Joshua 9

Zande

← Chapter 8 Jump to: Chapter 10 →

1Ono ho agu abakindo naadu mbiti Yaradene yo agi he ni, naadu rogo ringara abaagangara, na rogo ringara kpasakpasa rago nga gu ndu ku Rebanona yo, pangba Bakere Baime, nga aEto, na aAmoro, na aKanano, na aPereso, na aIvo, na aYebuso;

2i ki dungura tiyo wa boro sa, ka so vura kuti aYosua na aYisaraere.

3Ono ho aboro Gibona agi pa agu apai ni Yosua amangi Yereo na ni, na Ai,

4i ki mangi pai ni biriki, ki ndu ki mangi pai wa i nidu wa kedikedi aboro, ki rogo kuru amangu ku auru gayo adongi, na amangu imekakue, ni kina kpata ha, ni sipisipi he, ni rungurungu he;

5na kuru kpata rakata nduyo yo, ni rungurungu he, na kpatakpata aroko ti kpotoyo. Gayo riahe dunduko ki du ni kina ugu he ni nvutanvuta ha.

6I ki ndu ku bataya yo koyo du Yosua ni ku Girigara yo, ki ya fu ko, na fu aboro aYisaraere, “Ani ye gii ngbi yo tuturũ; mo zúnga he fu rani tie.”

7Aboro aYisaraere ki ya fu aIvo, “Si ngia oni nga agu yo naraka dagba rani; ka ani zunga he fu roni waĩ?”

8I ki ya fu Yosua, “Ani nga gamo amoyambu.” Yosua ki ya fu yo, “Ada nga oni? Oni naye wari?”

9I ki ya fu ko, “Gamo amoyambu naye tuturũ gii ngbi yo mbiko rimo Yekova ga Mbori. Bambiko ani gi pande ko, na gu pai ko amangi Ezipeta yo,

10na gu pai ko amangi agu abakindo ue na ni, nga ga aAmoro yo, naadu mbiti Yaradene yo.

11Gaani abaakumba na agu aboro naraka rogo gaani ringara ki gumba pai fu rani ki ya, ‘Oni rógo riahe ku beroni tipa nduge, ki ndu ka ngbisa yo, ki ya fu yo, “Ani nga gaoni amoyambu; awere oni zúnga he fu rani tie.”’

12Gi gaani kpokuta re ani arogo ho ni fafoi he rogo gaani abambu ho ani aguari ni ka ye kono du oni ni; ono awere, mo ngére, si ugu dũ, ki du ni kina nvutanvuta ha.

13Agi amangu imekakue re adu ni kina vovo ho ho ani ahihisi he ni, mo ngére si sipi dũ; gi gaani aroko re na rakata si kpataka be bagbanga nduge.”

14Aboro ki di bete gayo riahe, ka i asana nga Yekova tipa pa yo mbata ya.

15Yosua ki mbakadi pa zereda na yo, ki zunga he fu yo, ka batasa yo ni ungayo. Abazogo rimbasa aboro ki zunga he fu yo a.

16Si ki ta du wa gere, ho rame anyasi ni biata fuo zunga yo he fu yo, i ki gi he ya mbembedi aboro nga yo, nanaraka kina dagba yo.

17Awiri aYisaraere ki guari ka ndu, ki da ti gayo abaakporo ti biata uru. Ono gayo abaakporo angia Gibona, na Kefira, na Birota, na Kiriyata-yarima.

18Ono awiri aYisaraere aimo nga yo te, bambiko abazogo rimbasa aboro azunga he fu yo ti rimo Yekova, nga ga aYisaraere Mbori. Rimbasa aboro dunduko ki nigumba rimo abazogo.

19Ono abazogo dunduko ki ya fu rimbasa aboro dunduko, “Ani azunga he fu yo ti rimo Yekova, nga ga aYisaraere Mbori, si du ka ani arengba nga na manga yo ti ni ya.

20Gi pai re ka ani mangi he fu yo, ki he yo ni ungayo; zinga ka du ku ri rani, tipa gu zungahe ani azunga ha fuyo.”

21Abazogo ki ya fu yo, “Oni hé yo ni ungayo.” Si du i asa yo ti ni ni abakua nyake, na abatudi ime fu rimbasa aboro dunduko, a wa abazogo agumba ha fu yo.

22Yosua ki yambu yo, ki ya fu yo, “Tipagine oni anangi rani ti ni, ki ya, ‘Ani tuturũ na oni’ ho oni naraka ni kina dagba rani?

23Awere tie oni nga aboromotiwa, agu roni adú ni akanga, ni abakua nyake, na ni abatudi ime kindi, tipa gu bambu nga ga gi Mbori.”

24I ki karaga pai fu Yosua, ki ya, “Bambiko i agumba ha fu gamo amoyambu ni rengo, ya Yekova gaoni Mbori arugu gako moyambu nga Mose ko fú ringara fu roni dunduko ki ba tunga araki rogo gu ringara re kpakaya barangba roni; si du ani agunde ti ni tipa ungarani be roni, ki mangi gi pai re.

25Mo ngére ani awere kina ku be ro. Gu pai ngba bangiro ni rurupai ka manga ha fu rani, mo mángi kina ha.”

26Ko ki mangi he wo fu yo, ki batasi yo be awiri aYisaraere ka i aimo nga yo ya.

27Ono Yosua ki moi yo ti kina gu uru re ni abakua nyake, na ni abatudi ime tipa rimbasa aboro, na tipa ga Yekova bamotumo, rogo gu ba ko aidi ka sia ha, ki da ku awere.

← Chapter 8 Jump to: Chapter 10 →