Joshua 18

Zande

← Chapter 17 Jump to: Chapter 19 →

1Rimbasa awiri aYisaraere ki dungura tiyo ku Siro yo dunduko, ki dua bamburoko dungurati yo; ringara ki du ni zogozogo ho fu yo.

2Angbatunga awiri aYisaraere ki nye saba i akparaka nga gayo ringara fu yo ya.

3Yosua ki ya fu awiri aYisaraere, “Rago adú waĩ oni nidu na nyomoro tipa ndu ka dia gu ringara Yekova afu fu roni, nga ga abaroni Mbori?

4Oni sía akumba ni ba biata tipa ngbatungaroni ni ba sa sa. Mi akéda yo, i ki guari ka ndu ku rogo ringara dunduko, ki ke paha wenengaĩ kina kuti pa kparaka gayo angbi; i ki yega kono du mi ni berewe.

5I akpáraka ringara rogo saba. Yuda ki nye rogo gako bangbandarago ku sudiyo, ngbatunga Yosefa ki nye rogo gayo bangbandarago ku nodiyo.

6Oni ki ringbisi pa ringara rogo ho saba, ki ye na ringbisiringbisi paha kono du mi ni. Mi ki ba ake fu roni erẽ bara bangiri Yekova gaani Mbori.

7Bambiko aRevi adú nga na ngbi dagba roni te; bambiko sunge nga ga Yekova aboromotumo si nga gayo mosoro. AGada na Rubena na bebere ngbatunga Manase, i aima dia gayo angbi ku mbiti Yaradene ku uroyo, nga gu Mose afu fu yo nangia ga Yekova moyambu.”

8Akumba ki guari, ki ndu. Yosua ki rugu agu yo nandu ka ke pa ringara, niya. “Oni ndú ka ta rogo ringara dunduko, ki ke paha wenengaĩ, ki yega kono du mi ni berewe. Mi abá ake fu roni bara bangiri Yekova Siro no.”

9Akumba ki ndu ki ta rogo ringara dunduko, ki ke paha wenengaĩ ringbisi he kuti pa abaakporo, ni ba saba, ku kitabu yo. I ki yega koyo du Yosua ni ku bataya ku Siro yo.

10Yosua ki ba ake fu yo Siro yo ku bara bangiri Yekova; yo Yosua akparaka ringara ni fu awiri aYisaraere a wa pa kparaka arikayo adu.

11Ga ngbatunga Benyamina ringara adu a wa pa arikayo adu, gayo bangbandarago ki du dagba ngbatunga Yuda na ngbatunga Yosefa.

12Gayo bangbandarago ki tona ti Yaradene ku nodiyo, ki susi rogo ringara abaagangara ku dioyo; digidaha ki da ku ngbakungba Bete-avena yo.

13Bangbandarago ki kuru yo ku Ruza yo, ki susi ku pati Ruza yo ku sudiyo, si sa na Betere. Fuo gure bangbandarago ki zorõ ku Atarotaadara yo, pati gu bagangara du pati Beterono nadu pa di yo, ku sudiyo.

14Bangbandarago ki ke ku dioyo ki ndu ku sudiyo, tona ti gu bagangara sa kpakpuhe ku Beterono ku sudiyo; digidaha ki ngia Kiriyata-bara, si sa na Kiriyata-yarima, nga gu bakporo sa nga ga ngbatunga Yuda. Gere nangia bangbandaha ku dioyo.

15Gu nadu ku sudiyo si atona ti bangbanda Kiriyata-yarima; bangbandaha ki ndu ku dioyo, ki susi koyo du gu gugaabi ni nga Aime Nefatoa.

16Fuo gure bangbanda ha ndu kuti digida gu bagangara nangera ku rogo gu ngboongboorago nga ga wiri Inomi, nga gu au ti digida ngboongboorago Refaima ku nodiyo; si ki ndu yo ku ngboongboorago Inomi yo, du pati Yebusa ku suaiyo, ki zorõ ku Enerogere yo.

17Fuo gure si ki ke ku nodiyo, ki kuru Enesemese yo, ki ndu ku Gerirota yo, nga gu sa kpakpuhe ku gangara Adumima yo. Si ki zorõ ku pati Mbia nga ga Boana nangia wiri Rubena.

18Si ki susi ku pavuru Betearaba ku nodiyo, ki zorõ ku Araba yo.

19Fuo gure bangbandarago ki susi ku pavuru Bete-ogara yo ku nodiyo. Digida bangbandarago ki du ti Baime Tikpo ti durugaduruga ha ku nodiyo, ti digida Yaradene ku sudiyo. Gere nangia bangbandarago ku sudiyo.

20Bangbandarago ku uroyo ki ngia Yaradene. Gere nga gu ringara nga ga ngbatunga Benyamina, ringbisi he kuti abangbandarago pati he kirikiri, a wa pa arikayo adu.

21Agu abaakporo nangia ga ngbatunga Benyamina ringbisi he wa pa arikayo adu si nga Yereo, na Bete-ogara, na Emekekezizi,

22na Bete-araba, na Zemaraima, na Betere,

23na Avima, na Para, na Ofura,

24na Kepara-amoni, na Ofeni, na Geba ― wa abaakporo 12 na akporo pati he:

25Givona, na Rama, na Berota,

26na Misipa, na Kefira, na Moza,

27na Rekeme, na Irupere, na Tarara,

28na Zera, na Erefe, na Yebusa si sa na Yerusarema, na Gibata, na Kiriyata wa abaakporo 14 na akporo pati he. Gere nga gu ringara nga ga ngbatunga Benyamina, a wa pa arikayo adu.

← Chapter 17 Jump to: Chapter 19 →