Joshua 3

Zande

← Chapter 2 Jump to: Chapter 4 →

1Yosua ki guari ngbatutu wiso, i ki guari Sitimi yo ki ye ku Yaradene yo, ko na awiri aYisaraere dunduko; i ki sungu yo mbata i nikasi ku mbiti yo.

2Si ki ta du wa gere fuo rame biata, abarumbatayo fu aboro ki ta rogo abataya dunduko,

3ki rugu aboro, niya, “Ho oni ka bi sanduki mokido ni nga ga Yekova gaoni Mbori, na aboromotumo nga aRevi i nitindi he, oni ki guari ba roni ho, ki ndu fuo ho,

4oni ki ini pa gu gene oni akandu ngba ha, bambiko oni asusa nga ngba gu gene re mbata te. Ono dagba rago adú dagba roni na ni, wa bagiza mbiribe 2,000, ka oni mbédi nga na ni ya.”

5Yosua ki ya fu aboro, “Oni kpára tironi ziazia; bambiko gba Yekova akamanga iiriwo apai ku bangironi.”

6Yosua ki ya fu aboromotumo. “Oni túmba sanduki mokido, ki si ku mbiti yo mbata fu aboro.” I ki tumba sanduki mokido, ki susi ku mbata yo fu aboro.

7Yekova ki ya fu Yosua, “Ti gi uru re mi akatona kiisa pa ro ku bangiri aYisaraere dunduko, i ini he ti ni ya, wa mi adu na Mose, kina wo mi akadu na mo.

8Mo arúga agu aboromotumo ninatinda sanduki mokido, ki ya fu yo, ‘Ho oni ka da ni ti ngba ime Yaradene, oni ki ru zaa rogo Yaradene.’ ”

9Yosua ki ya fu awiri aYisaraere, “Oni yé kono, ka gia sangba Yekova nga gaoni Mbori.”

10Yosua ki ya. “Mbiko gere oni ka ina ti ni ya gu Mbori du ni ungako, ko du dagba roni, ko ahé nga do aKanano barangba roni, na aEto, na aIvo, na aPereso, na aGirigaro, na aAmoro, na aYebuso a te.

11Oni ngére, gu sanduki mokido nga ga gu Gbia du kpotosende ni gako dunduko, si nikasusa ku mbata yo fu roni ku rogo Yaradene.

12Oni rógo akumba 12 tie dagba angbatunga aYisaraere yo, nga akumba ni ba sa sa wa du pa ngbatungayo.

13Si adú wa gere, ho kpendu agu aboromotumo ninatinda ga Yekova sanduki, nga gu Gbia du kpotosende ni gako dunduko, ka ru ni rogo gu ime nga Yaradene, ime Yaradene arú zaa ka si afú nga ya, gu ime naye ngbi yo si ki dungura tihe ku rogo baha sa.”

14Si ki ta du wa gere, ho aboro aguari ni rogo gayo abamburoko, ka si ku mbiti Yaradene yo, aboromotumo ki tindi sanduki mokido ku mbata yo fu aboro.

15Ho agu yo natindi sanduki ada ni Yaradene yo, kpendu agu aboromotumo natindi sanduki ki zoro ku ime yo, ti ngba di, bambiko gu ime nga Yaradene regbo keahe si anihi ahi ki fu ku pia yo,

16gu ime naye ngbi yo si ki ru ki nidungura tihe tuturũ toni ku rogo baha sa, ku Adama yo nga gu bakporo du pati Saretana, na gu nafu ku pa di yo koyo du gu baime ni pangba kpasakpasa rago yo, nga Baime Tikpo, si ki kati dunduko. Aboro ki si di ku mbiti yo ningere ku Yereo yo.

17Agu aboromotumo natindi ga Yekova sanduki mokido ki ru aru zaa auru ugu sende bebere Yaradene yo, aYisaraere ki si asi dunduko ku mbiti yo auru ugu sende, daho rikayo asi ni kpakaya ku mbiti Yaradene yo.

← Chapter 2 Jump to: Chapter 4 →