Joshua 13

Zande

← Chapter 12 Jump to: Chapter 14 →

1Were Yosua adu ni gbinza ko, garã asaki ko ni dungu he, Yekova ki ya fu ko, “Mo du ni gbinza ro, garã saki ro ni dungu he, dungu ringara nye tipa dia ha.

2Gu ringara nye tipa dia ha, si nga gere: aringara aFereseto dunduko, na ga aGeruso dunduko;

3tona Sioro yo, du pavuru Ezipeta ku uroyo, sa bangbanda Ekurone ku nodiyo, si nga gu sende nga ga aKanano: agbia aFereseto yo bisue, ga Gaza ko, ga Asedodo, ga Asekerono, ga Gito, na ga Ekurone ko.

4Agu yo re nga ga aAvo yo ku sudiyo: ringara aKanano dunduko, na Meara nga ga aSidona rago, ki da ku Afeki yo, ku bangbanda ga aAmoro rago yo:

5na ringara aGebaro, na Rebanona dunduko ku uroyo, tona Bara-gada yo, ti mburu Bagangara Erumone yo sa barima ku Amata yo.

6Mi ni tire adó agu aboro barangba awiri aYisaraere nga araki ringara abaagangara yo dunduko tona Rebanona yo, ki da ku Miserefota-maima yo, nga aboro Sidona dunduko; ono mo tigamo akpáraka ringara fu aYisaraere ni gayo, wa mi arugu ro na ni.

7Awere tie, mo kparaka gi ringara re fu agu angbatunga du ribua ni gayo, na fu bebere ngbatunga Manase.”

8Ngbatunga Rubena na ngbatunga Gada arogo gayo angbi na bebere ngbatunga Manase, nga gu Mose afu fu yo, ku mbiti Yaradene ku uroyo, kina wa Mose afu he fu yo nangia ga Yekova moyambu;

9tona Aroera yo du ti bangbanda ngboongboorago Arunona yo, na gu bakporo du bebere ngboongboorago yo, na gu kpasakpasa rago du Medeba yo dunduko ki da ku Dibona yo;

10na agu abaakporo dunduko nga ga Siona nga bakindo aAmoro, naazogo rago Esebona yo, ki da ti bangbanda ga aAmono rago;

11na Girada, na ringara aGesuro na aMako, na Bagangara Erumone dunduko, na Basana dunduko dati Sarekara;

12ga Ogo ngbi dunduko Basana yo, nga gu ko naazogo rago Aseterota yo na Ederei yo, nga gu ko nanye sa dagba yangara aRefa; agi yo re Mose adi be yo, ki dandi yo.

13Ono awiri aYisaraere ado nga aGesuro te, na aMako a te: ono aGesuro na aMako anye dagba Yisaraere, daku awere.

14Kina ngbatunga Revi ko afu nga angbi fu yo ya; agu aũmotumo nga ga Yekova, nga ga aYisaraere Mbori, nga gu i azo ho ni we, si nga gayo mosoro, a wa ko agumba ha fu yo.

15Mose ki fu ũkumbo fu ngbatunga Rubena a wa pa arikayo adu.

16Gayo ringara atona Aroera yo, du ti bangbanda ngboongboorago Arunona, na gu bakporo du bebere ngboongboorago yo na gu kpasakpasa rago du Medeba yo dunduko;

17na Esebona, na gaha abaakporo dunduko rogo kpasakpasa rago yo; nga Dibona, na Bambota-bara, na Betebara-mona;

18na Yasa, na Kedamota, na Mefata;

19na Kiriyataima, na Sebima, na Sarete-safara ri gangara ngboongboorago yo;

20na Betepeora, na zorõzorõ rago pavuru Pisiga, na Bete-yesimota;

21na agu abaakporo dunduko du kpasakpasa rago yo, na gu ngbi nga ga Siona dunduko nga bakindo aAmoro, naazogo rago Esebona yo, nga gu ko Mose adi be ko na be agbia Midiana nga Evi, na Rekeme, na Zuru, na Uru, na Reba, i nangia agbia Siona naaraka rogo gu ringara re.

22Awiri aYisaraere aimi Birama ni basape, nangia wiri Bera, nangia irasoroka, dagba agu yo i aimi yo.

23Ga awiri Rubena bangbanda ringara adu nga Yaradene. Gere nga gu ringara nangia ga awiri Rubena a wa arikayo adu, na gaha abaakporo na akporo pati he.

24Mose afu ringara fu ngbatunga Gada a, a wa pa arikayo adu.

25Gayo ringara nangia Yasere, na abaakporo Girada yo dunduko, na bebere ga aAmono ringara, ki da ti Aroera pati Raba ku uroyo,

26na tona Esebona yo ki da ti Ramata-misipa, na Betonima; na tona Manaima yo ki da ti ringara Debiri;

27na ngboongboorago Bete-arama yo, na Bete-nimura, na Sukota, na Safona, na yangara ga Siona ringara, nangia bakindo Esebona, Yaradene ki du ni bangbandaha, ku pa di yo Baime Kinerota yo, mbiti Yaradene ku uroyo.

28Gere nga gu ringara nga ga awiri Gada, a wa pa arikayo adu, na gaha abaakporo na akporo pati he.

29Mose afu ringara fu gu bebere ngbatunga Manase; si ki du tipa bebere ngbatunga Manase a wa pa arikayo adu.

30Gayo ringara atona Manaima yo, na Basana dunduko, na ga Ogo ngbi dunduko nangia bakindo Basana, na abaakporo Yaire dunduko, nadu Basana yo, wa wa abaakporo 60,

31na bebere ringara Girada, na Aseterota na Ederei, nga agu abaakporo nga ga gu ngbi nga ga Ogo naadu Basana yo, si adu tipa ngbatunga Makira nangia wiri Manase, fu kina bebere ngbatunga Makira, a wa pa arikayo adu.

32Agere nga agu angbi Mose akparaka ha rogo kpasakpasa rago Moaba yo, mbiti Yaradene pati Yereo yo ku uroyo.

33Ono Mose afu nga ngbi fu ngbatunga Revi te; ono Yekova ga aYisaraere Mbori, ko nga gayo mosoro, a wa ko agumba ha fu yo.

← Chapter 12 Jump to: Chapter 14 →