Joshua 24

Zande

← Chapter 23 Jump to:

1Yosua ki dungura angbatunga aYisaraere dunduko ku Sekeme yo, ki yambu ga aYisaraere abaakumba, na agu yo nadu ku ri arikaaboro, na abasapungbanga, na abarumbatayo fu aYisaraere; i ki ye ki ru bara bangiri Mbori.

2Yosua ki ya fu aboro dunduko, “Ya Yekova nga ga aYisaraere Mbori wẽ, ‘Abaroni anaraka bakuru yo ku mbiti Di yo, ono gu ko sa nangia Tera, ko naadu ni ba Abarayama, ni ba Naora a. I anamanga pa kura ambori.

3Mi ki di baroni nga Abarayama mbiti gu Di yo re, ki ngbe ku mbata yo fu ko ku rogo ringara Kanana dunduko, ki kiisi pa ngbatungako. Mi ki fu Yisaka fu ko;

4ki fu aYakoba na Esau fu Yisaka. Mi ki fu gu ringara abaagangara Seira fu Esau ni gako, ono Yakoba naandu na awiriko ku Ezipeta yo.

5Mi akedi aMose na Arona, ki kedi agberãngbi ku ri Ezipeta, na agu apai mi amangi he ku dagba yo; fuo gure mi ki kusi roni yo.

6Mi ki kusi abaroni Ezipeta yo, oni ki ye ki da ti baime. AEzipeto ki do fuo abaroni na angbagidavura na abanduri afarasi dati Zamba Baime.

7Ho i akpari ni fu Yekova, ko ki moi bitimo dagba roni na aEzipeto, ki kedi baime ku ri yo, si ki dadi yo. Bangironi ki bi gu pai mi amangi he Ezipeta yo; oni ki raki ku ngbakungba yo tipa dungu arame.

8Mi ki ye na oni ku rogo ringara aAmoro, nanasunga mbiti Yaradene yo. I ki so vura na oni; mi ki fu yo ku be roni, oni ki di gayo ringara ni gaoni, mi ki gbarasi yo barangba roni.

9Fuo gure Baraka wiri Sipora, nangia bakindo Moaba, ki mo ku ari ki so vura kuti aYisaraere. Ko ki kedi sunge ki yambu Birama wiri Beora ko tiwa roni;

10ono mi agia nga pa Birama te; si du ko afu maku ti ni fu roni. Si du mi ki batasi roni be ko.

11Oni ki si Yaradene ku mbiti he yo, ki ye ku Yereo yo. Aboro Yereo ki so vura kuti roni, wa sa na aAmoro, na aPereso, na aKanano, na aEto, na aGirigaso, na aIvo, na aYebuso. Mi ki fu yo ku be roni.

12Mi akedi abando ku mbata yo fu roni, nga agu ra nado abakindo aAmoro ue barangba roni; si adu nga mbiko gaoni basape te, na gaoni mboto a te.

13Mi afu ringara fu roni nga gu oni amanga nga sunge tipa ha ya, na abaakporo oni adudua nga ha ya, oni araka rogo ho. Oni ari zuzu agu abakakue na zuzu agu aeraya oni arũka nga ha ya.’

14“Awere tie, oni gúnde ti Yekova, ki nimangi pako ni ndikidi rengo na rurupai. Oni báfu agu ambori ku sa yo abaroni anairisa ha mbiti gu Di yo re, na Ezipeta yo a. Oni ki nimangi pa Yekova.

15Ono ka si angba nga bangironi ka manga pa Yekova ya, oni sía gu ni areme oni ka amanga pa ni; watadu agu ambori abaroni anamanga pa ha mbiti gu Di yo re, na agu ambori nga ga aAmoro, nga agu aboro oni araka rogo gayo ringara; ono mi ni tire na gimi aborokporo, ani amánga kina pa Yekova.”

16Aboro ki karaga pai ki ya, “Ani aida nga ka mbu pa Yekova, ka manga pa kura ambori te;

17bambiko kina Yekova gaani Mbori, nakusi rani na abarani ringara Ezipeta yo, kporo akanga yo, ki nimangi gu baiiriwo apai re ku bangirani, ki nibanda rani ngba agu agene dunduko ani anandu ngba ha, na dagba agu aboro dunduko ani asusa dagba yo.

18Yekova ki do aboro dunduko barangba rani, nga aAmoro naaraka rogo gu ringara re. Si du ani ka amanga pa Yekova ti ni a; bambiko ko nga gaani Mbori.”

19Yosua ki ya fu aboro, “Oni arengba nga na manga pa Yekova te, bambiko ko nga ziazia Mbori, nga iraringo Mbori, ko avú nga roni tipa gaoni samungu na gaoni ingaapai te.

20Ka oni mbú pa Yekova, ka manga pa kungba ambori, ko asá tiko ki mangi roni goegberẽ, ki nyasi roni dunduko, fuo manga ko wenepai fu roni.”

21Aboro ki ya fu Yosua, “Ai; ono ani amánga pa Yekova amanga.”

22Yosua ki ya fu aboro. “Oni nga adezirehe kuti roni ni tironi ya oni sia Yekova, ka manga pako.” I ki ya, “Ani nga adezirehe.”

23Ko ki ya, “Awere tie, oni báfu gu kungba ambori ku sa yo du dagba roni, ki fu kpotoroni yo fu Yekova, nga ga aYisaraere Mbori.”

24Aboro ki ya fu Yosua. “Ani amánga pa Yekova gaani Mbori, ani agía fugoko a.”

25Si du Yosua azunga he ti ni na aboro ni gu uru re, ki moi rugapai fu yo tipa sarangbanga Sekeme yo.

26Yosua ki ke agi apai re rogo ga Mbori kitabu rugute. Ko ki di bakere mbia, ki dua ha yo tii gu gero naadu pati ga Yekova kparakpara ba.

27Yosua ki ya fu aboro dunduko. “Oni ngére, gi mbia re nikadu ni dezirepai kuti rani; bambiko si gi agu apai dunduko Yekova agumba ha fu rani. Si nikadu tie ni dezirepai kuti roni, oni ka ora rimo gaoni Mbori.”

28Si du Yosua aasia aboro ti ni i ga ku sa yo, aboro dunduko ni ba sa sa ku rogo gayo angbi.

29Fuo agi apai re Yosua nangia wiri Nuna ki kpi, nangia ga Yekova moyambu, garãko adu wa 110.

30I ki kpisidi ko kina rogo gako ringara nga Timenata-sera, du rogo ringara abaagangara Efuraima yo, ku nodiyo pati bagangara Gasa.

31AYisaraere anamanga pa Yekova ti rago Yosua dunduko, na ti agu arago dunduko nangia ga agu abaakumba nanye ni ungayo fuo kpio Yosua, nangia agu yo naini pa gu pai dunduko Yekova amangi he fu aYisaraere.

32Agu ameme Yosefa awiri aYisaraere ayega na ni Ezipeta yo, i akpisidi he Sekeme yo, rogo gu bete sende Yakoba angbe he be awiri Amora nangia ba Sekeme na marã 100. Si ki du ni ga atita Yosefa mosoro.

33Erazara ki kpi a nangia wiri Arona. I ki kpisidi ko rogo gu bakporo nga Giba nangia ga Finasa nga wiriko, nga gu i afu fu ko rogo ringara abaagangara Efuraima.

← Chapter 23 Jump to: