Deuteronomy 3

Zande

← Chapter 2 Jump to: Chapter 4 →

1“Si du ani ki aria tirani, ki ndu ngba gu gene ndu ku Basana yo; Ogo nangia bakindo Basana aye sa rani, ko na gako aboro du, sa sovura ku Eaerei yo.

2Ono Yekova ki ya fere, ‘Ka mo gúnde nga be ko ya; bambiko mi fu ko ku be ro na gako aboro dunduko, na gako ringara a. Mo amánga fu ko a wa mo amangi fu Siona bakindo aAmoro naaraka Esebona yo.’

3Si du Yekova nga gaani Mbori afu Ogo ti ni ku be rani a, nangia bakindo Basana na gako aboro dũ. Ani ki mangi ko ki da ho boro anye nga ni sa fu ko ya.

4Ani arogo gako abaakporo dunduko ni gu rago re ― bakporo adu nga ho sa ani ahe dia ha be yo te ― nga abaakporo 60, na agu angbi dunduko nga Arugoba, nangia gu ngbi nga ga Ogo du Basana yo.

5Agi abaakporo re dunduko adu na gbangagbanga ngapa pati he kirikiri, na angbadimoho, na angbongbo ti angbadimo; gbia kuti badungu akporo naadu nga na pere bakporo pati he ya.

6Ani ki gbarasi he kpakaya, a wa ani amangi fu Siona nangia bakindo Esebona, ki gbarasi agu abaakporo ni ba sa sa kpakaya i araka rogo na akumba na ade na rukutu agude.

7Ono zogozogo anya dunduko, na gu gbugbu ahe nga ga abaakporo, ani arogo ho ni zizi ahe tipa rani.

8Ani ki di gu ringara re ni gu rago re be agu abakindo ue nga ga aAmoro yo nadu mbiti Yaradene yo, tona ti ngboongboorago Arenona ki da ti Bagangara Erumona,

9nga gu Erumona aboro Sidona niya ti ni Siruyona, aAmoro ki niyambu he nga Senira;

10agu abaakporo dunduko nangia ga kpasakpasa rago na Girada dunduko, na Basana dunduko, ki da ku Sareka yo na ku Ederei yo, nga agu abaakporo nga ga gu ngbi nga ga Ogo du Basana yo.

11Bambiko kina Ogo bakindo Basana nanye dagba gu yangara yo nga ga aRefa yo. Mo ngére, gako pambara barame angia marã; ati si kina Raba yo nga ga aAmono bakporo, te? Bagizaha adu wa bagiza mbiribe ribua, bakia patihe ki du wa bagiza mbiribe biama, wa du pa bagiza mbiribe boro.

12“Ani ki di gi ringara re ni gu rago re. Mi afu he fu ngbatunga Rubena na ngbatunga Gada, tona Aroere yo, nga gu du pati ngboongboorago Arenona, na bebere ringara abaagangara du Girada yo, na gaha abaakporo.

13Mi afu yangara ringara Girada fu gu bebere ngbatunga Manase, na Basana dunduko, gu ngbi nga ga Ogo, si nga gu ngbi dunduko nga Arugobo. I naya ti gu ringara Basana re dunduko, ga aRefa ringara.

14Yaira wiri Manase arogo gu ngbi dunduko nga Arugobo, si nga Basana, ki da ti gu bangbandarago nga ga aGesura na ga aMaka, ko ki yambu rimo akporo ti kina rimoko, nga Avota-yaira, a wa du he areme.

15Mi afu Girada fu Makira,

16fu ngbatunga Rubena na ngbatunga Gada mi afu he fu yo tona ti Girada ki da ku ngboongboorago Arenona yo, bebere ngboongboorago na gaha bangbandarago, ki da k u di Yaboka a, ga awiri Amona bangbandarago;

17na kpasakpasa rago a, na Yaradene na gaha bangbandarago, tona ti Kinerete ki da kuti baime pangba kpasakpasa rago yo, nga Baime Tikpo, ti gu zorõzorõ rago du ti Pisega ku uroyo.

18“Ono mi arugu roni ni gu rago re, ‘Yekova nga gaoni Mbori fu gi ringara re fu roni tipa dia ha ni gaoni ũkumbo; oni asúsa ku mbata yo ni vodivodi tironi ni aũvura barangba awirinaroni nga awiri aYisaraere, nga akumba dunduko nga eerẽ aboro.

19Ono adiaroni, na rukutu awironi, na gaoni zogozogo anya nikanye rogo gaoni abaakporo nga gu fu mi fu roni, mi ini ya bakere zogozogo anya du be roni,

20daho Yekova ka fu ongoda ni fu awirinaroni wa gaoni, i ki rogo agu aringara a nga gu Yekova gaoni Mbori afu he fu yo ku mbiti Yaradene yo; oni akaraga tironi ni ba sa sa, boro kina ku rogo gani ukumbo, nga gu mi afu fu roni.’

21Mi arugu Yosua ni gu rago re, niya, ‘Bangiro bi agu apai dunduko Yekova nga gaoni Mbori amangi he fu agi abakindo ue re; wo Yekova ka manga fu angbi dunduko yo oni ka ndu ku ho ni.

22Oni agúnde nga be yo te; bambiko Yekova gaoni Mbori, ko nga gu ko naso vura tipa roni.’

23“Mi ki zungadi Yekova ni gu rago re, niya,

24‘Ako Gbia MBORI, mo tona ka yugo pa kia pa ro fu ga moyambu, na pa nyanyaki bero; bambiko gini mbori du ngbangbaturũ yo watadu du auru kpotosende no, nga gu ni rengbe ka manga pai kuti gamo mangaapai, na kuti ga kangarã mangaapai?

25Mi nakpara foro, mo idi fere mi sí, ka bi gu wene ringara nga gu du ku mbiti Yaradene yo, gu wene ringara abaagangara re, na Rebonona a.’

26Ono Yekova adu na zinga fere tipa gaoni apai, ka ko adega nga tuko fere ya; Yekova ki ya fere, ‘Si réngbe bangiro; ka mo gúmba nga kura pai fere tipa gi pai re berewe wa sa ya.

27Mo bíti ku ri Pisega yo, ki tumba nga bangiro ku dioyo, na ku nodiyo, na ku sudiyo, na ku uroyo, ka ngera nga ni bangiro; bambiko mo así nga Yaradene te.

28Ono mo rúgu Yosua, ki ngarãsi ko, ki nyakasi ko; bambiko ko nikasi ku mbiti yo mbata fu agi aboro re. Ko nikandu na yo i rogo gu ringara re ni gayo mo akabi he.’

29Si du ani asungu ti ni kina ngboongboorago yo pati Bete-peora yo.

← Chapter 2 Jump to: Chapter 4 →