Deuteronomy 4 — Zande

1“Ako aYisaraere, awere oni dége turoni sa rugaapai na asarangbanga, nga gu yugu mi fu roni, ka amanga ha; oni ki nye ni ungaroni, oni ki rimi ka roga gu ringara nga gu Yekova nga ga abaroni Mbori afu he fu roni.

2Ka oni agbía nga pai kuti gu pai nga gu rugu mi roni na ni ya, ka oni aúmbasi nga pai ti ni a ya; oni ki ka kina kuti agu arugute rugu mi roni na ni re.

3Bangironi bi gu pai Yekova amangi tipa Bara-peoro; bambiko agu aboro dunduko naapeke Bara-peoro Yekova nga gaoni Mbori naagbarasi yo dagba roni.

4Ono agu roni naaka kuti Yekova gaoni Mbori, oni du ni ungaroni dunduko dati gi rago re.

5Oni ngére, mi yugu rugaapai fu roni na asarangbanga, wa Yekova gi Mbori arugu re na ni, ya oni ka amanga wo, yo oni ka ndu ku ho ni rogo gu ringara oni ka roga ha ni ũkumbo.

6Oni ká kuti ni ki nimangi he; bambiko gere nga gaoni tatamana na gaoni rugatinapai ku bangiri agu aboro nikagia gi rugaapai re ki ya ti ni. ‘Ni rengo gi bakere rikaaboro re nga airatatamana ni aboro rugatinapai.’

7Bambiko gini bakere rikaaboro du nga ho, du na mbori mbembedi pati yo, wa Yekova gaani Mbori du mbembedi na ani ho ani nikpari ni fu ko?

8Gini bakere rikaaboro du nga ho, du na rugaapai na asarangbanga ni ruru he dunduko wa gi rugute re, nga gu ringbisi mi he fu roni ni gi uru re?

9“Oni bánda tironi, ka banda tororoni wenengaĩ, bangironi ka go ti gu pai nga gu bangironi abi he, si ka guari kpotoroni yo rogo agu arame dunduko nga ga ungaroni. Oni yúgu he fu awironi na fu awiri awironi i mi he a―

10nga pa gu uru oni aru bara bangiri Yekova nga gaoni Mbori Orebe yo, ho Yekova aya ni fere wẽ. ‘Oni dúngura aboro kono du mi ni, mi arúga yo i gi gimi apai, ya i wiriki pa gunde ti re rogo arame dunduko wa du yo ni ungayo auru kpotosende, i myugu ne fu awiriyo a.’

11Oni aye ki mbedi ki ru ti mburu bagangara yo, bagangara ki nigbi be we da kina kuti vuro ngbangbaturũ bitimo ki du, na dubo, na nduunduu bitimo.

12Yekova ki gumba pai fu roni bebere we yo; oni tigaoni agi kina woro fugo, ono oni abi nga kpia boro te; ono kina fugo naapaa.

13Ko ki taki pande gako mokido fu roni, nga gu ko arugu roni oni nimángi he, nga arugute bawe; ko ake he auru kpasakpasa ambia ue.

14Yekova ki rugu re a ni gu rago re mi yugu rugaapai na asarangbanga fu roni, ya oni nimángi he rogo gu ringara oni andu ka roga ha.

15“Si du oni bánda tironi wenengaĩ. Bambiko wa oni abi nga kpia boro ni gu uru Yekova afura na oni bebere we Orebe yo ya,

16oni bánda tironi oni ka wasi tironi ni manga sese kpiahe ni kpia gu he, watadu ni kpia kumba na ni kpia de,

17nikpiagunya du auru kpotosende, ni kpia gu zire nagu ari yo ngbangbaturũ yo,

18ni kpia gu ru nagbe tiru agbe sande, ni kpia gu tĩo du ime yo tii sende yo a.

19Oni ka tumba bangironi ku ari ku ngbangbaturũ yo, ho ka oni bi uru ni na diwi na akerekuru, na rimbasa aũngbangbaturũ dunduko, si ki gbe roni ku sa yo oni irisi he, ka amanga pa ha, nga gu Yekova gaoni Mbori akparaka ha fu aboro du du tii ngbangbaturũ no.

20Ono Yekova di roni, ki kusi roni rogo gbigiwi marã Ezipeta yo, oni du ni ndikidi gako aboro, a wa du oni ni gi rago re.

21Ku ri gu pai re Yekova adu na zinga na mi mbiko gaoni apai, ki zunga he ya mi así nga Yaradene te, ya mi andú nga ki rimi ku rogo gu wene ringara re te, nga gu Yekova gaoni Mbori nafu fu roni ni gaoni.

22Ono mi nikakpi kina rogo gi ringara re, ka mi así nga Yaradene ya; ono oni tigaoni nikasi he, ki rogo gu wene ringara re ni gaoni.

23Oni bánda tironi, bangironi ka go ti gu mokido nga ga Yekova nga gaoni Mbori, gu ko amangi he na oni, oni ki mangi sese kpiahe ni kpia gu he nga gu Yekova gaoni Mbori aka na pa ha be roni.

24Bambiko Yekova gaoni Mbori nga gu we narita he, nga iraringo Mbori.

