Joshua 7

Zande

← Chapter 6 Jump to: Chapter 8 →

1Ono awiri aYisaraere ati ndika rogo pa gu dikadika ahe re; bambiko Akana nangia wiri Karumi nadĩ ahe dagba gu dikadika ahe re; Karumi ki ngia wiri Zabadi, Zabadi ki ngia wiri Zera, ni ngbatunga Yuda. Ga Yekova erã ki rungudi kuti awiri aYisaraere.

2Yosua ki kedi aboro Yereo yo ku Ai yo, du mbembedi na Bete-avena, pati Betere ku uroyo, ki ta gumba pai fu yo niya, “Oni ndú ka maa ringara.” Si du aboro ki ndu ka maa rago Ai yo.

3I ki karaga tiyo koyo du Yosua ni, ki ya fu ko, “Ka aboro ndú nga dunduko ya; ono agu yo ndú wa 2,000, watadu 3,000 ki mangi Ai; ka mo mbúsi nga aboro i ndu koyo dunduko ya, bambiko i ni kina umba yo gbua.”

4Si du aboro andu ti ni koyo wa aboro 3,000; i ki oro aora be aboro Ai.

5Aboro Ai ki imi yo wa 36, i ki do yo ado ngbadimo bakporo yo ki da kina ku Sabarima yo, ki niimi yo wa i azora koyo. Kpoto aboro yo ki zizirĩ azizirã, ki du wa kina ime.

6Yosua ki siri gako aroko, ki vagadi ku sande ni kpakpuko barangba ga Yekova sanduki da kina ku nyemu, ko na ga aYisaraere abaakumba; i ki uka nvutu ku riyo yo.

7Yosua ki ya, “Ako, ako Gbia nga Yekova, tipagine mo aye ti ni na agi aboro re ku mbiti Yaradene no, ka fu rani ku be aAmoro, i nyasi rani? So! ka ani aidi ka nye kina mbiti Yaradene yo!

8Ako, Gbia, mi ayá waĩ tie? AYisaraere nasa giiyo fu avurayo!

9Bambiko aKanano agía ha na agu aboro naraka rogo gi ringara re dunduko, i agúari kuti rani kirikiri, ki digisi rimorani auru kpotosende no. Mo amánga waĩ tipa wowo rimoro?”

10Yekova ki ya fu Yosua, “Mo gúari, tipagine vagadi mo ku sande ti ni ni kpakpuro wa gere?

11AYisaraere ingi pai; i gu auru gi zungahe nga gu mi arugu yo kuti ni; i dĩ ahe dagba gu dikadika ahe re; ki rogo ho ni dĩ, ki gumba zire, ki moi he ku dagba gayo ahe yo.

12Si du ka awiri aYisaraere arengba nga ti ni na ru barangba avurayo ya; i sa giiyo fu avurayo, bambiko i du tipa gbarasa yo. Mi adú nga na oni berewe te, kina gu ka oni gbárasi gu dikadika ahe du dagba roni re.

13Mo guari, ki kpara aboro i du ziazia, ki ya fu yo. ‘Oni kpára tironi ka du ziazia tipa gba; bambiko ya Yekova nga ga aYisaraere Mbori wẽ, “Ako aYisaraere, dikadika ahe kina be roni; ka oni rengbe nga na ru barangba avuraroni te, da kina ho oni ka kusa gu dikadika ahe ni re be roni.”

14Gba wiso i yé na oni mbembedi a wa du pa angbatungaroni; gu ngbatunga sa Yekova ka zia ha i nikambeda a wa du pa rika abayo; gu rika Yekova ka zia ha i nikambeda na gayo aborokporo. Aboro gu kporo sa Yekova ka zia yo i nikaye ni ba sa sa.

15Gu ni i ka zia ni na gu dikadika ahe re be ni, i azó ni azo ni we, ni na gaani ahe dunduko, bambiko ni gu auru ga Yekova zungahe, ki mangi wasiwasi pai Yisaraere no.’”

16Si du Yosua aguari ti ni ngbatutu wiso, ki mbedisi aYisaraere wa pa angbatungayo adu, i ki zi ngbatunga Yuda.

17Ko ki mbedisi arika Yuda, i ki zi gu rika nga ga aZera. Ko ki ye na rika Zera nga akumba ni ba sa sa, i ki zi Zabadi.

18Ko ki ye na ga Zabadi aborokporo nga akumba ni ba sa sa, i ki zi Akana, nangia wiri Karumi Karumi ki ngia wiri Zabadi, Zabadi ki ngia wiri Zera, ni ngbatunga Yuda.

19Yosua ki ya fu Akana, “Wire, mi nazungadi ro, mo táasi rimo Yekova ga aYisaraere Mbori; ki gumba gu pai fere awere mangi mo ho; ka mo óko nga ha ti re ya.”

20Akana ki karaga pai fu Yosua, ki ya, “Mi ingi pai kuti Yekova ni rengo, nga ga aYisaraere Mbori, gere nga gu pai mangi mi:

21ho mi abi bawene roko aBabero ni dagba agu ahe i agbu he, gbiakuti feda wa asekere 200, na kpakawa dahabu du barõa asekerehe wa agarama 820, mi ki kpi nyemu he gbe, mi ki rogo ho, mo ngére, si ni okooko ho ku sende yo vuru gi bamburoko yo, na feda tii he yo.”

22Si du Yosua akedi asunge ti ni, i ki oro ku bamburoko yo; oni ngére, ko aoko ho rogo gako bamburoko yo, feda ki du tii he yo a.

23I ki rogo ho bamburoko yo, ki ye na ni koyo du Yosua ni, na koyo du awiri aYisaraere ni dunduko i ki zozogo ho ku sande ku bara bangiri Yekova.

24Yosua na awiri aYisaraere dunduko, i ki di Akana, nangia wiri Zera, na feda, na roko, na kpakawa dahabu, na awiriko, na agu awiriko nga ade, na gako abaabagara, na gako adongi, na gako akandoro, na gako bamburoko, na agu ahe nadu be ko dunduko. I ki ye na yo ku Ngboongboorago Akora yo.

25Yosua ki ya, “Tipagine rungosi mo rani ti ni? Yekova nikarungosi ro ni gi uru re.” AYisaraere dunduko ki sopo ko ni ambia; i ki zo yo ni we, ki nisopo yo ni ambia.

26I ki ba guguda ambia ku auru ko, si kina ho da ku awere. Si du Yekova ki sa tiko ti gako ngariangaria zinga. Si du i ayambu rimo gu ba ti ni re nga Ngboongboorago Akora, ki da ku awere.

← Chapter 6 Jump to: Chapter 8 →