Joshua 5

Zande

← Chapter 4 Jump to: Chapter 6 →

1Ho abakindo aAmoro agi he ni dunduko, nga agu yo nadu rogo ringara ku mbiti Yaradene yo ku dioyo, na abakindo aKanano dunduko, nadu ti ngba baime, ya Yekova augusi ime Yaradene barangba awiri aYisaraere, ki da kina ho i asusi ni ku mbiti yo dũ, kpotoyo yo ki zizirĩ dũ, a nga boro sa auani anye rogo ni yo berewe te, be awiri aYisaraere.

2Ni gu rago re Yekova ki ya fu Yosua, “Mo mbákadi ambia wa asape, ki yere awiri aYisaraere berewe ni uehe.”

3Yosua ki mbakadi ambia ni asape, ki yere awiri aYisaraere na ni pavuru gangara Ararota.

4Gere nga ndu gu pai Yosua ayere aboro ti ni: agu akumba dunduko naakuru Ezipeta yo, nga abasovura, i naakpiki ngba gene ngbakungba yo, fuo kura yo Ezipeta yo.

5Bambiko agu aboro naakuru yo dunduko i ayere yo, ono agu yo dunduko i abatika yo ngba gene ngbakungba yo wa i akuru Ezipeta yo, i ayera nga yo te.

6Bambiko awiri aYisaraere anungu rogo ngbakungba garã ki du 40, ki da ho rikayo akpiki ni dunduko, nga agu abasovura naakuru Ezipeta yo, bambiko i agia nga sangba Yekova te. I nangia agu yo Yekova azunga he fu yo ya ko aida nga ha fu yo i bi gu ringara Yekova azunga he fu abayo ka fu he fu rani te, nga gu ringara du adu na mamuanya na nzeme anyege kpaima.

7Awiriyo nga agu yo ko afu yo ku ba yo, i Yosua ayere yo; bambiko i adu ni azangayeratise, bambiko i ayera nga yo gene te.

8Ho i ayere rikayo ni dunduko ki nyasi he, i ki sungu rogo gayo aba bataya yo, daho i awiki ni.

9Yekova ki ya fu Yosua, “Areme di mi gu ũgbarasarimo nga ga Ezipeta ti roni ku sa yo.” Were i ki yambu rimo gu rago re nga Girigara, ki da ku awere.

10Ho awiri aYisaraere adu ni bataya Girigara yo, i ki mbakadi susiri ti rame diwi 14 nyemu, rogo gu kpasakpasa rago du pati Yereo.

11I ki ri mbaku zende ahe nga ga gu ringara re wiso fuo girarago fuo susiri nga udiudi kpokuta naadu nga na agbooro ti ni ya, na zozo zende ahe a, ni kina gu uru re.

12Manu ki digi ni kina gu wiso re, fuo ri yo mbaku zende ahe nga ga gu ringara re, awiri aYisaraere abí nga manu berewe te, ono i ki niri kina gu zuzuhe nga ga ringara Kanana ni gu garã re.

13Ho Yosua ada ni ku pati Yereo, ko ki tuka bangiriko ki ngere, oni ngére, kumba ki ru pati ko na gako basape be ko nyee; Yosua ki ndu koyo du ko ni, ki ya fu ko “Watadu mo tipa rani na tipa avurarani?”

14Ko ki ya, “Oó, ono mi ye awere ni barutirivura ku ri ga Yekova rimbasa aborosovura.” Yosua ki vagadi ku sande ni kpakpuko, ki irisi ko, ki ya fu ko, “Gini pai gumba gi gbia fu gako moyambu?”

15Barutirivura ku ri ga Yekova rimbasa aborosovura ki ya fu Yosua. “Mo úru rakata nduro yo, bambiko gu rago ru mo rogo re si ni kparakpara ha.” Yosua ki mangi he wo.

← Chapter 4 Jump to: Chapter 6 →