Joshua 23

Zande

← Chapter 22 Jump to: Chapter 24 →

1Si ki ta du wa gere fuo dungu arame, ho Yekova afu zereda ni fu aYisaraere be avurayo dunduko kirikiri. Yosua Ki du ni gbinza ko, dungu garã asaki ko gbe,

2Yosua ki yambu aYisaraere dunduko, na gayo abaakumba na gayo abazogo na gayo abasapungbanga, na gayo abarumbatayo fu aboro, ki ya fu yo, “Mi gbinza awere, dungu garã saki re gbe.

3Oni bi agu apai dunduko Yekova gaoni Mbori amangi he kuti agi arika aboro re mbiko roni, bambiko Yekova, gaoni Mbori, ko du naaso vura tipa roni.

4Oni ngére, mi akparaka agu arikaaboro fu roni nanye, i du ni gaoni aboro tipa angbatungaroni, tona Yaradene yo, ki da ti gu Bakere Baime ku dioyo, wa sa na agu arikaaboro mi aima roga yo Ku sa yo.

5Yekova gaoni Mbori, ko adó yo barangba roni, ki do yo ti bangironi ku sa yo; oni adía gayo aringara, a wa Yekova gaoni Mbori akido he fu roni.

6Si du oni ngárã tie ka ka kuti agu apai dunduko du ni keke he rogo ga Mose kitabu rugute yo ka amanga ha. Ka oni asá nga tironi ti ni ku kumbabe na ku garebe a ya;

7ka oni akóda nga tironi na agi arikaaboro nanye dagba roni re ya, ka oni ayámba nga rimo gayo ambori a ya, watadu zunga he ni rimoho, watadu manga paha, watadu tumusa ku sende barangba ha a ya.

8Ono oni ká kuti Yekova gaoni Mbori, a wa oni amangi ki da ti gi uru re.

9Bambiko Yekova ado bakere arikaaboro barangba roni du ni nyanyaki yo a. Ono tipa roni, a nga boro ho sa arengbe ka ru barangba roni dati gi uru te re.

10Boro sa dagba roni adó aboro 1,000; bambiko Yekova gaoni Mbori, ko du naso vura tipa roni, a wa ko akido he fu roni.

11Oni bánda tironi tie wenengaĩ, oni nikpí nyemu Yekova gaoni Mbori.

12Bambiko ka oni ga ku sa yo, ka koda tironi na yangara agi arikaaboro re nanye dagba roni, ki rogo tironi na yo, ki nirogo awiriyo nga ade, i ki nirogo awironi nga ade a,

13oni íni he ni rengo ya Yekova gaoni Mbori ko adó nga agi arikaaboro re barangba roni kindi te. Ono i adú fu roni ni nzingiripai, ni gbina, ni ũrupa pavururoni, na wa akiwe bangironi yo, daho oni ka nyasa ni rogo gi wene ringara re nga gu Yekova gaoni Mbori afu fu roni.

14“Awere mi nikandu ngba gu gene nga ga aboro zegino dunduko, oni dunduko íni he kpotoroni yo na mbisimoroni, ya a nga wenepai nakpa sa dagba agu apai dunduko Yekova gaoni Mbori akido pa ha fu roni te; si amangi dunduko fu roni, a nga pai sa nakpa te.

15Ono wa weneapai aye fu roni dunduko nga gu Yekova gaoni Mbori akido pa ha fu roni, kina wo Yekova ka akeda gbigbitaapai ku ri roni a, daho ko ka ba tungaroni ni kpakaya rogo gi wene ringara re nga gu Yekova gaoni Mbori afu he fu roni.

16Ka oni gú auru gu zungahe nga ga Yekova gaoni Mbori, nga gu ko arugu roni na ni, oni ki ndu ki nimangi pa kura ambori, ki nitumusa ku sende barangba ha. Ga Yekova erã arúnguda kuti roni, oni ki nyasi ni ipo rogo gu wene ringara re nga gu ko afu he fu roni.”

← Chapter 22 Jump to: Chapter 24 →