Joshua 2

Zande

← Chapter 1 Jump to: Chapter 3 →

1Yosua nangia wiri Nuna akedi akumba ue Sitimi yo ni gbuko i moi rago, ki ya fu yo, “Oni ndú ka bi ringara, na Yereo a.” I ki ndu da rimi ku rogo gu bambu nga ga natakuari rimori angia Raba, ki sungu yo.

2Aboro ki gumba ha fu bakindo Yereo, ki ya, “Mo ngére, akumba niye ku erẽ yuru nga awiri aYisaraere ka maa ringara.”

3Bakindo Yereo ki kedi sunge koyo du Raba ni, ki ya, “Mo kúsi agu akumba niye kono du mo ni, nga agu yo rimi ku dimo kpuro yo; i ye ka maa ringara dunduko.”

4Ono de aima roga agu akumba ue re, ki oko yo, ri ki ya, “Ni rengo, akumba niye kono du mi ni, ono mi aina nga ho i niye ni te,

5si ki ta du wa gere ho rago kisa ngbadimo bakporo nida ni, ho rago nibiri ni, akumba ki kuru ku zegi yo, mi aina nga ho akumba nindu ku ho ni te, oni dó fuo yo ni ipo, bambiko oni agbia yo.”

6Ono ri aima ndu na yo ku ri bambu yo, ki oko yo ku tii katakpa nzibi yo, nga gu ri agbaragi he ri bambu yo.

7Akumba ki pe fuo yo ngba gu gene nandu ku Yaradene yo dati basigo ime; ho agu yo akuru ni ku zegi yo nape fuo yo i ki kisi ngbadimo bakporo ni ba sa.

8Mbata agu aYisaraere ue nikapi, Raba ki ye fuo yo ku ri bambu yo,

9ki ya fu yo, “Mi ini ya Yekova fu gi ringara re fu roni, iriworoni ti ti rani, aboro gi ringara re zizirĩ azizirã be roni dunduko.

10Bambiko ani agi he wa Yekova augusi gu ime nga Zamba Baime barangba roni, ho oni akuru ni Ezipeta yo. Ani ki gi gu pai oni amangi fu agu abakindo ue nga ga aAmoro yo, naadu mbiti Yaradene yo, Siona na Ogo, nga agu yo oni aba tungayo kpakaya.

11Ho ani agi he ni, kpotorani yo ki zizirĩ ni ba sa, a nga boro sa auani anye rogo ni yo berewe be roni te; bambiko Yekova gaoni Mbori, ko nga Mbori du ngbangbaturũ ari yo na ku sende no a.

12Were, mi nakpara fu roni tie, oni zúnga he fere ti rimo Yekova, ya wa yugu mi weneringise fu roni, kina wo oni ka yugo weneringise fu ga buba aborokporo. Oni ki fu ndikidi ngbaanga fere,

13ya oni abátasa buba ni ungako, na nina, na akawire, aunvuruami na atamere, na agu ahe dunduko du be yo ki batasi ungarani be kpio a.”

14Akumba ki ya fu ri, “Ungarani ku ba gamo! Ka mo akúsa nga pa gi gaani apai re ya, si adú wo, ho Yekova ka fu ringara ni fu rani, ani amánga pai ni weneringise na rengo foro.”

15Ri ki zogo yo ti gire ti bangiri bambu ku sende yo, bambiko gari bambu adu ni dikadika ha kuti ngapa bakporo, ri ki niraki ri ngapa.

16Ri ki ya fu yo, “Oni óro ku dagba abaagangara yo, abado fuo roni ka gbia roni. Oni ki gbu koyo tipa uru biata, daho abado fuo roni ka karaga tiyo ni; fuo gure oni ki ndu gaoni nduge.”

17Akumba ki ya fu ri, “Pai adú nga ku ri rani mbiko gi ga zungahe re zungadi mo rani ani zunga ha te.

18Mo ngére, ho ani ka ye ni ku rogo gi ringara re, mo ki kpira gi zamba gire re ti gu bangiri bambu zogo mo rani ti ni. Mo ki dungura abamo, na namo, na awirinamo, na ga bamo aborokporo dunduko fuo ro ku dimo yo.

19Ka gu boro kuru ku zegi yo ti ngbadimo ga bambu ku gene bakporo yo, kureni adú kina ku ri ni, ani ki zanga pai ku ri rani; ono gu ni ka du na mo dimo yo, kureni adú ku ri rani, ka boro táĩ beni kuti ni.

20Ono ka mo kúsi pa gi gaani pai re, gu zungahe zungadi mo rani ani zunga ha si azía nga rani te.”

21Ri ki ya, “Si adú kina wo, wa gumba oni he.” Ri ki kedi yo ku sa yo, i ki ga; ri ki kpira gu zamba gire re ti bangiri bambu.

22I ki ndu, ki da ku dagba abaagangara yo, ki nye yo tipa uru biata daho abado fuo yo akaraga tiyo ni; abado fuo yo agbata yo ngba gene, ono i abi nga yo te.

23Agu akumba ue re ki karaga tiyo, ki zorõ ri abaagangara yo ki si ku mbiti yo, ki ye koyo du Yosua ni nga wiri Nuna, ki gumba agu apai fu ko dunduko naamangi yo.

24I ki ya fu Yosua, “Ni rengo, Yekova fu ringara fu rani dunduko; ku ri gure agu aboro naraka rogo gu ringara re i ima zizirã azizirã be rani dunduko.”

← Chapter 1 Jump to: Chapter 3 →