1 Corinthians 10

Ahirani (आहिराणी नवा करार) - No Year

← Chapter 9 Jump to: Chapter 11 →

1ओ विश्वासी भावूसहोण, मनी ईच्छा शे कि तुमी आठवण ठेवा, कि आमना पूर्वजस्नी मोशे ना अनुकरण कर, तेस्ना संगे जंगल मा काय हुईन. परमेश्वर नि ढग ले धाळीसन तेस्नी पुढाकारी करी, आणि तो तेस्ले लाल समुद्र मधून सुरक्षित काळीसन कोल्ली जमीन वर लई उना.

2मोशे ना अनुयायी म्हणीसन, त्या सर्वा लोकस्नी वादळ आणि लाल समुद्र मा बाप्तिस्मा लीधा.

3आणि सर्वा लोकस्नी ती भाकर खादी जी परमेश्वर नि स्वर्ग मधून तेस्ले दिधी.

4त्या सर्वा लोकस्नी त्या पाणी ले पिद जे परमेश्वर नि तेस्ले दिधा, तेस्नी एक खडक मधून पाणी पिद, तो खडक तेस्ना संगे-संगे चालत होती, आणि ती खडक ख्रिस्त होता.

5पण परमेश्वर तेस्ना मधून गैरास कण खुश नई होता. एनासाठे त्या उजाळ जागा मा मरी ग्यात.

6या सगळ्या गोष्टी आमना साठे उदाहर ठरणात, कि आमी वाईट गोष्टस्नि लालूस नई करोत, जस तेस्नी करेल होत.

7तुमी मूर्तीस्ना पूजणारा नका बना, जसा कि तेस्ना मधून कितलाक बनी जायेल होतात, जस कि पवित्र शास्त्र मा लिखेल शे, “लोक खावा-पिवाले बठनात, आणि अनैतिक रिती कण नाच-कुदाले उठनात.”

8आणि नईत आमी व्यभिचार कराले पाहिजे, जस कि तेस्ना मधून कितलाक नि कर, आणि तेस्ना मधून तेवीस हजार लोक एक दिन मा मरी ग्यात.

9आणि नईत आमी प्रभु ले परखाले पाहिजे, जस कि तेस्ना मधून कितलाक नि कर, आणि सापस्ना द्वारे मारा मा उनात.

10आणि नईत तुमले कुरूकुरू कराले पाहिजे, ज्या रिती कण तेस्ना मधून कितलाक कुरूकुरू करणात, आणि ज्या दूत ले परमेश्वर नि धाळ, तेस्नी तेस्ले मारी टाक.

11पण ह्या सर्वा गोष्टी ज्या तेस्ना संगे घळनात, ते दुसरास्ना साठे उदाहरण शे. आणि त्या चेतावणी ना रितीवर आमना साठे ज्या जग ना आखरी टाईम मा जगी ऱ्हायनात लिखामा एयेल शे.

12एनासाठे कदी कोणी माणुस हय सांगस कि तो परमेश्वर वर पक्का विश्वास ठेवस, तेले सावधान राहाले पाहिजे, अस नई हुई जावो कि प्रलोभन मा पळीसन पाप करी बठो.

13तुमना वर तशीच परीक्षा एयेल शे जशी सर्वा लोकस्वर येस. पण परमेश्वर विश्वास योग्य शे, कारण कि तो तुमले अशी परीक्षा मा नई पळू देवाव जेना सामना तुमी नई करू सकावत, पण तो तुमले परीक्षा ना सामना करासाठे शक्ती बी दिन कि तुमी पाप पासून वाची सकोत.

14ह्या मुळे, ओ मना मित्रसहोण, मूर्ती नि उपासना पासून दूर राहा.

15मी तुमले समजदार समजीसन हय सांगस, कि जे मी सांगी ऱ्हायनु तेना विषय मा विचार करा कि मी बरोबर सांगी ऱ्हायनु कि नई.

16जव आमी प्रभु भोज कटोरा मधून पीतस, जेनावर आमी धन्यवाद करतस, त आमी खरज ख्रिस्त ना रक्त मा सहभागी होतस. आणि जव आमी भाकर मोळतस, त आमी खरज ख्रिस्त ना शरीर मा सहभागी होतस.

