mangi yo.

8Ani ki di gayo ringara, ki fu he ni ukumbo fu angbatunga Rubena, na fu ngbatunga Gaaa, na bebere ngbatunga Manase.

9Si du oni ká kuti agu apai nga ga gi zungahe re, ka amanga ha, oni ki u au rogo agu apai dunduko oni amanga.

10“Oni dunduko ru areme bara bangiri Yekova gaoni Mbori; gaoni abarumbatayo ku ri angbatungaroni, na gaoni abaakumba, na gaoni abarutirivura, agu aboro nga ga aYisaraere yo dunduko,

11na rukutu awironi, na adiaroni, na gaoni kungba aboro nga agu yo du dagba gaoni abataya, tona ti gaoni abadewe nyake na gaoni abatudi ime;

12ya oni ka rima ku rogo gu zungahe nga ga Yekova gaoni Mbori, nga gu Yekova gaoni Mbori azunga ha fu roni areme;

13ya ko nyakasi roni areme oni du ni gako aboro, ko ki du fu roni ni gaoni Mbori, a wa ko agumba ha fu roni, wo ko azunga he fu abaroni a, fu Abarayama, fu Yisaka, na fu Yakoba a.

14A nga kina roni mi amanga gi zungahe na oni sa te re,

15ono fu gu ni ru na ani erẽ areme ku bara bangiri Yekova gaani Mbori, na gu ni a adu nga na ani erẽ areme ya.

16“Oni ini he tigaoni waĩ ani araki ringara Ezipeta yo, na waĩ ani akuru dagba arikaaboro yo nga agu yo oni asusi dagba yo;

17ono oni abi gayo gbegberẽpai na gayo kpiaahe ni ngua na ni mbia, ni feda na ni dahabu, nga gu naadu be yo.

18Oni bánda tironi boro ka du dagba roni, watadu kumba, watadu de, watadu borokporo, watadu gini ngbatunga boro, nga gu ni sa ngbaduni areme ti Yekova gaani Mbori, ka ndu ka amánga pa agu ambori nga ga agu arikaaboro re; tarã he ka du dagba roni nga gu nazu kere kpepasio au ni hihii he a,

19nga gu ni ho ni ka gia pa gi zungahe ni re, ni ki sambua tini ku kpotoni yo, niya, ‘Mi adú na zereda ka mi vura ka peka fuo gu nyaka ngbaduse du nabadure yo vurũ.’ Gere agbárasa toma tomohe na uguhe a.

20Yekova avú nga ni ti ni te, ono gu zinga nga ga Yekova na gako deringo agúnda kuti gu boro re, agu amotiwa du ni keke he rogo gi kitabu re adú ku ri ni. Yekova ki gbandaka rimoni tii ngbangbaturũ no.

21Yekova akpara ni sa gbigbitapai dagba angbatunga aYisaraere dunduko, kuti agu amotiwa dunduko nga ga gi zungahe du ni keke he rogo gi kitabu rugute re.

22Na gu rikayo nikaye, na agu awironi nikakura fuo roni, na gu kungba boro nga gu ni naye gii ngbi yo, i ayá ho i ka bi gu gberãngbi ni nga ga gu ringara re, na agu akaza Yekova ka manga ha na ni si kaza―

23gu ringara re aunduko ki du wa kina Daruti, na tikpo, ni gbigbi he, ka i arú nga he yo ya, ka si avúnga nga a ya, ka nvuo asóna nga rogo ho a ya, wa gbarasa Sodomo na Amora, Adama na Zeboima, nga gu Yekova agbarasi he ni gako zinga, na gako erã

24ii, arikaaboro dunduko ayá, ‘Tipagine mangi Yekova ti ni were fu gi ringara re? gini pai gi bakere zinga ayugo ho re?’

25Aboro ayá, ‘Si wo bambiko i mbu gu zungahe nga ga Yekova, ga abayo Mbori, gu ko amangi he na yo ho ko akusi yo ni ringara Ezipeta yo.

26I ki ndu ka manga pa kura ambori, ki niirisi he, nga agu ambori i aina nga pa ha mbata ya. Ko afu nga ha fu yo a te.

27Si du ga Yekova zinga arungudi ti ni kuti gi ringara re, ko ki ye na agu amotiwa dunduko du ni keke he rogo gi kitabu re.

28Yekova ki rogo yo ku sa yo rogo gayo ringara ni zinga na era, na bakere imisiringbaduse, ki bafu yo ku rogo kura ringara, a wa du he ni gi uru re.’

29“Gbugbu apai du ni ga Yekova, nga gaani Mbori; ono agu apai du ni kusikusi he si nga gaani na ga awirani nye anye kindi, ya ani mangi agu apai dunduko nga ga gi rugute re.

← Chapter 28 Jump to: Chapter 30 →