1 Corinthians 6

Ahirani (आहिराणी नवा करार) - No Year

← Chapter 5 Jump to: Chapter 7 →

1कदी तुमना मधून कोणी विश्वासी ना दुसरा विश्वासी संगे मुकदमा राहो, त तुमी निर्णय साठे अधर्मी न्यायीस कळे नका जायज्यात. तुमी आपली मंडळी ना विश्वासीस्ले न्याय करासाठे सांगा, कि तुमना मधून कोण बरोबर शे.

2निश्चित तुमले माहिती शे कि भविष्य मा परमेश्वर ना लोक ह्या जग ना लोकस्ना न्याय करतीन. एनासाठे निश्चित रूप कण तुमी आपला मधला धाकला तून धाकला झगळास्ना न्याय करासाठे योग्य बनी जावा.

3तुमले माहिती शे कि भविष्य मा आमी स्वर्गदूतस्ना न्याय करसुत, त निश्चितच आमी आपला जीवन ना साध्या गोष्टीस्ना बी न्याय करू सकतस.

4कदी असा संसारिक गोष्टी तुमना जोळे येतस, त तुमी येणा न्याय करासाठे त्या लोक जोळे नका जायज्यात, जेस्ना मंडळी ना लोकस्मा काहीच आदर नई.

5तुमले लाज वाटाले पाहिजे, निश्चित तुमना मधमा कोणी एक समजदार व्यक्ती शे जो आपला संगी विश्वासी भावूस्ना न्याय करू सकस.

6पण अस करान सोळीसन, एक विश्वासी भावू दुसरा विश्वासी भावू ना विरुद्ध न्यायालय मा जातस आणि अविश्वासीस्ले आपला न्याय करू देतस.

7पण खर हय शे, कि तुमी आपस मा मुकदमा करतस आणि एना कण हय सिद्ध होस कि तुमी ख्रिस्ती जीवन ले जगा मा पुरा हारी जायेल शेतस. काय तुमना साठे हय चांगल नई होवाव कि तुमी अन्याय ले सहन करी लेवोत? काय तुमना साठे हय चांगल नई होवाव कि तुमी नुकसान उचली लेवोत?

8एले सोळीसन तुमी दुसरास संगे अन्याय करतस आणि नुकसान पोहोचाळतस, आणि अस तुमी आपलाच विश्वासी भावूस संगे करतस.

9तुमले हय माहिती शे कि अन्यायी लोक परमेश्वर ना राज्य ना वारीस नई होवावत. कोणी तुमले धोका नई देवू सको, त्या लोक ज्या वेश्यागामी करतस, मूर्ती-पूजक शेतस, व्यभिचार शेतस, लबाळ शेतस, पुरुषगामी शेतस,

10चोर शेतस, लोभी शेतस, बेवळा शेतस, गाया देणारा शेतस, धोका देणारा शेतस, असा लोक परमेश्वर ना राज्य ना वारीस नई होवावत.

11तुमना मधून कितलाक त पहिले असाच होतात, पण प्रभु येशु ख्रिस्त ना नाव कण आणि आमना परमेश्वर नि आत्मा कण तुमना पाप धोयामा एयेल शेतस, तुमी पवित्र करामा एयेल शेतस आणि धर्मी ठरावामा एयेल शेतस.

12तुमना मधून कोणी सांगस, कि मले सर्व काही करानी परवानगी शे. हा शे, पण सर्व काही तुमना साठे फायदान नई. मी सांगू सकस कि मले सर्व काही करानी परवानगी शे, पण मी कोणतीच गोष्ट ना गुलाम नई बनाव.

13कोणी सांगस, जेवण आपला शरीर ना साठे, आणि शरीर जेवण ना साठे. हा हय खर शे, पण परमेश्वर शरीर आणि जेवण दोनीस्ना नाश करीन. शरीर व्यभिचार ना साठे नई शे, पण प्रभु नि सेवा साठे शे, आणि प्रभु शरीर ना गरजस्ले उरावस.

14आमना शरीर महत्वपूर्ण शे, कारण कि जस परमेश्वर नि आपली सामर्थ्य कण प्रभु येशु ख्रिस्त ले मरेल मधून परत जित्ता कर, तसाच तो आमले बी जित्ता करीन.

15निश्चित तुमले माहिती शे, कि तुमना शरीर ख्रिस्त ना शरीर शे. त काय मी ख्रिस्त ना आंग ले लिसन तेस्ले वेश्यास्ना आंग बनावू? कदीच नई.

16तुमले निश्चितच माहिती शे, कि जो कोणी वेश्या नि संगती करस, तो तीना संगे एक तन हुई जास, कारण कि पवित्र शास्त्र मा लिखेल शे, “त्या दोनी एक तन होतीन.”

17पण जो प्रभु ना संगे संगती करस, तो तेना संगे एक आत्मा हुई जास.

18व्यभिचार नका करा. कोणी बी असा पाप जो माणुस करस तेना प्रभाव तेना शरीर वर नई पळत, पण व्यभिचार करणारा व्यक्ती आपलाच शरीर ना विरुद्ध मा पाप करस.

19निश्चितच तुमले माहिती शे, कि तुमना शरीर पवित्र आत्मा ना मंदिर शे, जो तुमना मा बसेल शे आणि तुमले परमेश्वर कळून भेटेल शे, आणि तुमी आपला नई शेतस पण परमेश्वर ना शेतस.

20कारण कि परमेश्वर नि तुमले दाम दिसन विकत ली लीयेल शे, एनासाठे परमेश्वर नि महिमा साठे आपला शरीर ना उपयोग करा.

← Chapter 5 Jump to: Chapter 7 →