Deuteronomy 21

Zande

← Chapter 20 Jump to: Chapter 22 →

1“Ka i bi kangba boro kpi rogo gu ringara nga gu Yekova gaoni Mbori afu fu roni oni rogo ho, si napi haurago yo, ka i aina nga gu boro niimi ni ya,

2si du gaoni abaakumba na gaoni abasaringbanga ki ye, i ki ringbisi baturã agu abaakporo du kirikiri pati gu kangba boro i niimi ni.

3Agu abaaakumba du rogo gu bakporo du mbembedi na gu kangba boro i niimi ni re, i anidi paranga nabagara adia dagba rimbasa anya, nga gu ru ata manga nga sunge mbata ya, nga gu ru agbe nga gonga mbata a ya.

4Abaakumba gu bakporo re aniye na paranga nabagara ku rogo gu ngboongboorago ime afu rogo, i asopa nga ha ya, i arũ nga he yo a ya, i ki kiti gorõ gu paranga nabagara re koyo.

5Aboromotumo nga awiri Revi aniye mbembedi, bambiko i nga agu yo sia Yekova gaoni Mbori yo i nimángi pa ko, ka afu maku ti rimo Yekova; sarangbanga pa paa na akpata dunduko adú kuti sangba yo.

6Ono abaakumba gu bakporo re du mbembedi na kangba gu boro i aimi ni, i anizundu beyo ku ri gu paranga nabagara i akiti goru ku ngboongboorago yo.

7I anikaraga pai ki ya, ‘A nga berani nauka gi kure te re, bangirani abi nga ha a te.

8Ako Yekova, Mo vú gamo aboro nga aYisaraere, nga agu yo mo atumo yo, ka mo ambú nga kure wenesa si nye dagba gamo aboro aYisaraere ya. Ono mo vú yo tipa gu kure re.’

9Si du oni ka nidi gu bape kure wenesa ti roni ti ni re ku sa yo, ho oni ka manga gu pai ni ru aru ku bangiri Yekova.

10“Ho oni ka nindu ni sa sovura kuti avuraroni, Yekova gaoni Mbori ki nikusi yo ku be roni, oni ki niga na yo ni zizi yo.

11Ka gu kumba bi ba wene de dagba zizi yo yo, ko ki kpi nyemu ri, ko ki nikpi nyemu ka dia ri ni diako,

12ko ki ga na ri ku kpuko yo. Ri ki kpe riri, ki yepe sisiaga wirinzagari.

13Ri ki uru gari roko zizi boro ti ri ku sa yo, ki nye kpuko yo, ka kpara tipa abari na nari diwi ki du sa nzunzu. Fuo gure ko ki ndu fuo ri, ki du ni kumbari, ri ki du ni diako.

14Si adú were, ka ri angba nga ti ko ya, ko ki mbu ri ri ndu ku ho ri akpi nyemu ni; ono ko anibagi nga ri tipa marã wa sa te, ko animangi nga ri ni payasi ri wa kanga a te.

15“Ka kumba rogo ade ue, ko ki nikpi nyemu gu ri sa, ki nisogo gu ri, i ki vungu agude fu ko, i ue, gu ri ko akpi nyemu ri, na gu ri ko asoga ri; ka bambata gude du ni dikumbo nga wiri gu ri ko asoga ri,

16si ki du were, ni gu uru ko akpi nyemu ka fu ũkumbo fu awiriko nga gu du be ko, ya ka ko sá nga wiri gu ri ko akpi nyemu ri ni bambata vungu mbata fu wiri gu ri ko asoga ri, nga bambata vungu ya.

17Ono ko ídi pa bambata wiriko, wiri gu ri ko asoga ri asoga, ka fu bete he fu ko bara ue dagba agu ahe du beko, bambiko ko nga tonatona pa gako ome. Gu ũkumbo nga ga bambata vungu nga gako.

18“Ka kumba du na wiriko nga nyanyakiri gude ni irasamungu, agia nga sangba bani, watadu sangba nani a ya, ka i vura ruga ni vurũ, ka ni agia nga fugoyo ya;

19bani na nani ki zi ni, ki kusi ni fu abaakumba gani bakporo, na ku ngbadimo gani kporo.

20I ki ya fu abaakumba gani bakporo wẽ, ‘Gi wirani re nga iranyakari nga irasamungu, ko akpi nga nyemu ka gia fugorani te; ko nga iraangbu nga bakpiimekakue.’

21Gani aboro bakporo dunduko ki sopo ni ni ambia, ni ki kpi. Si du oni ka nidi gu gbigbitapai ti ni re ku sa yo dagba roni; aYisaraere ki gi he dunduko, ki gunde.

22“Ka boro mangi ingapai rengbe na kpio, i ki imi ni, oni ki asi ni ti ngua,

23ono ka kangbani anyé nga ti ngua yuru sasasa ya. Oni anikpisidi ni ni kina gu uru re, bambiko Mbori tiwa gu ni asi yo ni ti ngua; ka oni gbárasi nga gaoni ringara nga gu Yekova gaoni Mbori afu fu roni ni gaoni ya.

← Chapter 20 Jump to: Chapter 22 →