25“Ho oni ka vunga agude ni na awiri awironi, oni ki niima ni gbanga ha ku rogo gu ringara re, ki wasi tironi, ni manga sese kpiahe rogo gu he, ki mangi gu pai dũ ni gbigbitapai bangiri Yekova gaoni Mbori, ka gara gako zinga kuti roni,

26mi yambu ngbangbaturũ na kpotosende si du ni dezire kuti roni ni gi uru re, ya oni nikakpika mbembedi kpakaya rogo gu ringara yo oni andu ku ho ni ku mbiti Yaradene yo ka roga ha. Ono oni aíma nga koyo te, i ki gbarasi roni agbarasa kpakaya.

27Yekova ki gbandaka roni agbandaka ku dagba aboro yo, oni ki nye ni kina umba roni dagba arikaaboro yo, yo Yekova ka do roni ku ho ni.

28Yo oni ka manga pa ambori ni nga gu ũsunge nga ga be aboro ni ngua na mbia angera nga ya, agia nga pai ya, ari nga he ya, agia nga fuõ he a ya.

29Ono ka oni tona gbata Yekova nga gaoni Mbori yo, oni abi ko abi, ka oni agbáta ko na kpotoroni yo du na mbisimoroni du.

30Ho ka oni du ni rogo gberãngbi, agi apai re dunduko ki ye ku ri roni rogo agu arame giza, oni ki karaga tironi koyo du Yeko a ni nga gaoni Mbori, ka gia fugoko,

31bambiko Yekova gaoni Mbori nga irainapai. Ko ambú nga roni te, ko agbárasa nga roni a te, bangiriko agó nga ti gu zungahe ko azunga ha fu abaroni te.

32“Oni sána he awere tipa agu arame susi ku sa yo, tona ti gu uru Mbori amangi kumba ku auru kpotosende, ki sana he ti digida ngbangbaturũ ki da ti gu kura digida ha, watadu wiri ngbatunga ne amangi nga mbata wa gi bakere he du re, watadu i agi pai wa ha?

33Aboro agi nga fugo Mbori mbata ko nifura bebere we yo, wa oni agi he, ki du ni ungaroni?

34Watadu kungba mbori aasadi ka ndu ka dia rikaaboro ni gani dagba gu rikaaboro yo, ni aasadapai, ni yuguyuguahe, ni iiriwo yuguyugupai, ni vura, ni nyanyaki beni, ni taĩtaĩ beni, na ni bakere kiki, a wa agu apai dunduko Yekova gaoni Mbori amangi he fu roni Ezipeta yo ku bangironi?

35Oni ko ayugu he fu roni, ya oni ini he ya Yekova nga Mbori; a nga mbori ho fuo ko wa sa te.

36Ko arugu roni oni gi fugoko naaye ngbangbaturũ yo, ko yugu pai fu roni. Ko arugu roni oni bi gako bakere we kpotosende no, oni agi fugoko ku bebere we yo.

37Bambiko ko akpi nvemu abaroni, si du ko asia angbatungayo ti ni fuo kpioyo, ki kusi roni ni tiko na gako bakere tandu Ezipeta yo,

38ki do arikaaboro barangba roni, du ni bakiki pa aboro ni airaome ki susi roni, ka rimisa roni ka fu gayo aringara fu roni ni gaoni, wa du he ni gi rago re.

39Si du oni íni he ni gi uru re, ki moi he ku ngbaduroni yo, ya Yekova ko nga Mbori ngbangbaturũ ari yo na auru kpotosende no; gu ni ho berewe wa sa te.

40Oni ká kuti gako rugaapai na gako arugute, nga gu rugu mi roni na ni ni gi uru re, pai ki du fu roni wenengaĩ, na fu awironi fuo roni a. Oni ki gizasi gaoni arame rogo gu ringara Yekova gaoni Mbori afu fu roni nye anye kindi.”

41Si du Mose ki kparaka abaakporo biata ku mbiti Yaradene yo bara koyo uru nakura ni,

42baimiboro nioro koyo, nga gu ni imi kurani ni bino, nga gu ni ni asoga nga ni mbata ya. Ono gu ni ka oro ku rogo gu bakporo sa dagba agi abaakporo re, ni ka nibati.

43Rimoho nga Bezere ngbakungba yo rogo kpasakpasa ringara tipa ngbatunga Rubena. Ramota Girada yo tipa ngbatunga Gada, na Gorana Basana yo tipa ngbatunga Manase.

44Gere nga gu rugute Mose aringbisi he ku bangiri awiri aYisaraere;

45agi apai re nangia dezireapai, na rugaapai, na asarangbanga, nga gu Mose agumba pa ha fu awiri aYisaraere ho i akuru ni Ezipeta yo,

46mbiti Yaradene yo rogo gu ngboongboorago du pati Bete-peora yo, rogo gu ringara nga ga Siona bakindo aAmoro, naaraka Esebona yo, nga gu ko awiri aYisaraere adi be ko, ho i akuru ni Ezipeta yo.

47I ki di gako ringara na gu ringara nga ga Ogo bakindo Basana, agu abakindo ue nga ga aAmoro yo, naadu mbiti Yaradene yo bara koyo uru nakura ni;

48tona Aroere yo, gu du ti digida gu ngboongboorago nga Arenona, ki da ku Bagangara Siruyona yo a gu nga Erumona,

49na gu kpasakpasa rago dunduko du mbiti Yaradene ku uroyo, ki da kuti Baime pangba kpasakpasa rago yo, ti gu zorõzorõ rago du ti Pisega.