Joshua 1

Zande

Jump to: Chapter 2 →

1Si ki ta du wa gere fuo kpio Mose nga ga Yekova moyambu, Yekova ki gumba pai fu Yosua nga wiri Nuna, nga ga Mose moyambu, ki ya,

2“Mose kpi nga gi moyambu; mo guari awere tie, ki si gi Yaradene re ku mbiti yo, mo, na agi aboro dunduko re, ku rogo gu ringara nga gu fu mi he fu yo, nga awiri aYisaraere.

3Agu arago dunduko kpanduro ka simba ha, mi fu he foro a wa mi agumba pa ha fu Mose.

4Tona ti ngbakungba na gi Rebanona re ki da kuti gu bakere di, nga gu di nga Ferata, gu ringara nga ga aEto dunduko, ki da ti Bakere Baime yo uru nati ku ho ni, si adú ni gaoni ringara.

5A nga boro sa nikarengba ka ru ku bara bangiro wa du mo ni ungaro te, wa mi adu na Mose, kina wo mi ka du na mo. Mi ahe nga ro te, bangire agó nga ti ro a te.

6Mo dú nyanyaki ki du na bakere era; bambiko mo nikakpara ringara fu agi aboro re i di he ni gayo, nga gu mi azunga he tipa ha fu abayo ka fu he fu yo.

7Ono mo dú nyanyaki ki du na bakere era, ka ka kuti manga pa apai wa du pa rugute dunduko, nga gu Mose nga gi moyambu arugu ro kuti ni; ka mo sá nga tiro ti ni ku kumbabe yo na ku garebe yo a ya, si du mo ka amanga pai ti ni na tatamana yo mo ka andu ku ho ni.

8Gi kitabu rugute re agúari nga ngbaro yo te, ono mo amákia pa ha uru na yuru ka ka kuti manga pa agu apai dunduko du ni keke he rogo ho, si du mo ka u ti ni rogo gamo apai, mo ki du ni iratatamana.

9A nga mi arugu ro, te? Mo dú nyanyaki ki du na bakere erã; ka mo nigúnde nga ya, ka mo niyúngura nga a ya; bambiko Yekova nga ga Mbori du na mo yo mo ka andu ku ho ni.”

10Si du Yosua ki rugu abarumbatayo fu aboro ki ya,

11“Oni tá rogo bataya yo ki ta ruga aboro niya, ‘Oni mbákadi ũngba tipa roni; bambiko fuo uru biata oni nikasi gi Yaradene re ku mbiti yo, ka ndu ka dia ringara ni gaoni, nga gu Yekova nafu fu roni oni di he, nga gaoni Mbori.’ ”

12Yosua ki gumba pai fu ngbatunga aRubena, na aGada, na gu bebere ngbatunga Manase, ki ya,

13“Oni tíngidi gu pai Mose arugu roni kuti ni nga ga Yekova moyambu. ‘Yekova nga gaoni Mbori nafu ongoda fu roni, ko afú gi ringara fu roni re a.’

14Adiaroni anyé kina rogo gu ringara Mose afu fu roni mbiti gi Yaradene no re na gaoni rukutu yo na gaoni anya a; ono oni así barangba awirinaroni na aũvura be roni, na gaoni nyanyaki aboro dunduko du ni ngangarã yo, oni aniunda yo,

15daho Yekova ka fu ongoda ni fu awirinaroni, a wa ko afu he fu roni. I ki di gu ringara Yekova nga gaoni Mbori afu he fu yo a, fuo gure oni ki karaga tironi ku rogo gu ringara nga gaoni, ki di he, nga gu ringara Mose afu fu roni nga ga Yekova moyambu mbiti Yaradene no ku uroyo.”

16I ki karaga pai fu Yosua, ki ya, “Gu pai mo aruga rani kuti ni ani amánga kina ha dunduko, ho mo ka akeda rani ku ho ni, ani andú kina ku ho a.

17A wa ani agi sangba Mose rogo apai yo dunduko, kina wo ani ka agia sangba ro; Yekova nga ga Mbori ko dú na mo a wa ko adu na Mose.

18Gu ni ka asa mungu kuti ga rugute, ka ni agía nga sangbaro rogo agu apai dunduko mo ka aruga ni kuti ni ya, i aímo ni aimo. Mo dú nyanyaki ki du na bakere era.”

Jump to: Chapter 2 →