1 Corinthians 8

Ahirani (आहिराणी नवा करार) - No Year

← Chapter 7 Jump to: Chapter 9 →

1तुमी आपला पत्र मा मूर्तीस्ले बलिदान करेल जेवण ना बारामा मले विचार, आमी सर्वास्ले ह्या विषय ना बारामा ज्ञान शे. पण ज्ञान आमना मा गर्व उत्पन्न करस, जव कि प्रेम आमले दुसरास्नी मदत कराले शिकाळस.

2कदी कोणी समजा कि तेले काही माहिती शे, त तेले जस माहिती पाहिजे तस आते लगून नई माहिती.

3पण कदी कोणी परमेश्वर वर प्रेम ठेवस, त परमेश्वर तेले वयखस.

4एनासाठे, मी मूर्ती ना समोर बलिदान करेल जेवण ले खावाना विषय मा विचारेल प्रश्न ना उत्तर देसू. आमले माहिती शे कि मूर्ती खरज कोणताच देव नई शे, आणि फक्त एकच जित्ता परमेश्वर शे.

5जरी आकाश आणि पृथ्वी वर गैरा शेतस जेस्ले लोक ईश्वर आणि प्रभु सांगतस.

6तरी बी आमना साठे त एकच परमेश्वर शे. म्हणजे परमेश्वर जो सर्वा वस्तूस्ले बनावनार शे आणि आमी तेनाच साठे जगतस, आणि फक्त एकच प्रभु शे, म्हणजे प्रभु येशु ख्रिस्त, जेना द्वारे सर्वा वस्तू बनावामा उनात, आणि आमी तेनाच द्वारे जित्ता शेतस.

7पण आमना काही विश्वासी भावूस्ले हय नई माहिती कि मूर्तीस्मा काहीच सामर्थ्य नई शे. कारण कि पहिले त्या त्या मूर्तीस्नी स्तुती कऱ्या करत होतात, पण जव आते त्या मूर्तीस्ले बलिदान करेल जेवण ले खातस, त त्या चुकी कण असा विचार करतस कि त्या आते त्या मूर्तीस्नी स्तुती करी ऱ्हायनात. बरोबर आणि चुकीना ले समजाना तेस्ना विवेक कमजोर हुई जायेल शे, आणि एनासाठे त्या विचार करतस कि त्या जेवण ले खाईसन अशुद्ध हुई जायेल शेतस.

8जेवण आमले परमेश्वर ना नजीक नई पोहोचाळत, कदी आमी नई खावावत त आमना काही नुकसान नई, आणि कदी खासुत बी तरी काही फायदा नई.

9पण सावधान राहा, अस नई होवो, कि तुमनी हय स्वतंत्रता काही दुर्बळ लोकस्ना साठे ठोकर ना कारण बनी जावो.

10कारण कि कदी कोणी माणुस जेना ह्या बारामा विवेक कमजोर शे, तुमी ज्ञानीस्ले मूर्ती ना मंदिर मा जेवण करतांना देखोत, त काय तेना विवेक मा मूर्ती ना समोर अर्पण करेल वस्तूस्ले खावानी हिम्मत नई होवाव?

11आणि एनासाठे तो विश्वासी भावू जेना विवेक कमजोर शे, जेना साठे ख्रिस्त मरणा, तुना ह्या ज्ञान मुळे तो नाश हुई जाईन.

12आणि ह्या प्रमाणे तुमी त्या विश्वासी भावूस्ना विरुद्ध अपराध करीसन तेस्ना दुर्बल विवेक ले दुखाळतस, आणि अस करीसन तुमी ख्रिस्त ना विरुद्ध पाप करतस.

13एनासाठे, कदी मूर्तीस्ले चळावामा एयेल जेवण खावा कण कोणी विश्वासी भावू ना विश्वास ले ठेच पोहोचस, त मी त्या प्रकार ना जेवण कदीच नई खावाव, एनासाठे कि मी कोणी विश्वासी भावू ना विश्वास ले ठोकर खावाळा ना कारण नई बनू.

← Chapter 7 Jump to: Chapter 9 →