Deuteronomy 24

Zande

← Chapter 23 Jump to: Chapter 25 →

1“Ho kumba nidi de ni, ni ndikidi diako, pai sa, ka ri angba nga ti ko ya, bambiko ko bi gu pai ti ri angba nga ya, ko ki ke waraga mbutise fu ri, ki fu he fu ri, ki kusi ri kpuko yo.

2Ho ri ka niguari ni kpuko yo, ki ndu ka dia kura kumba,

3ka gu kusa kumbari asoga ri, ki ke waraga mbutise ki fu he fu ri, ki kusi ri kpuko yo a, watadu gu kusa kumbari kpi, naadi ri ni diako;

4bambata kumbari naadi ri, naambu ri, ko anidi nga ri berewe te, bambiko ri inia biriko. Bambiko gure nga kere gbegberẽ sino bangiri Yekova, ka oni aíngisa nga ringara si biriko ya, nga gu Yekova gaoni Mbori afu fu roni ni gaoni.

5“Ho kumba ka nidi de ni, ko anindu nga na rimbasa vura te, i anifu nga sunge fu ko a te. Ko anisungu kpuko yo gbua tipa garã sa, ka ngarãsa tiyo na diako, nga gu ri di ko ri.

6“A nga boro sa ka di mbia sahe watadu wiri mbia sahe ni ngbaanga te, bambiko ni di unga boro ni ngbaanga.

7“Ka i bi boro ni nidĩ wirinani dagba awiri aYisaraere yo, ki nimángi ni wa kanga, watadu baga ni; gu iradĩ re i aniimi ni aimo; si du oni ka nidi gbigbitapai ti ni dagba roni ku sa yo.

8“Oni bánda tironi be gu gberãngo nga ga ngbataka, oni bérẽ pa ha nyanyaki, ka amanga pai kuti agu apai dunduko aboromotumo nga aRevi ayugu pa ha fu roni; wa mi arugu yo, kina wo oni ka berã pa ha ka amanga ha.

9Oni tíngidi gu pai Yekova gaoni Mbori amangi he fu Miriama, ngba gu gene wa oni akuru Ezipeta yo.

10“Ho oni ka nifu ngbatunga bape ni fu kuaroni, oni anindu nga ku dimo kpuni yo ka dia gani ngbaanga yo te.

11Oni aniru kina zegi, kina gu boro nadi bape be roni ni ka nikusi gu he ni afu ngbaanga ha fu roni ku zegi no.

12Ka ni du ni rungorungo boro, oni abá nga gani roko nga ngbaanga auru roni te,

13ono oni anikaraga gu ngbaanga re akaraga fu ni ho uru nati ni, ni ra ti gani roko, ki fu maku fu roni. Si ki du ni rurupai fu roni ku bangiri Yekova gaoni Mbori.

14“Ka oni nirúngosi nga gu moyambu nadia mosoro sunge du ni irarungo ni irazingohe ya, watadu ka ni du dagba awirinaroni yo, watadu dagba gu kungba aboro sungu ku rogo gaoni ringara na rogo gaoni kporo.

15Oni ka fu gani mosoro fu ni ti ragoho, ka uru ati nga ha ku be roni ya; (bambiko ni nga irarungo namaa bangirini tipa ha); ni ka kpara fu Yekova kuti roni, si ki du ni ingapai ku ri roni.

16“Ka i imi nga abagude tipa ga awiriyo pai ya, ka i ími nga agude tipa ga abayo pai a ya. Aboro ni ba sa sa ka kpida kina pa gayo ingapai.

17“Ka oni aírasi nga sarangbanga nga ga kungba aboro na ga awirinyaure ya, ka oni adía nga ga adekurugbo roko ni ngbaanga ya,

18ono oni ki tingidi gu pai nga oni adu ni akanga Ezipeta yo. Yekova gaoni Mbori ki tumo roni yo; si du mi rugu roni oni nimángi gi pai re.

19“Ho oni ka ake gaoni ahe ni ati yo, ki atadi vodivodi he yo, oni anindu nga berewe ka dia ha te; si aninye fu kungba aboro, na fu awirinyaure, na fu adekurugbo; Yekova gaoni Mbori ki fu maku fu roni rogo gaoni asunge dunduko nga ga beroni.

20Ho oni ka gboroka zuzu gaoni ngua eraya ni, ka oni afúga nga ha berewe ya; si anyé fu kungba aboro, na fu awirinyaure, na fu adekurugbo.

21Ho oni ka dungura gaoni rindi bakakue ni, oni adungura nga ha na futuhe te; si anyé fu kungba aboro, na fu awirinyaure, na fu adekurugbo.

22Oni ki tingidi gu pai nga oni adu ni akanga ringara Ezipeta yo; si du mi rugu roni oni nimángi gi pai re.

← Chapter 23 Jump to: Chapter 25 →