17जव कि एकच भाकर शे आणि तो ख्रिस्त शे, आणि आमी बी ज्या जास्त शेतस, ख्रिस्त मा एक शरीर शेतस कारण कि आमी सर्वा एकच भाकर मधून खातस.

18इस्त्राएल देश ना लोकस्ना बारामा मा विचार करा, जव सर्वा लोक परमेश्वर ले बलिदान करेल जेवण मधून खातस, त त्या परमेश्वर नि उपासना मा भाग लेतस. त्याच प्रमाणे ज्या लोक मूर्तीस्ले बलिदान करेल जेवण ले खातस, त त्या बी त्या मूर्तीस्नी उपासना मा सहभागी होतस.

19त मंग मी काय सांगाणा प्रयत्न्य करी ऱ्हायनु? काय मी हय सांगी ऱ्हायनु कि मूर्त्या खरज देव शेतस, जेस्ना साठे बलिदान करामा येस आणि काय ह्या बलिदानस्नी काही किंमत शे?

20नई, बस हय, कि त्या जे काही मूर्तीस्ले बलिदान करतस, ते परमेश्वर ना साठे नई, पण दुष्ट आत्मास्ना साठे बलिदान करतस, आणि मनी ईच्छा नई शे कि, दुष्ट आत्मास्ना सहभागी बनोत.

21तुमी प्रभु ना कटोरा, आणि दुष्ट आत्मा ना कटोरा ह्या दोनीस मधून नई पिसू सकतस. तुमी प्रभु नि मेज आणि दुष्ट आत्मा नि मेज ह्या दोनीस्मा सहभागी नई होवू सकतस.

22जर तुमी असा करतस, त निश्चितच प्रभु ले राग देवाळतस. आठवण ठेवा कि तुमी तेना तून शक्तिमान नई शेतस.

23त्या लोक सांगतस, आमले सर्व काही करानी परवानगी शे, खर शे, पण सर्व काही आमना साठे फायदान नई. आमले सर्व काही करानी परवानगी शे, पण सर्वा वस्तूसकण आत्मिक उन्नती नई.

24कोणी बी आपलाच चांगला ना शोध मा नई राहो पण दुसरास्ना चांगला ना बारामा मा विचार करा.

25जे काही कस्साईस्ना आठे विकावस, तुमी तेले स्वातंत्रता कण खावा, आणि आपला विवेक ले शुद्ध ठियसन आणि बिगर प्रश्न विचाराना कि हय मांस कथाईन उन.

26कारण कि पवित्र शास्त्र सांगस, “पृथ्वी आणि तेनी भरपुरी प्रभु नि शे.”

27कदी अविश्वासीस मधून कोणी तुमले आमंत्रण देस, आणि तुमी जावाना निर्णय करतस, त जे काही तुमना समोर ठेवामा येवो तेच खावा, तरी बी तुमले हय नई विचाराले पाहिजे कि हय अर्पण करेल शे, एनासाठे कि तुमले खातांना दोषी वाटाले नको पाहिजे.

28पण कदी कोणी तुमले सांगस, कि “हय जेवण मूर्ती ले बलिदान करामा एयेल शे,” त तुमी तेले विवेक मुळे खावू नका.

29मना अर्थ तुमना विवेक मुळे नई, पण जेनी तुमले सांग तेना विवेक मुळे खावू नका. कारण कि मनी स्वातंत्रता कोणी दुसरा ना विवेक कण नई परखा मा येवाले पाहिजे.

30कदी मी आपला जेवण धन्यवाद करीसन खास, त जेना मुळे मी धन्यवाद करस, तेना मुळे मनी निंदा काब होस?

31म्हणून, मनी तुमले हय सांगानी ईच्छा शे, कि भले तुमी खावोत, व काही बी करोत, सर्व काही परमेश्वर नि महिमा ना साठे करा.

32मी जे काही करस तेनामा सर्वास्ले खुश ठेवाना प्रयत्न्य करस, आपला चांगला साठे नई पण सर्वास्ना चांगला ना बारामा विचार करस, एनासाठे कि त्या वाचाळामा येवोत. ह्याच प्रमाणे तुमी बी असाच राहा कि यहुदी, बिगर यहुदी आणि परमेश्वर नि मंडळी ले कोणतीच समस्या नई राहो.

← Chapter 9 Jump to: Chapter 11 →